ކްރިމިނަލް ކޯޓާއި ސިވިލް ކޯޓަށް އައު ފަނޑިޔާރުން އައްޔަންކޮށްފި

ކްރިމިނަލް ކޯޓާއި ސިވިލް ކޯޓުގައި ހުސްވެފައިވާ މަޤާމުތަކަށް އައު ފަނޑިޔާރުން އައްޔަންކޮށްފިއެވެ.

ޖުޑިޝަލް ސާވިސް ކޮމިޝަން (ޖޭއެސްސީ) އިން ކްރިމިނަލް ކޯޓުގައި ހުސްވެފައިވާ ތިން މަޤާމަކަށް ފަނޑިޔާރުން ހޯދުމުގެ މަސައްކަތް ފެށީ މިދިޔަ މަހުގެ ކުރީކޮޅުއެވެ. ފުރިހަމަ އިންޓަވިއު ޕްރޮސެސްއަކަށްފަހު، ކޮމިޝަނުން ވަނީ ތިން ބޭފުޅަކު އައްޔަން ކުރުމަށް ހޮވާފައެވެ: ޅ. ކުރެންދޫ، ނޫރާނީމާގެ، ސުލައިމާން މުޙައްމަދު؛ ހއ. ދިއްދޫ، ޑައިޒީމާގެ، އަޙްމަދު ތައުފީޤް؛ އަދި ތ. ވޭމަންޑޫ، ޑްރީމް، މުޙައްމަދު ޢަބްދުﷲއެވެ.

ކްރިމިނަލް ކޯޓަށް އަލަށް އައްޔަން ކުރެއްވި ފަނޑިޔާރުންގެ ތެރެއިން، ސުލައިމާން މުޙައްމަދު ވަނީ ކޮލެޖް އޮފް އިސްލާމިކް ސްޓަޑީޒް އިން ބެޗެލަރ އޮފް ޝަރީޢާ އެންޑް ލޯ (އޮނާސް) ހާސިލްކުރައްވާފައެވެ. އޭނާ ވަނީ 2022 ވަނަ އަހަރުގެ ސެޕްޓެމްބަރު 4 އިން ފެށިގެން ކުރެންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ ގޮތުގައި ޚިދުމަތް ކުރައްވާފައި، ޝަރުޢީ ދާއިރާގައި 12 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައެވެ.

އަޙްމަދު ތައުފީޤް ވަނީ ޤާނޫނީ ދާއިރާގައި 18 އަހަރުގެ ޕްރޮފެޝަނަލް ތަޖުރިބާ ލިބިވަޑައިގެންފައި، މީގެ ކުރިން އެޓަރނީ ޖެނެރަލްގެ އޮފީހާއި ޕްރޮސެކިއުޓަރ ޖެނެރަލްގެ އޮފީހުގައި އެކި މަޤާމުތަކުގައި ޚިދުމަތް ކުރައްވާފައެވެ. މުޙައްމަދު ޢަބްދުﷲ ވަނީ 2017 ވަނަ އަހަރުގެ ސެޕްޓެމްބަރު މަހުން ފެށިގެން ޕްރޮސެކިއުޓަރ ޖެނެރަލްގެ އޮފީހުގައި ސީނިއަރ ޕަބްލިކް ޕްރޮސެކިއުޓަރެއްގެ ގޮތުގައި ޚިދުމަތް ކުރައްވަމުންދާ ބޭފުޅެކެވެ.

ކްރިމިނަލް ކޯޓަށް އައްޔަން ކުރި ފަނޑިޔާރުންގެ އިތުރުން، ޖޭއެސްސީ އިން ވަނީ ސިވިލް ކޯޓަށްވެސް ދެ ފަނޑިޔާރަކު އައްޔަން ކޮށްފައެވެ: ގއ. ކަނޑުހުޅުދޫ، ރީލްމަންޒިލް، މުޙައްމަދު ނިޝާތު އަދި ރ. ހުޅުދުއްފާރު، ރޯސްވިލާ، އާސިޔާ ޢަޒީމާއެވެ.

ނިޝާތު ވަނީ ޤާނޫނީ އަދި ޝަރުޢީ މަޤާމުތަކުގައި 15 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައެވެ. އާސިޔާ ޢަޒީމާ ވަނީ މީގެ ކުރިން ރައްޔިތުންގެ މަޖިލީހުގައި ލީގަލް އޮފިސަރެއްގެ ގޮތުގައި، އަދި ފަހުން ޑެޕިއުޓީ ޑިރެކްޓަރ އޮފް ލީގަލް އެފެއާޒްގެ ގޮތުގައި ޚިދުމަތް ކުރައްވާފައެވެ.

އަލަށް އައްޔަން ކުރެއްވި ފަނޑިޔާރުން ރަސްމީކޮށް މަޤާމުގެ ހުވާ ކުރެއްވީ ބުރާސްފަތި ދުވަހު ބޭއްވި ރަސްމިއްޔާތެއްގައެވެ.