ކޯވިޑ-19 ގައި ރާއްޖޭގައި އަނެެއްކާވެސް ކޭސްތައް އިތުރުވެ، ބަލީގެ ނުރައްކާ ބޮޑުވެފައިވާތީ ފިޔަވަޅުތައް ހަރުކަށި ކުރުމަށް ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމް ކަމާއި ބެހޭ ފަރާތްކަށް ގޮވާލައްވައިފިއެވެ.
ރާއްޖޭގައި ކޯވިޑްގެ ބަލިމަޑުކަން ބޮޑުވެ، ބަލީގައި ޕޮޒިޓިވްވާ މީހުންގެ އަދަދު ދަނީ އުފުލެމުންނެވެ. އޮތުން އިއްޔެއަކީ ރާއްޖެއިން މިހާތަނަށް ރެކޯޑް އަދަދަކަށް މީހުން ޕޮޒިޓިވްވި ދުވަހެކެވެ. އިއްޔެ އެކަނިވެސް 300 އަށްވުރެ މީހުން ކޯވިޑަށް ޕޮޒިޓިވް ވެފައިވެއެވެ. ކޯވިޑްގެ ނުރައްކާ ބޮޑުވަމުންދާ މި ދަނޑިވަޅުގައި ރައްކާތެރިކަމުގެ ފިޔަވަޅުތައް ހަރުކަށިކޮށް، އިތުރު ފިޔަވަޅުތަކެއް އެޅުއްވުމަށް ރައީސް މައުމޫން ވަނީ ގޮވާލައްވާފައެވެ.
The current surge in Covid infections in Maldives is quite alarming. I call on the authorities to take more stringent measures to control this pandemic. @presidencymv @HPA_MV
— Maumoon Abdul Gayoom (@maumoonagayoom) April 24, 2021
ކޯވިޑް-19 އާއި ގުޅިގެން ރާއްޖޭގައި އަޅާފައިވާ ގިނަ ފިޔަވަޅުތައް ވަނީ ރޯދައިގެ ކުރިން ދޫކޮށްލާފައެވެ. މާލެ އެކޭ އެއްގޮތަށް މިހާރު އަތޮޅު ތެރޭގެ ބައެއް ރަށްތަކުގައިވެސް ކޯވިޑުގެ ނުރައްކާތެރިކަން އިންތިހާއަށް އުފުލި އެރަށްތަކުގައި ވަނީ ބިރުވެރިކަން އިތުރުވެފައެވެ.
ކޯވިޑް ވެކްސިންގެ 2 ޑޯޒް ޖެހުމަށްފަހު 2 ހަފްތާ ވެފައިވާ ފަރާތްތަކަށް ރަށްރަށަށް ދިއުމުގެ ފުރުސަތުވެސް މިހާރުވަނީ ހުޅުވާލާފައެވެ. ވެކްސިން ޖަހާ މީހުންގެ އަދަދު ރާއްޖޭގައި އިތުރުވި ނަމަވެސް ކޯވިޑަށް ޕޮޒިޓިވްވާ މީހުންގެ އަދަދުވެސް ދަނީ އެއްދުވަހުން އަނެއްދުވަހަށް މަތިވަމުންނެވެ. ކޯވިޑްގެ އަދަދުތައް މަތިވި ނަމަވެސް މިހާތަަނަށް އެއްވެސް ފިޔަވަޅެއް އަޅާނެކަމެއް އެޗްޕީއޭއިން ހާމަކޮށްފައި ނުވެއެވެ.
