އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު މިހާރު ކުރިޔަށްދާ ހަމަލާ ބަދަލު ކުރުންތަކުގައި، އިސްރާއީލަށް ހަމަލާ ދިނުމަށްޓަކާ، ފަލަސްތީނުގެ ހަމާސް ޖަމާއަތުން މުޅިން އާވައްތަރެއްގެ، ހަގުރާމަމަތީ ޑްރޯންއެއް ތައާރަފް ކޮށްފިއެވެ.

އަދި ހަމާސްގެ ސޯޝަލް މީޑިއާ ޕްލެޓްފޯމްތަކުންވަނީ، އެ ޖަމާއަތުގެ ހަގުރާމަވެރިން، އިސްރާއީލަށް ހަމަލާ ދިނުމަށްޓަކާ މިޑްރޯން އުދުއްސާލާ މަންޒަރުގެ ވީޑިއޯވެސް އާންމު ކޮށްފައެވެ.

Video released by the al-Qassam Brigade of the "Shihab" drone pic.twitter.com/Z9c6zuHLNd

— Michael A. Horowitz (@michaelh992) May 13, 2021

އިސްރާއީލުގެ މީޑިއާތަކުން ރިޕޯޓު ކޮށްފައިވާ ގޮތުގައި، ހަމާސް ޖަމާއަތުން މިހާރުވަނީ، "ޖާނުން ފިދާވާ ޑްރޯން"ގެ ބޭނުން ކޮށްގެން އިސްރާއީލުގެ ސިޓީތަކަަށް ހަމަލާ ދޭން ފަށާފައެވެ.

"ޖާނުން ފިދާވާ ޑްރޯން"އަކީ، ގޮވާތަކެތިން ފުރާލެވިފައިވާ ޑްރޯންއެކެވެ. މި ޑްރޯން ހަމަލާ ދޭނެ އަމާޒެއް ދެނެގަތުމަށްޓަކާ ކުޑަވަގުތު ކޮޅަކު ހަމަލާ ދޭން ބޭނުންވާ ސަރަހައްދުގައި އުދުހުމަށްފަހު ވަރަށް އަވަސް ބާރު މިނެއްގައި ގޮސް، ހަމަލާ ދޭން ބޭނުންވާ އަމާޒަކަށް ވެއްޓިގަނެއެވެ.

ޓައިމްސް އޮފް އިސްރާއީލް ނޫހުން ވަނީ، އެގައުމުގެ އަސްކަރިއްޔާގެ ފައިޓަރ ޖެޓަކުން، މީގެ ޑްރޯންއަކަށް ހަމަލާދީ ގޮއްވާލާ ކަމަށް ބުނާ ވީޑިއޯއެއް އާންމު ކޮށްފައެވެ. އަދި މި ނޫހުން ރިޕޯޓު ކޮށްފައިވާ ގޮތުގައި، އިސްރާއީލުގެ ފައިޓަރ ޖެޓްތަކުންވަނީ، މި ހާރު ހިގާ ހަމަނުޖެހުންތަކުގައި، ހަމާސްއިން ފޮނުވާލާފައިވާ މީގެ ހުރިހާ ޑްރޯންތަކެއް އަމާޒަށް ވާސިލް ވުމުގެކުރިން ގޮއްވާލާފައެވެ.

IDF spokesperson released a video of one of these drones being intercepted pic.twitter.com/zwIAObFERI

— Michael A. Horowitz (@michaelh992) May 13, 2021

ހަމާސް ޖަމާއަތާއި އިސްރާއީލާ ދެމެދު މިހާރު ކުރިޔަށް ދާ ހަގުރާމައިގެ ސަބަބުން، ވައިގެ ސަރަހައްދުން ދަތުރުކުރުމަކީ ރައްކާތެރި ކަމަކަށް ނުވާތީ، މި ސަރަހައްދު ދަތުރުކުރުން އެއަރލައިންތަކުން މިހާރުވަނީ ހުއްޓާލާފައެވެ.

އަދި އިސްރާއީލުން މިހާރުވަނީ، ކުރިމަތިވެދާނެ ހުރިހާ ހާލަތަކަށް އެގައުމުގެ އަސްކަރިއްޔާ ތައްޔާރުވެ ބޭއްވުމުގެ ގޮތުން ހަގުރާމަމަތީ ޓޭންކަރުތަކާ ބަރުހަތިޔާރު، ގާޒާގެ ބޯޑަރުކައިރިއަށް ޖަމާ ކުރަންވެސް ފަށާފައެވެ.

ފަލަސްތީނުގެ ރައްޔިތުން ބަރަކާތްތެރި ފިތުރު އީދުދުވަސް ފާހަގަ ކުރަމުންދާއިރު، އިސްރާއީލު ސިފައިން ފަލަސްތީނުގެ ގާޒާއަށް ދެމުންދާ ހަލާތައް ވަރުގަދަކޮށް، ގަޒާގެ އުސް އިމަރާތްތަކަށާއި އަދި އެހެނިހެން އަމާޒުތަކަށް ދެމުންދާ ވަރަގަދަ ހަމަލާތަކުގައި ފަލަސްތީނުގެ 84 މީހަކު ޝަހީދުވެފައެވެ.

ފަލަސްތީނުގެ ހެލްތު މިނިސްޓްރީން މައުލޫމާތު ދީފައިވާ ގޮތުގައި، މި ހަފްތާގެ ހޯމަ ދުވަހު އިސްރާއީލުގެ އުދުވާން ފެށުނު ފަހުން މިހާތަނަށް ފަލަސްތީނުގެ 84 މީހަކު އިސްރާއީލު ލާއިންސާނީ ހަމަލާތަކުގައި ޝަހީދު ވެފައިވާއިރު، މީގެތެރޭގައި 17 ކުޑަ ކުއްޖަކުވެސް ހިމެނޭ ކަމަށެވެ. އަދި މިހާތަނަށް މި ހަމަލާތަކުގައި 480 މީހުންނަށް އަނިޔާ ވެފައިވާ ކަމަށްވެސް ފަލަސްތީނުގެ ހެލްތު މިނިސްޓްރީން މައުލޫމާތު ދީފައި ވެއެވެ.

އިސްރާއީލުގެ މީޑިއާތަކުން މައުލޫމާތު ދޭގޮތުގައި ގާޒާއިން އިސްރާއީލުގެ ސިޓީތަކަށް ފޮނުވާފައިވާ ރޮކެޓް ހަމަލާތަކުގައި މިހާތަނަށް އިސްރާއީލުގެ 6 މީހަކާއި އިންޑިއާ މީހަކު ވަނީ މަރުވެފައެވެ.