އިނގިރޭސި ލީގުގައި އަވެއްޓެރި އެވަޓަނާ ކުޅެ އެއްވަރުވި މެޗުގެ ފަހު ވަގުތު ތެރޭގައި ލިވަޕޫލުން ޖެހި ލަނޑު އޮފްސައިޑް ވާނެ އެއްވެސް ހަމަޔެއް އޭނާއަށް ގަބޫލްނުކުރެވޭ ކަމަށާއި އެކަމުގެ ތަފްސީލް ބޭނުންވާކަމަށް ލިވަޕޫލްގެ ކޯޗު ޔާގަން ކުލޮޕް ބުނެފިއެވެ.
މެޗަށްފަހު ވާހަކަ ދައްކަމުން ކުލޮޕް ބުނީ ލިވަޕޫލުން ދެއްކީ އެންމެ މަތީ ފެންވަރުގެ ކުޅުމެއް ކަމަށާއި ދެޓީމުން ވެސް މެޗުގައި ވަރަށް ވާންކުރި ކަމަށެވެ. އޭނާ ބުނީ މެޗުގައި ފުރިހަމަ ބާރުއޮވެ ކޮންޓްރޯލް ކޮއްގެން ކުޅުނީ އޭނާގެ ޓީމުން ކަމަށާއި އެއީ ވަރަށް ސާފުކޮށް އެނގެން އޮތް ކަމެއް ކަމަށެވެ.
އިއްޔެ ލިވަޕޫލްގެ ކޯޗެއްގެ ގޮތުގައި ފަސްއަހަރު ފުރުނު ކުލޮޕް ބުނީ އޭނާ ލިވަޕޫލް ކޯޗުކަމާ ހަވާލުވިފަހުން މިހާ މޮޅަށް ރަށުން ބޭރުގައި ލިވަޕޫލުން ނުކުޅޭކަމަށެވެ. އޭނާ ބުނީ މެޗުގެ ފަހަކޮޅު ލިވަޕޫލުން ޖެހި ލަނޑު އޮފްސައިޑް ވާނެ އެއްވެސް ހަމައެއް އޭނާއަށް ގަބޫލު ނުކުރެވޭ ކަމަށާއި އެކަމުގެ ތަފްސީލް އޭނާ ބޭނުންވާކަމަށެވެ. ކުލޮޕް ބުނީ މިހާރު މެޗު އޮތީ ނިމިފަކަމަށާއި ނަތީޖާއަކީ ބަދަލުކުރެވޭނެ އެއްޗެއް ނޫންކަމަށެވެ.
މެޗުގައި ވަރަށް މޮޅަށް އަހަރެމެން ކުޅެފިން، ޕޮއިންޓެއް ލިބުނަސް އެއަށްވުރެ އިތުރަށް އަހަރެމެންނަށް ހައްގު، އެކަމަކު ދެން މިވާހަކަދެއްކުމުގެ ބޭނުމެއް ނެތް، މެޗުއޮތީ ނިމިފަ
– ކުލޮޕް
އެވަޓަނަށް ނަތީޖާ ހަމަހަމަ ކުރެވުނީ އެޓީމުގައި ހުރި ހުނަރުވެރި ކުޅުންތެރިޔެއްގެ މަސައްކަތުން ކަން ކުލޮޕްވަނީ ފާހަގަކޮއްފައެވެ. 2010 ވަނައަހަރު އޮކްޓޯބަރު 17 ވަނަ ދުވަހުގެ ފަހުން ލިވަޕޫލަށް އެވަޓަންގެ މައްޗަށް، އެވަޓަންގެ ދަނޑުގައި ކުރި ހޯދިފައެއް ނުވެއެވެ.
