އެމްޑީޕީގެ އަސާސީ ގަވާއިދަށް ގެނައި އިސްލާހަކާ އެކު، ޕާޓީގެ ރައީސާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް ލީޑަރަކަށް ޗެއާޕާސަން ހަދައިފި އެވެ.
މި ބަދަލު ފާސްވީ މާލޭ ސިޓީ ކައުންސިލުގެ ހޯލުގައި ބޭއްވި ޕާޓީގެ ކޮންގްރެސްގައި ބައިވެރިވި މަންދޫބުންގެ ގިނަ ބަޔަކު ތާއީދު ކުރުމުންނެވެ. އިސްލާހުތައް ހުށަހެޅުއްވީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލެވެ.
އާ ގަވާއިދުގެ ދަށުން ޗެއާޕާސަނަށް ފަހު ދެން އިސްވާނީ ނައިބު ޗެއާޕާސަނުންނެވެ. ޕާޓީ ހިންގުމުގެ ފުރިހަމަ ޒިންމާ ވެސް ހަވާލުވެފައި ވާނީ މި ބޭފުޅުންނާ އެވެ.
މި އިސްލާހު ފާސްވުމާއެކު ޕާޓީގެ ރައީސްކަމާއި ނައިބު ރައީސްކަމުގެ މަގާމްވަނީ އުވިފައެވެ. ވާދަވެރިއަކު ނެތި އެމްޑީޕީގެ ރައީސްކަމަށް ހޮވިވަޑައިގެންނެވި ކުރީގެ ފޮރިން މިނިސްޓަރު އަބްދުﷲ ޝާހިދު، ޕާޓީގެ ރިޔާސީ ޕްރައިމަރީއަށް ވާދަކުރެއްވުމަށް އިސްތިއުފާ ދެއްވުމުން ރައީސްގެ މަގާމު ހުސްވި އިރު، ނައިބު ރައީސް ހިސާން ހުސެއިން ވެސް އެ ކެމްޕެއިންގައި ބައިވެރިވުމަށް މަގާމުން އިސްތިއުފާ ދެއްވި އެވެ.
ކޮމެންޓު ފޮނުވާ