އެމެރިކާއާއި ރަޝިއާ ދެމެދު އޮތް ގުޅުން އިތުރަށް ގޯސްވެ، އެގައުމުގައި ހުންނަވާ ރަޝިއާގެ ސަފީރު އަބުރާ ރަޝިއާއަށް ގެންދިއުމަށް އެގައުމުން ނިންމައިފިއެވެ.
އެމެރިކާގައި ހުންނަވާ ރަޝިއާގެ ސަފީރު އެނަޓޮލީ އެންޓަނޯވް އަބުރާ ގައުމަށް ގެންދިއުމަށް ނިންމާފައިވާކަން މޮސްކޯއިން އިއުލާން ކޮށްފައިވަނީ، ރަޝިއާގެ ރައީސް ވްލްޑަމީރު ޕުޓިންއަކީ ގާތިލެއްގެ ގޮތުގައި ސިފަކޮށް، އަދި އެމެރިކާގެ ނިމިދިޔަ އިންތިޚާބާ ކުޅުމަށް ޕުޓިން ކުރައްވާފައިވާ މަސައްކަތްތަކުގެ އަގު ރަޝިއާއިން އަދާކުރަންޖެހޭނެ ކަމަށް އެމެރިކާގެ ރައީސް ޖޯ ބައިޑްން ވިދާޅުވިތާ މަދު ވަގުތުކޮޅެއްގެ ތެރޭގައެވެ.
ރަޝިއާގެ ރައީސްއަކީ ގާތިލެއްކަމުގައި އެމެރިކާގެ ރައީސް ވިދާޅުވެފައިވަނީ، މިހާރު އާންމުކޮށްފައިވާ އެމެރިކާގެ އިންޓެލިޖެންސް ރިޕޯޓުން، ފާއިތުވެދިޔަ ރިޔާސީ އިންތިޚާބުގައި ޑޮނަލްޑް ޓްރަމްޕު އެމެރިކާގެ ރައީސްކަމަށް އަލުން އިންތިޚާބު ކުރުމަށް އެހީތެރި ދިނުމުގެ ގޮތުން އިންތިޚާބަށް ނުފޫޒު ފޯރުވުމަށް ޕުޓިން މަސައްކަތް ކޮށްފައިވާކަމަށް ހާމަވެގެން ދިއުމާ ގުޅިގެންނެވެ.
އެހެންނަމަވެސް، މި ތުހުމަތުތައް ރަޝިއާ ސަރުކާރުން ވަނީ ދޮގު ކޮށްފައެވެ.
އެމެރިކާގެ ވޮޝިންގޓަންގައި ހުންނަ ރަޝިއާ އެންމަބަސީން ނެރުނު ނޫސްބަޔާނެއްގައި ބުނެފައިވަނީ، "މިހާރު ކާރިސާއެއްގެ ތެރޭގައި އޮތް ރަޝިއާ-އެމެރިކާގެ ގުޅުން އިތުރަށް ކުރިޔަށް ގެންދެވޭ ގޮތްތައް ބެލުމަށް،" އެމެރިކާގައި ހުންންވާ ރަޝިއާގެ ސަފީރު އެންޓޮނޯވް ހޮނިހިރު ދުވަހު އެމެރިކާއިން ފުރާވަޑައިގަންނަވާނެ ކަމުގައެވެ.
އެމެރިކާގައި ހުންނަ ރަޝިއާ އެމްބަސީން ނެރެފައިވާ މި ބަޔާނުގައި އިތުތަށް ބުނެފައިވަނީ، "އެމެރިކާގެ މަތީ ފަންތީގެ ބައެއް ބޭފުޅުންގެ، ދެރަވަރު ވާހަކަތަކުގެ ސަބަބުން، މިހާރުވެސް ކުރިމަތިލުންތަކާ ކުރިމަތިލާން ޖެހިފައިވާ މިދެގައުމުގެ ގުޅުން މިހާރު އެއްކޮށް ވަޅުޖެހިގެން ދިއުމުގެ ބިރު އެބައޮތް،" ކަމުގައެވެ.
"އަހަރެމެންނަށް އެންމެ މުހިންމީ، ވޮޝިންގޓަންއިން، މަރު ތަޅު އަޅުވާފައިވާ، މިދެގައުމުގެ ގުޅުން އިތުރަށް ކުރިޔަށް ގެންދެވިދާނެ ގޮތްތައް ކަޑައެޅުން،" ރަޝިއާގެ ފޮރިންގ މިނިސްޓްރީން ބުދަ ދުވަހު ނެރެފައިވާ ބަޔާނެއްގައ ބުނެފައި ވެއެވެ.
"މީގެ ރިސްކު އެމެރިކާއަށް އިހުސާސް ކުރެވޭނަމަ، އަހަރެމެން މިތިބީ، އަބުރާ އިއާދަ ނުކުރެވޭވަރުގެ ގެއްލުން މިގުޅަމަށް ފޯރައިގެން ދިއުމުގެ ކުރިން، ގުޅުމަށް އިތުރަށް ގެއްލުން ވިޔަނުދީ ސަލާމަތްކުރަން ތައްޔާރަށް،" ރަޝިއާގެ ފޮރިން މިނިސްޓްރީން ނެފައިވާ ބަޔާނުގައި ބުނެފައި ވެއެވެ.
