ދިވެހި މުޖުތަމައުގެ އިޖުތިމާއީ މިންގަނޑުތަކާ ހިލާފަށް ނިވާކަން ކުޑަ ހެދުން އަޅައިގެން އާންމު ތަންތަނުގައި ހިނގާބިނގާ އުޅޭ ބިދޭސީންނާ މެދު ގާނޫނީ ފިޔަވަޅު އަޅާނެ ކަމަށް ފުލުހުން ބުނެފި އެވެ.
މިއަދު ނެރުނު ބަޔާނެއްގައި ފުލުހުން ބުނީ، ރާއްޖޭގައި ދިރިއުޅޭ ބައެއް ބިދޭސީން މަގުމަތީގައްޔާއި އެހެނިހެން އާންމު ތަންތަނުގައި މިފަދަ ހެދުމުގައި އުޅޭކަން ފާހަގަކުރެވެމުން ދާ ކަމަށެވެ.
މިފަދަ އަމަލުތަކުގެ ސަބަބުން އާންމު އަމާންކަމާއި ނިޒާމަށް ނުރައްކާ ކުރިމަތިވެދާނެ ކަމަށާއި، އެފަދަ ހާލަތެއް ދިމާވުމުގެ ކުރިން ފިޔަވަޅު އެޅުމަކީ ފުލުހުންގެ ޒިންމާއެއް ކަމަށް ބަޔާނުގައި ބުނެފައިވެ އެވެ. ދިވެހި އަހުލާގީ މިންގަނޑުތައް ދަމަހައްޓުމަކީ ރާއްޖޭގައި ދިރިއުޅޭ ކޮންމެ މީހެއްގެ މަސްއޫލިއްޔަތެއް ކަމަށްވެސް ފުލުހުން ހަނދާންކޮށްދީފައިވެ އެވެ.
ފަތުރުވެރިންނަށް ހާއްސަކޮށް ކަނޑައަޅާފައިވާ ސަރަހައްދުތަކުން ބޭރުގައި، ފަތުރުވެރިން ހެދުން އަޅަނީ މުޖުތަމައުގެ މިންގަނޑާ އެއްގޮތަށްކަން ކަށަވަރުކުރުމަށް ފަތުރުވެރިކަމުގެ ހިދުމަތްދޭ ފަރާތްތަކަށް ފުލުހުން ވަނީ އިލްތިމާސްކޮށްފަ އެވެ.
ކޮމެންޓު ފޮނުވާ