ސިނަމާތަކުގެ ވެރިންގެ އެދުމުގެމަތިން ސުޕަސްޓަރ ސަލްމާން ޚާން، އޭނާގެ އެންމެ އަވަހަށް އަޅުވަން ތައްޔާރަށް އޮތް ފިލްމު "ރާދޭ: ޔުއާ މޯސްޓް ވޯންޓެޑް ބާއި" މި އަހަރުގެ ފިތުރު ޢީދުގައި ސިނަމާތަކުގައި އަޅުވާނެކަން އިއުލާންކޮށްފި އެވެ.
އިންސްޓަގްރާމުގައި ހިއްސާކޮށްފައިވާ ޕޯސްޓެއްގައި ސަލްމާން ވަނީ ޢީދުގައި "ރާދޭ" ރިލީސްކުރާނެކަމަށް ބުނެފައެވެ. ސަލްމާން އިތުރަށް ލިޔެފައިވަނީ ފިލްމު އަޅުވާނެ ދުވަހެއް ކަނޑައެޅުމުގައި ލަސްކުރެވުނީތީ މާފަށް އެދޭކަމަށާއި ޢީދު ދުވަހު ފިލްމު އެޅުވުމަށް ނިންމި ނިންމުމަކީ މިފަދަ ދަނޑިވަޅެއްގައި ނިންމި އުނދަގޫ ނިންމުމެއް ކަމަށެވެ. ނަމަވެސް ސިނަމާތަކުގެ ވެރިންނަށް ކުރިމަތިވެފައިވާ ދަތި ހާލަތުން އަރައިގަތުމަށް "ރާދޭ" އަވަހަށް ސިނަމާއަށް ގެނައުމަށް ނިންމީކަމަށެވެ.
ނަމަވެސް މިފަދަ ހާލަތުގައި ސިނަމާތަކަށް އަންނަ އެންމެންގެ ރައްކާތެރިކަމަށް ބަލައިގެން އިންތިޒާމް ހަމަޖެއްސުމަށް ސަލްމާން ވަނީ އިލްތިމާސްކޮށްފަ އެވެ. މީގެ އިތުރަށް ސަލްމާން ލިޔެފައިވަނީ ޕޯސްޓްގައި ބުނެފައިވާ ޢީދަކީ އިރާދަކުރެއްވިއްޔާ ހަމަ 2021ގެ ޢީދުކަމަށެވެ.
View this post on Instagram
ސަލްމާނަކީ އާންމުގޮތެއްގައި އޭނާގެ ފިލްމު ޢީދާއި ދިމާކޮށް އެޅުވުމަށް އިސްކަންދޭ ތަރިއެކެވެ. އެހެންކަމުން "ރާދޭ"ގެ އިންތިޒާރުގައި ތިބި މީހުނަށް އަންނަ މޭ މަހުގެ 13 ވަނަ ދުވަހަކީ ވަަރަށްބޮޑު ޢީދަކަށް ވެގެންދާނެއެވެ.
ޕްރަބޫ ދޭވާ ޑައިރެކްޓުކޮށް، ސަލްމާން ކޯޕްރޮޑިއުސްކޮށްފައިވާ މި ފިލްމުގައި ދިޝާ ޕަޓާނީ، ޖެކީ ޝްރޮފް، ޒަރީނާ ވަހަބް އަދި ރަންދީޕް ހޫޑާ ފެނިގެންދާނެއެވެ. މި ފިލްމަކީ ސައުތު ކޮރެއަން ފިލްމު "ވެޓެރަން"ގެ ރިމޭކެއް އަދި 2009 ވަނަ އަހަރުގެ ސަލްމާންގެ ހިޓް ފިލްމް "ވޯންޓެޑް" ގެ ސީކުއަލް އެކެވެ.
