އެސްޑީއެފްސީ މެދުވެރިކޮށް ދޫކޮށްފައިވާ ކޮވިޑް-19 ރިކަވަރީ ލޯނުތަކުގެ ގްރޭސް ޕީރިއަޑް 6 މަހުގެ މުއްދަތަކަށް އިތުރުކުރުމަށް ފިނޭންސް މިނިސްޓްރީން ނިންމައިފި އެވެ.
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީ މެދުވެރިކޮށް ސަރުކާރުން ތަޢާރަފުކުރި ރިކަވަރީ ލޯން ސްކީމަކީ ކޮވިޑް-19އާ ގުޅިގެން ކުދި ވިޔަފާރި އާއި މެދުފަންތީގެ ވިޔަފާރިތަކަށާއި، އަމިއްލަ މަސައްކަތްކުރާ ފަރާތްތަކަށް ވަރކިންގ ކެޕިޓަލް ފޯރުކޮށްދީ، މި ދަތި ދަނޑިވަޅުން އިގުތިސާދު އަރައިގަތުމަށް އެހީތެރިވެދިނުމުގެ ގޮތުން ސަރުކާރުން ފަށާފައިވާ ސްކީމެކެވެ.
ވިޔަފާރިތަކަށް އެހީވުމަށް ތާރަފްކޮށްފައިވާ ސްކީމެއްކަމަށްވުމުން ލޯނު އަނބުރާ ދެއްކުމުގައިވެސް ލުއިފަސޭހަ ގޮތްތަކެއް ފަހިކޮށްދިނުމަކީ ފިނޭންސް މިނިސްޓްރީގެ މަގުސަދެއް ކަމަށް އެ މިނިސްޓްރީން ވަނީ ބުނެފައެވެ.
އެގޮތުން މިހާތަނަށް ނަގާފައިވާ ލޯނުތަކުގެ ގްރޭސް ޕީރިއަޑް ހަމަވެފައިވާ ކުންފުނިތަކަށްވެސް އިތުރު 6 މަހުގެ މުއްދަތަކަށް ގްރޭސް ޕީރިއަޑް އިތުރުކޮށް، ޖުމްލަ 12 މަހުގެ ގްރޭސް ޕީރިއަޑްއަކަށް އިތުރުކުރުމުގެ ފުރުސަތު އޮންނާނެއެވެ. އަދި ގްރޭސް ޕީރިއަޑް އިތުރުކޮށްދިނުމުގައި ލޯން އެޕްލިކޭޝަން އިވެލުއޭޓްކުރުމުގައި އެސްޑީއެފްސީން ގެންގުޅެފައިވާ މިންގަނޑުތަކަށް ބެލޭނެ ކަމަށްވެސް ފިނޭންސް މިނިސްޓްރީން ވަނީ ބުނެފައެވެ.
އަދި ކުރިއަށް އޮތް 30 ދުވަސް ތެރޭގައި، މި ލޯނު ނަގާފައިވާ ފަރާތްތަކަށް ގްރޭސް ޕީރިއަޑް އިތުރުކުރުމުގެ އެޕްރޫވަލް ޓަރމްސްއާއެކު އެސްޑީއެފްސީގެ ކަސްޓަމަރ ޕޯޓަލް މެދުވެރިކޮށް އަންގާނެ ކަމަށްވެސް ފިނޭންސް މިނިސްޓރީން ވަނީ ބުނެފައެވެ.
ކަސްޓަމަރ ޕޯޓަލް މެދުވެރިކޮށް އަންގާތާ 30 ދުވަހުގެ ތެރޭގައި ގްރޭސް ޕީރިއަޑް އިތުރުކުރުމަށް ބޭނުންވާ ފަރާތްތައް އެކަމަށް ބޭނުންވާ ލިޔެކިޔުން ހަމަކުރަންވާނެ ކަމަށްވެސް ފިނޭންސް މިނިސްޓްރީން ބުނެއެވެ.
މިގޮތަށް ގްރޭސް ޕީރިއަޑް އިތުރުކުރާނީ ހަމައެކަނި އެކަމަށް އެދި އެކްސްޓެންޝަން އެޕްރޫވްކުރާ ފަރަތްތަކަށެވެ. އިތުރުކުރަން ބޭނުން ނުވާނަމަ އެކްސްޓެންޝަން ރިޖެކްޓްކުރުމުގެ އިހުތިޔާރުވެސް ވިޔަފާރިތަކަށް ލިބިގެންވެއެވެ.
ފިނޭންސް މިނިސްޓްރިން ދާދިފަހުން ވަނީ ބީއެމްއެލް މެދުވެރިކޮށް ދޫކޮށްފައިވާ ރިކަވަރީ ލޯންތަކުގެ ގްރޭސް ޕީރިއަޑުވެސް އިތުރުކުރަން ބޭނުންވާ ވިޔަފާރިތަކަށް އެކަން ކުރުމުގެ ފުރުސަތު ހުޅުވާލާފައެވެ.
ކޮމެންޓު ފޮނުވާ