ވެރިކަމުގެ ނިޒާމާއި ގާނޫނުއަސާސީއަށް ބޮޑެތި ބަދަލުތަކެއް ގެނައުމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ހުށަހެޅުއްވި "ބޮޑު ބަދަލު" ސިޔާސަތު، ޕާޓީގެ ކޮންގްރެސްއިން ފާސްކޮށްފި އެވެ.
ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ތާއީދު ކުރެއްވި މި ސިޔާސަތަށް، ކޮންގްރެސްއަށް ހާޒިރުވި 563 މަންދޫބުންގެ ތެރެއިން 520 މީހުން ވޯޓު ދިނެވެ.
ސިޔާސަތުގެ އެންމެ މުހިންމު ބަދަލަކީ ދައުލަތުގެ ވެރިޔާއާއި ސަރުކާރުގެ ވެރިޔާ ދެ ވަކި މަގާމަކަށް ހެދުމެވެ. އެގޮތުން ރައީސުލްޖުމްހޫރިއްޔާ ވާނީ ސިޔާސީ ކަންކަމާ ދުރުގައި ހުންނަ ދައުލަތުގެ ވެރިޔާ ކަމުގައި ކަމަށާއި، އެ ބޭފުޅަކު އައްޔަންކުރާނީ ކައުންސިލުތަކާއި މަޖިލީހުން ގުޅިގެން ކަމަށް ފައްޔާޒް ވަނީ ކުރިން ވިދާޅުވެފަ އެވެ. ސަރުކާރުގެ ވެރިޔާ މަޖިލީހަށް ޖަވާބުދާރީ ވާނެ އެވެ.
މީގެ އިތުރުން މިނިވަން މުއައްސަސާތައް ބެލުމަށް އޯވަސައިޓް ކޮމިޝަނެއް އުފެއްދުމާއި، އާންމު ވޯޓަކުން ސުޕްރީމް ކޯޓުގެ ފަނޑިޔާރުން ވަކިކުރެވޭ ގޮތް ހެދުމާއި، މަޖިލިސް މެންބަރުންނާއި ދައުލަތުގެ ވެރިޔާ ވަކިކުރުމުގެ ބާރު ރައްޔިތުންނަށް ދިނުމާއި، ރެފަރެންޑަމްތައް އިތުރުކުރުން ވެސް ސިޔާސަތުގައި ހިމެނެ އެވެ. މަޖިލީހުގެ ގޮނޑިތަކުގެ އަދަދު ކަނޑައެޅުމާއި، އަންހެނުންނަށް މަޖިލީހުގައި ފުރުސަތު ފަހިކޮށްދިނުމާއި، ގުދުރަތީ ވަސީލަތްތަކުގެ އިސްރާފު ހުއްޓުވުން ވެސް ހުށަހެޅުންތަކުގެ ތެރޭގައި ވެ އެވެ.
މިހާރުގެ ނިޒާމުގައި ސަރުކާރު ޖަވާބުދާރީ ކުރުވުމުގެ ފުރުސަތު ނެތް ކަމަށާއި، މަޖިލީހުގެ ގިނަ ގޮނޑިތައް ވެރިކަމުގެ ޕާޓީއަށް ލިބުމުން ޗެކް އެންޑް ބެލެންސް ގެއްލި ޝަރީއަތް ވެސް ކޮންޓްރޯލް ކުރެވޭ ކަމަށް ފައްޔާޒް ވަނީ ފާހަގަކުރައްވާފަ އެވެ.
ކޮމެންޓު ފޮނުވާ