ދިރާގު ދިިވެހި ޕްރިމިއަރ ލީގުގައި ޓީސީ ސްޕޯޓްސް ކްލަބް ބަލިކޮށް މާޒިޔާއިން ލީގުގެ އެއް ވަނައިގައި ލީޑު ފުޅާކޮށްފިއެވެ.

ރަސްމީ ފުޓްބޯޅަ ދަނޑުގައި ކުޅުނު މި ދެ ޓީމު ބައްދަލުކުރި މެޗު މާޒިޔާއިން ކާމިޔާބުކޮށްފައިވަނީ 1-3 ގެ ނަތީޖާއަކުންނެވެ.

ލީގުގައި މިހާތަނަށް މާޒިޔާ ބަލިވެފައި ނުވާއިރު ކުޅުނު 12 މެޗުން އަށް މެޗު ކާމިޔާބުކޮށް ހަތަރު މެޗުން ވަނީ އެއްވަރުވެފައެވެ. އެޓީމަށް 28 ޕޮއިންޓް ލިބިފައިވާއިރު ދެ ވަނައިގައި އޮތީ 11 މެޗުން 21 ޕޮއިންޓް ލިބިފައިވާ ކްލަބް ވެލެންސިއާއެވެ. ތިން ވަނައިގައި އޮތީ 12 މެޗުން 19 ޕޮއިންޓް ލިބިފައިވާ ކްލަބް ގްރީން ސްޓްރީޓްސްއެވެ. މާޒިޔާ އަތުން ބަލިވި ޓީސީ މިހާރު ވަނީ ހަތް ވަނަ އަށް ވެއްޓިފައެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ދެ ޓީމަށްވެސް ވަނީ ރަނގަޅު ފުރުޞަތުތަކެއް ލިބިފައެވެ. މެޗުގައި ފުރަތަމަ ލަނޑު ޖަހާ ލީޑު ނަގާފައިވަނީ މާޒިޔާއިންނެވެ. ފުރަތަމަ ހާފުގެ ފުރިހަމަ ވަގުތު ހަމަވާން އެންމެ މިނެޓަކަށް ވެފައިވަނިކޮށް މި ލަނޑު އެޓީމަށް ކާމިޔާބުކޮށްދިނީ ހަމްޒާ މުހައްމަދު (ހަމްޕު) ނަގައިދިން ހުރަހަކުން ކޮނޭލިއަސް ސްޓެވާޓް (ކޯނޭ) އެވެ.

މި މެޗުގެ ދެވަނަ ހާފުގެ ކުރީކޮޅު ލީޑު ފުޅާކުރަން މާޒިޔާގެ އުމެއިރަށް ވަނީ ރަނގަޅު ފުރުޞަތެއް ލިބި ބޭކާރުވެފައެވެ. އެގޮތުން އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. މެޗުގައި ޓީސީން ނަތީޖާ ހަމަހަމަކުރީ 53 ވަނަ މިނެޓުގައި ޓީސީގެ ކެޕްޓަން މުހައްމަދު އައްޒާމް ކާމިޔާބުކޮށްދިން ލަނޑުންނެވެ. ޓީސީން މެޗުގެ ނަތީޖާ ހަމަހަމަކުރިތާ މާގިނައިރުތަކެއް ނުވަނީސް މާޒިޔާއިން ވަނީ އެޓީމުގެ ދެވަނަ ލަނޑު ޖަހާ ދެވަނަ ފަހަރަށް ލީޑު ނަގާފައެވެ. މި ލަނޑު މާޒިޔާއަށް ކާމިޔާބުކޮށްދިނީ އިބްރާހީމް މަހުދީ ހުސެއިން (ފޭދޫ އިއްބެ) އެވެ. މާޒިޔާގެ ތިންވަނަ ލަނޑުވެސް އެޓީމަށް ކާމިޔާބުކޮށްދިނީ މި މެޗުގެ މޮޅު ކުޅުންތެރިޔާގެ މަޤާމް ހޯދި އިބްރާހީމް މަހުދީ ހުސެއިން (ފޭދޫ އިއްބެ) އެވެ.

ދިރާގު ދިވެހި ޕްރިމިއަރ ލީގުގައި ހޮނިހިރު ދުވަހުގެ ރޭ ކުޅޭ މެޗުގައި ބައްދަލުކުރާނީ ސުޕަރ ޔުނައިޓެޑް ސްޕޯޓްސް އާއި ޔުނައިޓެޑް ވިކްޓްރީއެވެ. މި މެޗު ފަށާނީ 10 ޖަހާއިރުއެވެ.