ކަރަންޓީނުގެ މުއްދަތު ފުރިހަމަކުރުމަށްފަހު އެޑިންސަން ކަވާނީ މެންޗެސްޓާ ޔުނައިޓެޑުގެ ފަރިތަކުރުންތަކުގައި ފުރަތަމަ ފަހަރަށް ބައިވެރިވެއްޖެއެވެ.
އޭނާގެ ކަރަންޓީނުގެ މުއްދަތު އާދީއްތަ ދުވަހު ވަނީ ހަމަވެފައެވެ. އާދީއްތަ ދުވަހު ޔުނައިޓެޑުން ކުރިއަށްގެންދިޔަ ފަރިތަކުރުންތަކުގައި ކަވާނީ ވަނީ ބައިވެރިވެފައެވެ. ކުޅުންތެރިޔާ ވަނީ ކަރަންޓީންގަ ވެސް ފިޓްނަސް ރަނގަޅު ކުރުމަށް ގިނަ މަސައްކަތްތަކެއް ކޮއްފައެވެ.
ކަވާނީ ކަރަންޓީނު ވާންޖެހުނީ ކޯވިޑް-19 އާ ގުޅިގެން އިނގިރޭސިވިލާތުގެ ސަރުކާރުން ކަނޑައަޅާފައިވާ އުސޫލުތަކުގެ ދަށުން 14 ދުވަހުގެ ކަރަންޓީން ފުރިހަމަކުރަން ޖެހުމުންނެވެ.
އުމުރުން 33 އަހަރުގެ ކަވާނީ ޕީއެސްޖީއަށް ކުޅުނު 301 މެޗުން 200 ލަނޑު ޖަހައިދީފައެވެ. ކަވާނީ ވަނީ ޕީއެސްޖީއާއެކު ފްރެންޗް ލީގު ހަ ފަހަރު ހޯދާފައެވެ.
ޔުނައިޓެޑުގެ ފަރިތަކުރުންތަކުގައި ކަވާނީ ބައިވެރިވިއިރު، ޔުނައިޓެޑުން މާދަމާރޭ ޔުއެފާ ޗެމްޕިއަންސް ލީގުގައި ނުކުންނާނީ ކަވާނީގެ ކުރީގެ ކުލަބު ޕީއެސްޖީއާ ދެކޮޅަށެވެ.
