އޫރަޕް ސަރަހައްދުގައި، ކޯވިޑް19ގެ 3 ވަނަ ރާޅެއް ބޯމަތިވެފައިވާއިރު، ދުނިޔޭގެ ސިއްޙަތު ޖަމިއްޔާގެ ލަފައާއިވެސް ޚިލާފަށް، ވެކްސިންގެ ސަބަބުން ހަށިގަޑުގައި ދައުރުވަމުންދާ ލޭ ގަޑުވުމުގެ މަސައްކަތް ކުރިމަތި ވާކަމަށް ކުރެވެމުންދާ ޝައްކުތަކުގެ މައްޗަށް ބިނާކޮށް، އެސްޓްރާޒެނެކާ ވެކްސިން ޖެހުން ވަގުތީގޮތުން އެންމެ ފަހުން ހުއްޓާލި ޔޫރަޕްގެ 3 ގައުމުކަމުގައި ޖަރުމަނުވިލާތް، އިޓަލީ އަދި ފްރާންސް ވެގެން ހިގައްޖެއެވެ.
މިވެކްސިނާއި ގުޅޭގޮތުން އެންމެ ފުރަތަމަ އުފެދިގެން ކަންބޮޑުވުންތަކާއެކު، އެސްޓްރާޒެނެކާ ވެކްސިންގެ ދިފާއުގައި ވާހަކަ ދެއްކި ޖަރުމަނުވިލާތުން ވެކްސިން ބޭނުންކުރުން އެންމެ ފަހުން މަޑުޖައްސާލާފައިވަނީ، މިވެކްސިން ޖެހުމުން ބްލަޑް ކޮލްޓްވުމުގެ މައްސަލަ މަދު ބަޔަކަށް ނަމަވެސް ކުރިމަތިވެފައިވާކަމުގެ ޝައްކުތައް ކުރެވި އަޅާ ރައްކާތެރިކަމުގެ ފިޔަވަޅެއްގެ ގޮތުންކަމުގައި، އެގައުމުގެ ހެލްތު މިނިސްޓަރ ޖެންސް ސްޕާން ވިދާޅުވެފައި ވެއެވެ.
މީގެ އިތުރުން ފްރާންސް އަދި އިޓަލީންވެސް ވަނީ، އީޔޫގެ ސިއްޙީ ކަންކަން ރެގިއުލޭޓް ކުރާ މުވައްސަސާކަމުގައިވާ "ދަ ޔޫރަޕިއަން މެޑިސިން އޭޖެންސީ (EMA)"އިން މިވެކްސިންގެ ހާލަތު ދިރާސާކޮށް ނިމެންދެން އެސްޓްރާޒެނެކާ ވެކްސިން ބޭނުން ނުކުރުމަށް ނިންމާފައެވެ.
"(EMA)އިން މިވެކްސިން ބޭނުންކުމުގެ ހުއްދަ އަލުން ދިނުމާއި ހަމައަށް އަޅާ ރައްކާތެރިކަމުގެ ފިޔަވަޅެއްގެ ގޮތުން، މިވެކްސިން ބޭނުން ނުކުރުމަށް އަހަރެމެން ވާނީ ނިންމާފަ،" ފަރާންސްގެ ރައީސް އެމަނޫލް މެކްރިން ހޯމަ ދުވަހު ބޭއްވުނު ނޫސްވެރިންގެ ބައްދަލުވުމެއްގައި ވިދާޅުވެފައި ވެއެވެ. "މި ވެކްސިން އިތުރަށް ބޭނުންކުރަމުން ދިއުމާގުޅޭގޮތުން (EMA)ގެ ލަފާ އެކޮމިޝަނުން މާދަމާ މެންދުރު ދޭނެ."
އެސްޓްރާޒެނެކާ ވެކްސިންއާއި ގުޅޭގޮތުން އުފެދިފައިވާ ކަންބޮޑުވުންތަކާ ގުޅޭގޮތުން (EMA)އިން ބާއްވާ ބައްދަލުވުމުގެ ކުރިން އަޅާ ރައްކާތެރިކަމުގެ ފިޔަވަޅެއްގެ ގޮތުން އިޓަލީގައިވެސް މިވެކްސިން ބޭނުންކުރުން ވަގުތީގޮތުން މަޑުޖައްސާލާފައިވާ ކަމަށް އިޓާލިއަން މެޑިސިންސް އޭޖެންސީ AIFA އިންވެސް ހޯމަދުވަހު ވަނީ އިއުލާން ކޮށްފައެވެ.
ޔޫރަޕްގެ ބޮޑު 3 ގައުމަކުން އެސްޓްރާޒެނެކާ ވެކްސިން ބޭނުންކުރުން ވަގުތީ ގޮތުން ހުއްޓާލާފައިވަނީ، އިޓަލީގެ އުތުރުގައި، އެސްޓްރާޒެނެކާ ވެކްސިންގެ އެންމެ ފަހުގެ ބެޗް ބޭނުން ކުރުން މެދުކަޑާލުމަށް އެގައުމުގެ ޕްރޮސެކިއުޓަރއެއް އަމުރުކުރިތާ މަދު ގަޑިތަކެއްގެ ތެރޭގައެވެ. ޕްރޮސެކިއުޓަރ މިއަމުރު ނެރެފައިވަނީ، ވެކްސިންގެ ފުރަތަމަ ޑޯޒު ޖެހުމަށްފަހު ބަލިވެ، އަދި އެމީހާ ވެކްސިންގެ ސަބަބުން މަރުވެފައިވާ ކަމަށް ކުރެވޭ ތުހުމަތުތަކާ ގުޅިގެންނެވެ.
އެންމެ ފުރަތަމަ ޑެންމާކުގެ އަންހެނަކު އެސްޓްރާޒެނެކާ ވެކްސިން ޖެހުމަށްފަހު ވަރަށް ބޮޑަށް ބަލިވެ، ކުއްލިގޮތަކަށް މަރުވުމާއި ގުޅިގެން މިވެކްސިނާމެދު އުފެދެންފެށި ޝައްކުތަކާ ގުޅިގެން މުޅި ޔޫރަޕްގައި ކަހަލަ ގޮތަކަށް މިވެކްސިންގެ ބޭނުންކުރުން މިހާރުވަނީ މެދުކަޑާލެވިފއެވެ.
އެހެންނަމަވެސް، އެސްޓްރާޒެނެކާ ވެކްސިން ބޭނުން ކުރުން ގައުމުތަކުން ހުއްޓާލާފައިވަނީ، ވެކްސިން ބޭނުން ކުރުމުގައި އެއްވެސް މައްސަލައެއް ނެތް ކަމަށް ދުނިޔޭގެ ސިއްހަތު ޖަމިއްޔާއިންނާއި އަދި ޔޫރަޕިއަން މެޑކަލް އޭޖެންސީ (EMA) އަދި ޚުދު އެސްޓްރާނެކާ ކުންފުނިންވެސް ބުނެފައި ވަނިކޮށެވެ.
