އިނގިރޭސި ޕްރިމިއަރ ލީގުގައި އެވަންޓަން އާއި ޓޮޓެންހަމް ބައްދަލުކުރި މެޗު އެއްވަރުވެގެން ނިމިއްޖެއެވެ.
އެވަންޓަންގެ ދަނޑުގައި ކުޅުނު މި މެޗު ނިމުނީ 2-2 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުންވެސް ފެނިގެންގޮސްފައިވަނީ ދާދި ހަމަހަމަ ކުޅުމެކެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ޓޮޓެންހަމުންނެވެ. މި ލަނޑު މެޗުގެ 27 ވަނަ މިނެޓުގައި އެޓީމަށް ކާމިޔާބުކޮށްދިނީ ހެރީ ކޭންއެވެ. ނަމަވެސް އޭގެ ހަތަރު މިނެޓު ފަހުން ލިބުނު ޕެނަލްޓީއަކުން ގިލްފީ ސިގަޑްސަން ވަނީ އެވަޓަނަށް ނަތީޖާ އެއްވަރުކޮށްދީފައެވެ.
މެޗުގެ ދެވަނަ ހާފް ފަށައިގެން 62 ވަނަ މިނެޓުގައި އެވަންޓަންއިން ވަނީ ދެވަނަ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ، ފުރަތަމަ ލަނޑުވެސް ކާމިޔާބުކޮށްދިން ސިގަޑްސަންއެވެ. އެކަމަކު އޭގެ ހަ މިނެޓު ފަހުން އޭރިއާ ތެރެއިން ލިބުނު ފުރުޞަތުން ކޭން ވަނީ ލަނޑެއް ޖަހައި، ޓޮޓެންހަމަށް ނަތީޖާ އެއްވަރުކޮށްދީފައެވެ.
މި މެޗުގައި ކޭން ދެ ލަނޑު ޖެހި ނަމަވެސް، މެޗުގެ ފަހުކޮޅު ތަނބިކައްޓަށް ލިބުނު އަނިޔާއެއްގެ ސަބަބުން އޭނާ ވަނީ ބަދަލުކޮށްފައެވެ. ކޭނަށް ލިބުނު އަނިޔާގެ ތަފުސީލު އަދި މިހާތަނަށް ހާމަކޮށްފައި ނުވާއިރު، ނުވަ ދުވަސް ފަހުން އިނގިރޭސި ލީގު ކަޕުގެ ފައިނަލުގައި މެންޗެސްޓާ ސިޓީއާ ދެކޮޅަށް ޓޮޓެންހަމް ނުކުންނާނެއެވެ.
މި ނަތީޖާއާއެކު ލީގުގައި މިހާތަނަށް ކުޅުނު 32 މެޗުން ހޯދި 50 ޕޮއިންޓާއެކު ޓޮޓެންހަމް އޮތީ ލީގު ތާވަލްގެ 7 ވަނައިގައެވެ. އެވަޓަން 8 ވަނައިގައި އޮތީ ޓޮޓެންހަމަށްވުރެއް އެއް މެޗު މަދުން ކުޅެގެން ލިބުނު 49 ޕޮއިންޓާއެކުއެވެ.
