ފްލައިދުބާއީގެ ފްލައިޓެއްގައި ކޯ-ޕައިލެޓަކު ކެޕްޓަނަށް ހަމަލާދީފައިވަނީ ކޮކްޕިޓްގައި ބަހައްޓާ ކްރޭޝް އޭކްސް ބޭނުންކޮށްގެން ކަމަށާއި، އެއީ ޓެރަރިސްޓް އަމަލެއް ހިންގުމުގެ މަސައްކަތެއް ކަމަށް ޔޫއޭއީގެ ޕްރޮސެކިއުޓާ ޖެނެރަލް ހަމަދު ސައިފް އަލް ޝަމްސީ ވިދާޅުވެއްޖެ އެވެ.
ޔޫއޭއީގެ ދައުލަތުގެ މީޑިއާ ވާމް އިން ހޮނިހިރު ދުވަހު ރިޕޯޓުކުރި ގޮތުގައި، ބުދަ ދުވަހު 174 މީހުންނާއެކު ދުބާއީން ތެލް އަވީވަށް ދަތުރުކުރި އެފްޒެޑް1073 ގައި ކޯ-ޕައިލެޓް މަސައްކަތްކުރީ ބޯޓުގެ ކޮންޓްރޯލް ނެގުމަށެވެ. ނަން ހާމަނުކުރާ ކޯ-ޕައިލެޓްގެ ހަމަލާގައި އިންޑިއާގެ ޕައިލެޓެއް ކަމަށްވާ ސްމިތު މަޗާރަ ޒަޚަމްވި އެވެ.
ހަމަލާއާއެކު ބޯޓު ކޮންޓްރޯލުން ނެއްޓި، ކުރު ވަގުތުކޮޅެއްގެ ތެރޭގައި ގާތްގަނޑަކަށް 17,000 ފޫޓު ތިރިވި އެވެ. ނަމަވެސް ބޯޓުގައި ތިބި އިތުރު ދެ ޕައިލެޓުން ކޮންޓްރޯލް އަނބުރާ ހޯދުމަށްފަހު، ސައުދީ އަރަބިއްޔާގެ ތަބޫކްގައި ހުންނަ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ބޯޓު ކުއްލިއަކަށް ޖެއްސި އެވެ.
ހާދިސާގެ ސަބަބުތަކާއި ފަހަތުގައިވާ މަގުސަދު ދެނެގަތުމަށް ތަހުގީގު ކުރިއަށްދާއިރު، ފިޒިކަލް އަދި ޑިޖިޓަލް ހެކިތައް ދިރާސާކުރަމުންދާ ކަމަށާއި، ގާނޫނީ އިޖުރާއަތުތައް ނިމުމުން ތަހުގީގުގެ ނަތީޖާ އާންމުކުރާނެ ކަމަށް އަލް ޝަމްސީ ވިދާޅުވި އެވެ.
ކްރޭޝް އޭކްސް އަކީ ކުއްލި ހާލަތެއްގައި ބޯޓުން ނުކުމެވޭނެ ގޮތް ހެދުމަށް ކޮކްޕިޓްގައި ބަހައްޓާ ކޯރާޑިއެކެވެ.
ކޮމެންޓު ފޮނުވާ