އެމެރިކާގެ ރައީސް ޑޮނަލްޓް ޓްރަމްޕްގެ ރައީސްކަމުގެ އެންމެ ފަހުދުވަހު، އެގައުމުގެ ޖަލުތަކުގައި ހައްޔަރު ކުރެވިފައިވާ އެތައްސަތޭކަ ކުއްވެރިންނަށް މަޢާމް ދެއްވުމަށް ތައްޔާރު ވެވަޑައިގެންފިއެވެ.
ޚަބަރު ލިބިފައިވާ ގޮތުގައި ޓްރަމްޕް މަޢާފް ދެއްވުމަށް ހަމަޖެހިފައިވާ ކުއްވެރިންގެ ތެރޭގައި، ނިއުޔޯކު ސިޓީގެ ކުރީގެ އެސެމްބްލީ ސްޕީކަރ ޝެލްޑޮން ސިލްވާއާއި، އެމެރިކާގެ މަޝްހޫރު ލަވަކިއުންތެރިއެއް ކަމުގައިވާ ލިލް ވައިންވެސް ހިމެނޭކަމަސް ޚަބަރު ލިބެއެވެ.
ފާއިތުވެދިޔަ އަހަރުގެ ނޮވެމްބަރ މަހުގެ 3 ވަނަ ދުވަހު ބޭއްވުނު އެމެރިކާގެ ރިޔާސީ އިންތިޚާބުހައި ވާދަ ކުރައްވާ، ބޮޑު ތަފާތަކުން ޓްރަމަށްޕަށް ވަނީ ނާކާމިޔާބީއާ ކުރިމަތިލާން ޖެހިފައެވެ. އެހެންނަމަވެސް، އިންތިޚާބުގައި މަކަރުހަދާ އޮޅުވާލުންތަކެއް އޮޅުވާލާފައިވާ ކަމުގެ ތުހުމަތުތައްކޮށް، ނަތީޖާ ބަލައިގަތުމަށް ޓްރަމްޕް ދިޔައީ ދެކޮޅު ހައްދަވަމުންނެވެ.
އިންތިޚާބުގެ ނަތީޖާއާމެދު ހިންހަމަ ޖެހިވަޑައިގެން، އެމެރިކާގެ ގާނޫނުހަދާ މަޖިލިސް ކައިރީގައި، ގާނޫނު ހަދާމަޖިލިހުން ޖޯ ބައިޑްގެ އިލެކްޓޯރަލް ނަތީޖާއަށް ރުހުންދޭން އޮތްދުވަހު، ޓްރަމްޕަށް ތާއީދުކުރާ ފަރާތްތަކުން މުޒާހިރާކުރުމަށް އޭނާވަނީ ހިތްވަރު ދެއްވާފައެވެ. އަދި އެދުވަހު، ޓްރަމަޕަށް ތާއީދުކުރާ ފަރާތްތަކުން އެމެރިކާގެ ގާނޫނު ހަދާމަޖިލިހަށް ވަދެ، ހިންގި ހަމަނުޖެހުންތަކާ ގުޅިގެން، އެމެރިކާގެ ހައުސް އޮފް ރެޕްރެސެންޓޭޓިވްސްއިން ވަނީ ދެވަރަފަހަރަށް ޓްރަމްޕް އިމްޕީޗް ކޮށްފައެވެ. ގާނޫނު ހަދާ މަޖިލިހުގެ ތިރިގޭގެ މި ނިންމުމާއެކު، ޓްރަމްޕް ވެވަޑައިގެންފައިވަނީ، މުޅި އެމެރިކާގެ ތާރީޚުގައިވެސް، ދެފަހަރަށް އިމްޕީޗްކުރެވުނު ހަމައެކަނި ރައީސްކަމުގައެވެ.
މިމަހުގެ 20 ވަނަދުވަހު، މަގާމުގެ މުއްދަތު ހަމަކުރައްވާ، އެމެރިކާގެ ރައީސްކަމުން ޓްރަމްޕް ދުރަށް ވަޑައިގަތުމަށް ހަމަޖެހިފައިވާއިރު، ފާއިތުވެދިޔަ ޑިސެމްބަރު މަހުވެސް ޓްރަމަޕްވަނީ އެމެރިކާގެ ޖަލުތަކުގައި ހުކުމްތަންފީޒު ކުރަމުންދިޔަ ކުއްވެރިންތަކަކަށް މާފްދެއްވާފައެވެ. މީގެތެރޭގައި، 2007 ވަނަ އަހަރު އިރާގުގައި، 14 މީހުން މަރާލުމުގެ ކުށުގައި އެމެރިކާގައި ޖަލަށް ލާފައިވާ ކުއްވެރިންތަކެއްވެސް ހިމެނެއެވެ. އެމެރިކާގެ ރައީސް ޑޮނަލްޑް ޓްރަމްޕްގެ މި މާފް ދެއްވުމުން، އެތައް ބައެއްގެ ނުރުހުން އޭނާއަށް އަމާޒު ވެގެން ދިޔައެވެ.
އަދި މީގެއިތުރުން ދައުރު ނިމިގެންދިއުމުގެ ކުރިން ޓްރަމްޕްވަނީ އޭނާގެ ދަނބި ދަރުކަލުންގެ ބައްޕައަށްވެސް މާފް ދެެއްވާފައެވެ.
އެމެރިކާގެ ރިޔާސީ އިންތިޚާބު ކާމިޔާބު ކުރެއްވި ޖޯބައިޑްން ރައީސްކަމުގެ ހުވާކުރެއްވުމަށް ހަމަޖެހިފައިވަނީ މިމަހުގެ 20 ވަނަ ދުވައެވެ. އަދި އެހެން އަހަރުތަކާ ޚިލާފަށް، މިއަހަރު މި ރަސްމިއްޔާތު އޮންނަ ސަރަހައްދުގެ ސަލާމަތާ ރައްކާތެރިކަމަށްޓަކާ ވަނީ ސަލާމަތީ އެތަކެއް ފިޔަވަޅުތަކެއް އަޅާފައެވެ. މިގޮތުން، މިހާރު މުޅި ދުނިޔެއަށް ފެތިގައިވާ ކޯވިޑް19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން މިއަރުގެ މިރަސްމިއްޔާތު ޓީވީ މެދިވެރިކޮށް، ގޭގައި ތިއްބަވައިގެން ބެލުމަށްވެސް އެމެރިކާގެ ސިއްޙީ މާހިރުން ދަނީ ގޮވާލައްވަމުންނެވެ.
ޖޯބައިޑްން ރައީސްކަމުގެ ހުވާކުރެއްވުމަށްފަހު، އެންމެ ފުރަތަމަ ދުވަހުވެސް، ޓްރަމްޕްގެ ވެރިކަމުގައި ނިންމަވާފައިވާ ބޮޑެތި ބައެއް މުހިންމު ނިންމެވުންތަކަށް ބަދަލު ގެންނެވުމަށް ވަނީ ހަމަޖެހިފައެވެ. މީގެތެރޭގައި އެގައުމަށް މުސްލިމް ބައެއް ގައުމުތަކުގެ ރައްޔިތުންނަށް އެތެރެ ނުވެވޭގޮތަށް ނިންމަވާފައިވާ ނިންމެވުން ބާތިކުރެއްވުންވެސް ހިމެނެއެވެ.
