އޭޝިއާދަރުކޮޅުގެ މީހުންނާމެދު ނަފްރަތު އުފެއްދުމަކީ އެމެރިކާގައި ގާނޫނީ ކުށެއްކަމުގައި ކަނޑައަޅާ، "އެންޓި-އޭޝިއަން ހޭޓް ކްރައިމް" ގާނޫނު އެމެރިކާގެ ރައީސް ޖޯ ބައިޑްން ބުރާސްފަތި ދުވަހު ތަސްދީގު ކުރައްވައިފިއެވެ.
ބައިޑްން މި ގާނޫނު ތަސްދީގު ކުރުމާއެކު، ކޯވިޑް ޕެންޑަމިކްގެ ތެރޭގައި، ފެސިފިކް ރަށްތަކުގައި ދިރިއުޅޭ އެމެރިކާ މީހުންނާއި އަދި އެމެރިކާގެ އޭޝިއާ ދަރިކޮޅުގެ މީހުންނާ ދެކޮޅަށް ހިންގަމުންދާ ހަމަނުޖެހުންތަކާ ދެކޮޅަށް ފިޔަވަޅު އެޅުމުގެ ސީދާ ބާރު އެމެރިކާގެ ފެޑެރަލް ލޯ އެންފޯރސްމަންޓް އޭޖެންސީތަކަށް ލިބިގެން ދާނެއެވެ.
"އެމެރިކާ މީހުންގެ ގޮތުގައި އަހަރެމެން އެންމެން އެއްބައިވަންތަ ކުރުވާ މައިގަޑު އަސާސްތަކެއް އެބަހުރި. އޭގެ އެއް އަސާސަކީ ނަފްރަތު އުފެއްދުމާއި ދެކޮޅަށް ތެދުވުން. ނަސްލީ ތަފާތު ކުރުންތަކާ ދެކޮޅަށް ތެދުވުން،" މި ގާނޫނު ތަސްދީގު ކުރުމަށް ވައިޓް ހައުސްގައި ބޭއްވުނު ރަސްމިއްޔާތަށް ހާޒިރުވި ޑިމޮކްރަޓިކް ޕާޓީގެ މަޖިލިސް މެމްބަރުންނާއި އަދި ސަރުކާރުގެ އިސް އޮފިޝަލުންނާ މުޚާތަބުކޮށް ބައިޑްން ވިދާޅުވެފައި ވެއެވެ.
މިގާނޫނުން، އެމެރިކާގެ އޭޝިއާ ދަރިކޮޅުގެ މީހުންނާ މެދު ނަފަރްތު އުފެއްދުމުގެ ގޮތުން ކުރާ ކުއްތައް ބަލާ މުޒާޖަޢާ ކުރުން އަވަސް ކުރުމަށް ޖަސްޓިސް ޑިޕާޓްމަންޓަށް ބާރު އަޅާނެއެވެ. އަދި މީގެ އިތުރުން މިމަސައްކަތް ބެލެހެއްޓުމަށް މިގާނޫނުގެ ދަށުން ޖަސްޓިސް ޑިޕާޓުމަންޓުގައި ޚާއްސަ މީހަކު އައްޔަން ކުރާގޮތަށްވެސް މިގާނޫނުން ކަޑައަޅާފައި ވެއެވެ.
Incidents of hate against Asian Americans have seen a shocking spike over the last year. It’s wrong — and it’s un-American.
To all those who are hurting: we see you and we are committed to stopping the hatred and bias.
— President Biden (@POTUS) May 20, 2021
މިގާނޫނު ފާސްކޮށްފައިވަނީ، އެމެރިކާގެ ގާނޫނު ހަދާ މަޖިލީހުގެ ދެ ޗެމްބަރުގެ މެންބަރުންގެވެސް ތަނަވަސް އައުލަބިއްޔަތަކުންނެވެ. މި ގާނޫނު ސެނެޓްގައި ފާސް ކޮށްފައިވަނީ، 94-1 އަގުލަބިއްޔަތަކުންނެވެ. އަދި ހައުސް އޮފް ރެޕްރެސެންޓޭޓިވްސްފައި މިގާނޫނު ފާސް ވެގެން ދިޔައީ 364-62 ވޯޓުންނެވެ.
މި ގާނޫނުން، އެމެރިކާގެ އޭޝިއާ ދަރިކޮޅުގެ މީހުުންނާއި އަދި ފެސިފިކް ރައްށްތަކުގައި ދިރިއުޅޭ އެމެރިކާ މީހުންނާމެދު ހަމަނުޖެހުން ހިންގާ ފަރާތްތަކާ ދެކޮޅަށް ފިޔަވަޅު އަޅާ އަދި ދައުވާ ކުރުމުގެ ފާރު ޖަސްޓިސް ޑިޕާޓްމަންޓަށް ލިބިގެން ދެއެވެ.
އަދި މިގާނޫނުގައި ވާގޮތުން އެމެރިކާގެ ބާންޑާރަ ނާއިބާއި، ޑިޕާޓްމަންޓް އޮފް ހެލްތާއި، އަދި ހިއުމަން ސާވިސްއިން، ކޯވިޑް ޕެންޑަމިކްގެ ތެރޭގައި، ނަސްލީ ތަފާތުކުރުންތަކަށް ހިތްވަރު ލިބިދޭ ގޮތަށް ބޭނުންކޮށްފަ ހުރި ބަސްމަގުތައް އިތުރަށް ބޭނުންކުރުން މަދު ކުރުމުގެ ގޮތުން، އޭގެ އެންމެ ރަގަޅު ގޮތް ހާމަކޮށްދީ ޚާއްސަ ގައިންޑްލައިނެއްވެސް އާންމުކުރުމަށް ވަނީ ލާޒިމް ކޮށްފައެވެ.
މި ގާނޫނު ފާސްކުރުމަށް ޑިމޮކްރަޓިކް ޕާޓީއާއި އަދި ރިޕަބްލިކަން ޕާޓީގެ މެމްބަރުންގެ ފަރާތުންވެސް ލިބިގެން ދިޔަ އެއްބާރުލުމަށް ބައިޑްން ވަނީ ތައުރީފް ކޮށްފައެވެ.
