ޔޫއޭއީގެ އީގަލް ހިލްސް ކުންފުނިން ރަސްމާލޭގައި ހިންގަން ރާވާފައިވާ 20 ބިލިއަން ޑޮލަރުގެ މަޝްރޫއު އައްޑޫ ސިޓީއަށް ގެނައުމުގެ ހިޔާލު އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ފާޅުކުރައްވައިފި އެވެ.
އެމްޑީޕީ ކޮންގްރެސްގެ ބައެއްގެ ގޮތުގައި ބޭއްވި އިންވެސްޓްމަންޓް ފޯރަމްގައި ނަޝީދު ވަނީ، އީގަލް ހިލްސްއިން މި މަޝްރޫއު އައްޑުއަށް ގެންނަން އެއްބަސްވެއްޖެނަމަ ސިޓީ ކައުންސިލާއި އައްޑޫ ރައްޔިތުންގެ ހިޔާލަކީ ކޮބައިތޯ މޭޔަރު އަލީ ނިޒާރާ ސުވާލުކުރައްވާފަ އެވެ.
އޭގެ ޖަވާބުގައި ނިޒާރު ވިދާޅުވީ، މިހާރު ރާވާފައިވާ ގޮތަށް މި މަޝްރޫއު އައްޑުއަށް ބޭނުމެއް ނުވި ނަމަވެސް، ހާމަކަމާއެކު ރައްޔިތުންނަށް އެނގޭ ގޮތަށް ކުރިއަށް ގެންދާނަމަ އައްޑޫއިން އެކަމަށް މަރުހަބާ ކިޔާނެ ކަމަށެވެ. އެފަދަ ބޮޑެތި މަޝްރޫއުތައް އައްޑުއަށް ބޭނުންވާ ނަމަވެސް، އެ ކަންކަން ކުރަންވާނީ ރައްޔިތުން ގަބޫލުކުރާ ގޮތަކަށް ކަމަށް ވެސް އޭނާ ވިދާޅުވި އެވެ.
މި މަޝްރޫއު އައްޑުއަށް ގެނައުމަށް އެމްޑީޕީން ކުންފުނިއާ ލޮބީ ކުރުމަށް ކައުންސިލުން ހުރަހެއް ނުއަޅާނެ ކަމަށް ނިޒާރު ވިދާޅުވުމުން، ނަޝީދު ވިދާޅުވީ އިރާދަކުރެއްވިއްޔާ އީގަލް ހިލްސް އައްޑުއަށް އަންނާނެ ކަމަށެވެ.
ރަސްމާލޭގައި ވޯޓަރފްރަންޓާއި މެރީނާއެއް ތަރައްގީކުރުމަށް 500 ހެކްޓަރުގެ ބިން އީގަލް ހިލްސްއަށް ކުއްޔަށް ދޭން ސަރުކާރުން ވަނީ ނިންމާފަ އެވެ. ނަމަވެސް މި އެއްބަސްވުމާ މެދު ރާއްޖޭގެ ބައެއް ސިޔާސީ ފަރާތްތަކުން ކަންބޮޑުވުން ފާޅުކުރަމުން އަންނަ ކަމަށް ވެސް ބުނެ އެވެ.
ކޮމެންޓު ފޮނުވާ