މިސްރުގެ ވެރި ރަށުގެ ރަށްބޭރުގައި ހުރި، ހެދުން ފެކްޓަރީއެއްގައި ރޯވެ 20 މީހަކު މަރުވެ، 24 މީހަކު ޒަޚަމް ވެއްޖެއެވެ.
މި ފެކްޓަރީގައި ރޯވި ބޮޑު އަލިފާންގަޑު ނިއްވާލުމަށްޓަކާ، އަލިފާން ނިއްވާ 12 އުޅަދުން މަސައްކަތް ކޮށްފައިވެއެވެ. އަދި މިހާތަނަށް އައިއިރު މިފެކްޓަރީގައި އަލިފާން ރޯވާން މެދުވެރިވި ސަބަބެއް ހޯދިފައެއް ނުވެއެވެ.
ބައެއް މީޑިއާތަކުން މައުލުމާތުދޭ ގޮތުގައި، މި އަލިފާންގަޑު ރޯވާން މެދުވެރިވި ސަބަބު ތަހުގީގުކުރުމަށް މިސްރުގެ ޕަބްލިކް ޕްރޮސެކިއުޓަރ މިހާރުވަނީ ޚާއްސަ ޓީމެއް އެކުލަވާލާފައެވެ.
2011 ވަނައަހަރު، މިސްރުގައި ގެނެވުނު އިންގިލާބަށްފަހު، ސަރުކާރުގެ މުވައްސަސާތަކުން ކަޑައަޅާފައިވާ ސަލާމަތީ ފިޔަވަޅުތައް އެކަށީގެންވާ ގޮތެއްގައި ތަންފީޒު ނުކުރެވި، ފަހަކަށް އައިސް ފެންވަރު ދަށްކޮށް އިމާރާތްކުރެވިފައިވާ ބައެއް އިމާރާތްތަކުގައި ވަނީ ގިނަ އަލިފާނުގެ ހާދިސާތަކެއް ހިގާފައެވެ.
ފާއިތުވެދިޔަ، ފެބްރުއަރީމަހު، ލައިސަންސް ނުހޯދާ، މިސްރުގެ ވެރިރަށުގެ ގިންޒާ ސިޓީގައި ހުންނަ 13 ބުރީގެ އިމާރާތެއްގައި ހުރި ބޫޓު ރައްކާކުރާ ވެއަރ ހައުސެއްގައިވެސް ވަނީ، ބޮޑު އަލިފާނުގެ ހާދިސާއެއް ހިގާފައެވެ. އެހެންނަމަވެސް، މުޅި އިމާރާތައް އަލިފާންގަޑު ފެތުރިގެން ދިއުމުގެ ކުރިން، މި އިމާރާތުން މީހުން ހުސްކުރެވިފައިވާތީ، މިހާދިސާގެ ސަބަބުން އެއްވެސް މީހަކަށް ގެއްލުމެއް ލިބިފައެއް ނުވެއެވެ.
ފާއިތުވެދިޔަ 2020 ވަނަ އަހަރު، މިސްރުގެ ކާރޫބާރޫ ބޮޑު ހައިވޭއަކާއި އިންވެގެން އޮތް ތެޔޮ ހޮޅިއަކުން ތެޔޮ ލީކުވެ، ހައިވޭއިން ދުއްވާފައި ދިޔަ ކާރުތަކުގައި ރޯވެ 17 މީހަކަށް އަނިޔާވެފައި ވެއެވެ.
ކޮމެންޓު ފޮނުވާ