ސްޓޭޓް މިނިސްޓަރު ފައިރޫޝް އިސްތިއުފާ ދެއްވައިފި

ހޯމް މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ފައިރޫޝް ބުރާސްފަތި ދުވަހު އެ މަގާމުން އިސްތިއުފާ ދެއްވައިފިއެވެ.

އިސްތިއުފާ ދެއްވިކަން އިއުލާން ކުރައްވަމުން އެކްސްގައި ކުރެއްވި ޕޯސްޓެއްގައި ފައިރޫޝް ވިދާޅުވީ، މި ނިންމުން ނިންމެވީ "ފުންކޮށް ވިސްނެވުމަށްފަހު" ކަމަށެވެ.

"ފުންކޮށް ވިސްނުމަށްފަހު، އަޅުގަނޑު ވަނީ މަގާމުން އިސްތިއުފާ ދޭން ނިންމާފައި. ގައުމީ ޚިދުމަތުގެ މި ބާބު ނިންމާލަން މިއީ އެންމެ ރަނގަޅު ވަގުތު ކަމަށް ގަބޫލުކުރަން،" އޭނާ އެކްސްގައި ލިޔުއްވިއެވެ.

ގައުމަށް ޚިދުމަތް ކުރުމުގެ ފުރުސަތު ލިބުމުން ޝުކުރު އަދާކުރައްވައި، އޭނާ މަސައްކަތް ކުރެއްވި މުއައްސަސާތަކާއި އެކުގައި މަސައްކަތް ކުރެއްވި ބޭފުޅުންނަށްވެސް ޝުކުރު އަދާކުރެއްވިއެވެ.

އިސްތިއުފާއާ ގުޅޭ އިތުރު ތަފްސީލު ހޯދުމަށް ކުރި ފޯނު ކޯލްތަކާއި މެސެޖުތަކަށް ފައިރޫޝް ވަގުތުން ޖަވާބެއް ނުދެއްވައެވެ.

ފައިރޫޝް ފުރަތަމަ ރައީސް ޑރ. މުހައްމަދު މުއިއްޒުގެ ސަރުކާރުގައި ޚިދުމަތް ކުރައްވަން ފެއްޓެވީ ހަޔަރ އެޑިޔުކޭޝަން މިނިސްޓްރީގެ ސްޓޭޓް މިނިސްޓަރެއްގެ ގޮތުގައެވެ. އޮކްޓޯބަރު 16، 2024 ގައި އޭނާ ހޯމް މިނިސްޓްރީއަށް ބަދަލުކުރެއްވިއެވެ.

މީގެ ކުރިން ފައިރޫޝް ވަނީ 20 އަހަރު ދިވެހި ފުލުހުންގެ ޚިދުމަތުގައި މަސައްކަތް ކުރެއްވުމަށްފަހު 2021 ވަނަ އަހަރު ޝަރަފުވެރި ރިޓަޔަރމަންޓެއް ނަންގަވާފައެވެ. އެ ވަގުތު އޭނާ ހުންނެވީ އެސިސްޓެންޓް ކޮމިޝަނަރ އޮފް ޕޮލިސްގެ މަގާމުގައެވެ.

ނަމަވެސް، އޭނާއާ ދެކޮޅަށް ކުރެވިފައިވާ ތުހުމަތުތަކާ ގުޅިގެން، އެ ޝަރަފުވެރި ރިޓަޔަރމަންޓް ރައްޔިތުންގެ މަޖިލީހުން ވަނީ ހަމަ އެ އަހަރު ބަލައިނުގަނެފައެވެ.

ފައިރޫޝްގެ ރިޓަޔަރމަންޓްގެ މައްސަލަ މަޖިލީހަށް ހުށަހެޅުއްވީ އޭރުގެ މަޖިލީހުގެ ރައީސް، ކުރީގެ ރައީސް މުހައްމަދު ނަޝީދެވެ. އަލަށް ފާސްކުރެވުނު ދިވެހި ފުލުހުންގެ ޚިދުމަތުގެ ގާނޫނުގެ ދަށުން އޭނާގެ ރިޓަޔަރމަންޓް ބަލައިގަނެވެން ނެތްކަން ފާހަގަކުރައްވަމުންނެވެ.

ފެބްރުއަރީ 7، 2012 ގައި ނަޝީދުގެ ސަރުކާރު ވެއްޓުމަށްފަހު، ފައިރޫޝް ވަނީ އެކްޓިން ޕޮލިސް ކޮމިޝަނަރުގެ މަގާމު ފުރުއްވާފައެވެ. ނަޝީދު އިސްތިއުފާ ދެއްވުމުގެ ކުރިން ހިނގައިދިޔަ ހަމަނުޖެހުންތަކުގައި މުހިއްމު ދައުރެއް އަދާކުރެއްވި ކަމަށް އޭނާގެ މައްޗަށް ތުހުމަތު ކުރެވެއެވެ. ނަޝީދު ވިދާޅުވާ ގޮތުގައި، އެ އިސްތިއުފާއަކީ މަޖުބޫރީ ހާލަތެއްގައި ދެއްވި އިސްތިއުފާއެކެވެ.