ރަސްމާލޭގައި އީގަލް ހިލްސް ކުންފުނިން ހިންގަން ނިންމާފައިވާ 20 ބިލިއަން ޑޮލަރުގެ މަޝްރޫޢާ މެދު އިދިކޮޅު ފަރާތްތަކުން ކަންބޮޑުވުން ފާޅުކުރަނީ ރައްޔިތުންގެ ސަމާލުކަން ހޯދުމުގެ ބޭނުމުގައި ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ދައުލަތުގެ މީޑިއާއާ ވާހަކަ ދައްކަވަމުން މިނިސްޓަރު ވިދާޅުވީ، ޔޫއޭއީގެ މި ކުންފުންޏަށް ރަސްމާލެއިން 500 ހެކްޓަރުގެ ބިން ކުއްޔަށް ދީގެން ވޯޓަރފްރަންޓާއި މެރީނާއެއް ތަރައްޤީކުރުމަކީ ރާއްޖޭގެ ޓޫރިޒަމް ޤާނޫނުތަކާއި ގަވާއިދުތަކަށް ބަލާއިރު އާ ކަމެއް ނޫން ކަމަށެވެ. މި މަޝްރޫޢުގެ އަމާޒަކީ ފައިދާހުރި، ދެމެހެއްޓެނިވި ރިއަލް އެސްޓޭޓް މާކެޓެއް ބިނާކުރުން ކަމަށް ވެސް މުއްތަލިބު ވިދާޅުވި އެވެ.
މިނިސްޓަރު ވިދާޅުވީ ރަސްމާލޭގެ ޕްރޮޕަޓީއެއް ގަނެވޭނީ އަދި އެހެން ފަރާތަކަށް ބަދަލުކުރެވޭނީ ސަރުކާރުގެ ހުއްދަ ލިބޭ ފަރާތްތަކަށް ކަމަށާއި، އެހެންކަމުން ބިމުގެ މައްޗަށް ދައުލަތަށް ހުރި ބާރާއި ކޮންޓްރޯލް އެއްވެސް ވަގުތެއްގައި ގެއްލިގެން ނުދާނެ ކަމަށެވެ.
މިހާތަނަށް ސޮއިކޮށްފައިވާ ކޮމާޝަލް ޓާމްސްގައި ރާއްޖޭގެ ސިޔާދަތާއި މިނިވަންކަމަށް ބުރޫއަރާ އެއްވެސް ކަމެއް ނެތް ކަމަށް ވިދާޅުވި މިނިސްޓަރު، ޑެފިނިޓިވް އެގްރީމެންޓުގައި ސޮއިކުރާއިރު ވެސް މި ހުރިހާ ކަމަކަށް ރިޢާޔަތްކުރެވޭނެ ކަމުގެ ޔަޤީންކަން ދެއްވި އެވެ.
ކޮމެންޓު ފޮނުވާ