ޑައިރެކްޓަރ ރޯހިތު ޝެއްޓީގެ ކޮޕް ޑްރާމާތަކުގެ ފޭނުން އެންމެ އިންތިޒާރުކުރަމުންގެންދާ "ސޫރިޔަވަންޝީ" އޭޕްރީލްމަހުގެ 2 ވަނަ ދުވަހު ސިނަމާތަކުގައި އެޅުވުމަށް ނިންމައިފި އެވެ.
މި ފިލްމަކީ ކޯވިޑް-19ގެ ސަބަބުން ރިލީޒްކުރުން ލަސްކުރި ބޮޑެތި ފިލްމުތަކުގެ ތެރެއިން ފާހަގަކޮށްލެވޭ އެއް ފިލްމެވެ. މީގެކުރިން މި ފިލްމު އޮންލައިން ޕްލެޓްފޯމެއްގައި ރިލީޒްކޮށްފާނެ ކަމަށް ޚަބަރުތައް ފެތުރު ނަމަވެސް ފިލްމުގެ ޕްރޮޑަކްޝަން ޓީމުން މި ފިލްމު އޮންލައިން ޕްލެޓްފޯމެއްގައި އެޅުވުމަށް ބޭނުންނުވީއެވެ.
ރިޕޯޓުތައް ބުނާގޮތުގައި ޕްރޮޑަކްޝަން ޓީމުން މި ފިލްމު އެޅުވުމަށް މިހާރުވެސް ބޭނުންވަނީ ސިންގަލް ސްކްރީން ސިނަމާތަކުގަ އެވެ. އަދި މަލްޓިޕްލެކްސް ތަކުގައި ފިލްމު ދައްކަން ބޭނުން ފަރާތްތަކުންވެސް ޕްރޮޑަކްޝަން ޓީމުން ކަނޑައަޅާ ވަކި ކަންކަމަކަށް ތަބާވާން ޖެހޭނެއެވެ. އެގޮތުން ޕްރޮޑަކްޝަންޓީމުގެ ޝަރުތުތަކަށް ތަބާވާ މަލްޓިޕްލެކްސް ސިނަމާތަކާ ޓީމުން މަޝްވަރާތައް ފަށާފައި ވާކަމަށް މަޢުލޫމާތު ލިބެއެވެ.
ކޯވިޑް-19ގެ ބަލިމަޑުކަމުގެ ތެރޭ ގިނަ ފިލްމީ ތަރިންނާއި ޕްރޮޑަކްޝަން ހައުސްތަކުން ބެލުންތެރިންގެ ސަލާމަތާއި ރައްކާތެރިކަމަށް އިސްކަންދިނުމަށް ވަރަށް ހަރުކަށިކޮށް ސިނަމާ ވިޔަފާރީގައި ހަރަކާތްތެރިވާ ފަރާތްތަކަށް އަންނަނީ ގޮވާލަމުންނެވެ. އަދި ސިނަމާ ވިޔަފާރި ކުރާ ފަރާތްތަކަށް ލިބޭ ގެއްލުންތަކުން އަރައިގަތުމަށް ގިނަ ފިލްމީތަރިން މިހާރު އެމީހުންގެ ފިލްމުތައް ސިނަމާގައި އެޅުވުމަށް ބޭނުންވާކަންވެސް ފާހަގަކޮށްލެވެ އެވެ.
ރޯހިތު ޝެއްޓީގެ ކޮޕް އެކްޝަން ފިލްމު ސީކުއަލެއް ގޮތަށް ގެނެސްދެމުން އަންނަ "ސިންގަމް" އާއި "ސިމްބާ"ގެ ފިލްމުތަކާއި ގުޅުވައިގެން ގެނެސްދޭ "ސޫރިޔަވަންޝީ" އަކީ ކަރަން ޖޯހަރްގެ ދަރްމާ ޕްރޮޑަކްޝަނާއި ރޯހިތުގެ "ރޯހިތު ޝެޓީ ޕިކްޗާޒް" އާއި އަކްޝޭގެ "ކޭޕް އޮފް ގުޑް ފިލްމްސް" އާއި ރިލަޔަންސް އެންޓަޓައިންމަންޓް ގުޅިގެން ގެނެސްދޭ ފިލްމެކެވެ. ފިލްމުގެ ޑިސްޓްރިބިއުޝަން މަސައްކަތްތައް ކުރަނީ ރިލަޔަންސް އެންޓަޓައިންމަންޓުން ނެވެ.
ކޯވިޑްގެ ސަބަބުން އިންޑިއާގައި މިދިޔަ އަހަރު މާޗް މަހުގެ 22 ގައި ލޮކްޑައުން އިއުލާންކޮށް ސިނަމާތައް ބަންދުކުރީ "ސޫރިޔަވަންޝީ" އެ މަހުގެ 24 ގައި އަޅުވަން ތައްޔާރުވަމުން ދަނިކޮށެވެ. އޭގެ ފަހުން އޭގެ ޓީމުން ވަނީ ސިނަމާތައް އަލުން ހުޅުވި އިރަކުން ފިލްމު އަޅުވާނެ ތާރީހަކާ މެދު ގޮތެއް ނިންމަން ފިލްމު ބާއްވައިފަ އެވެ.
ލީޑް ރޯލުން އަކްޝޭ ކުމާރާއި ކެޓްރީނާ ކައިފް ފެނިގެންދާ މި ފިލްމުގައި، އަކްޝޭ ފެނިގެންދާނީ ވީރު ސޫރިޔަވަންޝީ ކިޔާ ފުލުހެއްގެ ރޯލުންނެވެ. މިއީ އެކުގައި ކާމިޔާބު ފިލްމުތަކެއް ކުޅެފައިވާ މި ދެ ތަރިންގެ 11 އަހަރު ފަހުން އެކީގައި ފެނިގެންދާ ފިލްމެވެ.
View this post on Instagram
ފިލްމުގެ އިތުރު ތަރިންގެ ތެރޭގައި ޖެކީ ޝްރޮފާއި، ގުލްޝަން ގްރޯވަރާއި، އަބިމަންޔޫ ސިންގް އާއި ޖާވިދު ޖެފްރީ އާއި، ނިތިކިން ދީރް ފަދަ ތަރިން ހިމެނެ އެވެ. އަދި ފިލްމުގެ ހާއްސަ ކެމިއޯއެއްގެ ގޮތުގައި އަޖޭ ދޭވްގަން (ސިންގަމް) އާއި ރަންވީރު ސިންގް (ސިމްބާ) ވެސް ފެނިގެން ދާނެ އެވެ.
