ކައުންސިލްތަކުގެ މުދަލާއި ވަސީލަތްތައް ވަކި ސިޔާސީ ފިކުރެއް ކުރިއަރުވަން ބޭނުންކުރުމަކީ ލާމަރުކަޒީ ގާނޫނާ ޚިލާފު ކަމެއް ކަމަށް ބުނެ، އެފަދަ ހަރަކާތްތަކުން ދުރުހެލިވުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އިލްތިމާސްކޮށްފި އެވެ.
މި އިލްތިމާސް ކޮށްފައިވަނީ، އިދިކޮޅު އެމްޑީޕީގެ ފަސްވަނަ ކޮންގްރެސް ބޭއްވުމަށް މާލެ ސިޓީ ކައުންސިލްގެ އާއްމު ޚިދުމަތްތަކާ ބެހޭ ބައި ދީފައިވާ ހާލަތުގައި، އެލްޖީއޭގެ ސީއީއޯ މުޙައްމަދު ނިމާލް ސޮއިކުރައްވައި ސިޓީ އަދި ރަށު ކައުންސިލްތަކުގެ ރައީސުންނަށް ފޮނުއްވި ސިޓީއަކުންނެވެ.
ސިޓީގައި ބުނެފައިވާ ގޮތުން، ކައުންސިލްތަކުގެ ބެލުމުގެ ދަށުގައިވާ މުދާ ބޭނުންކުރަން ޖެހޭނީ ގާނޫނުން ކައުންސިލްތަކަށް ކަނޑައަޅާފައިވާ ޒިންމާތައް އަދާކުރުމަށް ކަމަށާއި، އެ ބޭނުން ކުރުމުގައި މީހުންގެ ސިޔާސީ ކުލައަކަށް ނުވަތަ އާއިލާއަކަށް ނުބަލާ ހަމަހަމަ އުސޫލު ގެންގުޅެން ޖެހޭނެ އެވެ. ރައްޔިތުން ޚިދުމަތް ހޯދަން އަންނަ ކައުންސިލް އިދާރާތަކުގައި ސިޔާސީ ހަރަކާތްތައް ހިންގުމުން ރައްޔިތުންނަށް ނުތަނަވަސްކަން ލިބި، ލާމަރުކަޒީ ނިޒާމަށް ރައްޔިތުންގެ ކިބައިގައިވާ އިތުބާރު ގެއްލިދާނެ ކަމަށް ވެސް އެލްޖީއޭއިން ފާހަގަކޮށްފައިވެ އެވެ. އަދި އެފަދަ އަމަލުތަކަކީ ކައުންސިލަރުންގެ ސުލޫކީ މިންގަނޑާ ޚިލާފު ކަންކަމެވެ.
ބުރާސްފަތި ރޭ ފެށި އެމްޑީޕީގެ ކޮންގްރެސް ނިމުނީ ހޮނިހިރު ރޭގަ އެވެ. ކޮންގްރެހަށް ސަރުކާރުގެ އިމާރާތެއް ހޯދައިދިނުމަށް އެދުނު ނަމަވެސް، އެހެން ތަނެއް ނުލިބުމުން ކައުންސިލްގެ އިމާރާތުގައި ކޮންގްރެސް ބޭއްވީ ކަމަށް އެމްޑީޕީން ބުނެފައިވެ އެވެ.
ކޮމެންޓު ފޮނުވާ