ބޮލީވުޑްގެ މަޝްހޫރު ތަރި ތާޕްސީ ޕަންނޫ އަކީ އޮން ސްކްރީނުން އެންމެންގެ ސަމާލުކަމާއި ތައުރީފު ހޯދަމުން އަންނަ އެކްޓްރެސްއެކެވެ. ނަމަވެސް މިވީހާތަނަށް އޭނާގެ އަމިއްލަ ދިރިއުޅުމުގެ ވާހަކަ އާންމުކޮށް މާބޮޑަށް ހިއްސާކުރާ ތަރިއެއް ނޫނެވެ.
އަޑުތައް ފެތުރިފައިވާގޮތުގައި ބެޑްމިންޓަން ކުޅުންތެރިޔާ މަތިއަސް ބޮއެ އާއި ތާޕްސީ ދަނީ ޑޭޓުކުރަމުންނެވެ. މަތިއަސްއާއި ތާޕްސީ މިދިޔަ އަހަރު އެކުގައި ޗުއްޓީ ހޭދަކުރުމަށް ރާއްޖެއަށް އައިސްފައިވާއިރު، ތާޕްސީގެ ގްރޫޕް ފޮޓޯތަކުގައިވެސް މަތިއަސް ފެނެއެވެ.
އީޓައިމްސް އަށް ދިން އިންޓަވިއުއެއްގައި ތާޕްސީ އާއި މަތިއަސްގެ ރިލޭޝަންޝިޕާ ގުޅޭގޮތުން އާންމުކޮށް ވާހަކަ ނުދައްކާނަންތޯ ސުވާލުކުރުމުން ދިން ޖަވާބަކީ އޭނާ މުނިފޫހި ފިލުވުމުގެ ދާއިރާގެ މީހަކާ ޑޭޓް ނުކުރާނެ ކަމަށާއި، ސަބަބަކީ އޭނާގެ މަސައްކަތާއި އަމިއްލަ ދިރިއުޅުން އެއްކުރަންބޭނުންނުވާތީ ކަމަށެވެ. އަދި ތާޕްސީ އަބަދުވެސް އޭނާގެ ގާތް މީހުންގެ އުފަންދުވަހު އެމީހެއްގެ ފޮޓޯ ހިއްސާކުރަންކަމަށާއި މަތިއަސް އަކީވެސް އޭނާގެ އެންމެ ގާތް މީހުންގެ ތެރެއިން މީހެއްކަމަށެވެ.
އޭގެއިތުރުން ކައިވެންޏާމެދު ސުވާލުކުރުމުން ތާޕްސީ ބުނެފައިވަނީ މިހާރު އަހަރަކު 5 ފިލްމު ނުވަތަ 6 ފިލްމުގެ ކުޅޭއިރު، އޭގެބަދަލުގައި 2 ނުވަތަ 3 ފިލްމަށް މަދުކުރެވުމުން ނޫނީ އޭނާގެ އަމިއްލަ ދިރިއުޅުމާއި މެދު ނުވިސްނޭނެ ކަމަށެވެ.
ތާޕްސީގެ ފުނިޖެހިފައިވާ ޕްރޮޖެކްޓުތަކުގެ ތެރޭގައި "ހަސީން ދިލްރުބާ"، "ރަޝްމީ ރޮކެޓް"، "ޝަބާޝް މިއްތޫ"، "ރަން ލޯލާ ރަން"ގެ ރިމޭކް "ލޫޕް" އަދި އަނުރާގް ކަޝްޔަޕް ތައްޔާރުވަމުންދާ ސުޕަރ ނެޗުރަލް ފިލްމު ހިމެނެއެވެ.
