ބޭރުގެ ޓުއާ އޮޕަރޭޓަރުންގެ އަތުން ޓީޖީއެސްޓީ ނެގުމަށް ގެނެވުނު ބަދަލުތަކާ ގުޅިގެން ފަތުރުވެރިކަމުގެ ދާއިރާއިން ފާޅުކުރި ކަންބޮޑުވުންތަކަށް ބަލައި، ޓީޖީއެސްޓީ ޤާނޫނަށް އަވަސް އިސްލާޙުތަކެއް ގެނައުމަށް ރައީސް ޑރ. މުޙައްމަދު މުޢިއްޒު ނިންމަވައިފި އެވެ.
މި ނިންމެވުން ހާމަކުރެއްވީ ފަތުރުވެރިކަމުގެ ވަޒީރު މުޙައްމަދު އަމީން، ޤައުމީ ފަތުރުވެރިކަމުގެ ދުވަހުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ، ފާއިތުވި ދެ މަހުގެ ތެރޭގައި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމާ ގުޅޭ ބައިތަކެއް ޤާނޫނަށް އިތުރުކުރުމާ ގުޅިގެން ޓްރެވަލް އެޖެންޓުންނާއި ދާއިރާގެ އިސް ފަރާތްތަކުން ބޮޑެތި ކަންބޮޑުވުންތަކެއް ފާޅުކޮށްފައިވާ ކަމަށެވެ.
އެ ކަންބޮޑުވުންތަކުގެ ގިނަ ބައެއް ގުޅިފައިވަނީ ޤާނޫނުގައި ކަނޑައަޅާފައިވާ މުއްދަތުތަކާ ކަމަށާއި، މި މައްސަލަތަކާ ބެހޭ ގޮތުން އިންޑަސްޓްރީގެ ގިނަ ފަރާތްތަކުން ރައީސްގެ އަރިހަށް ހުށަހެޅުންތައް ފޮނުއްވާފައިވާ ކަމަށް އަމީން ވިދާޅުވި އެވެ.
ޤާނޫނުގެ ދަށުން ބޭރުގެ ޓުއާ އޮޕަރޭޓަރުންގެ އަތުން ޓީޖީއެސްޓީ ނަގަން ފެށުމުން، ދައުލަތުގެ އާމްދަނީއަށް އަހަރަކު ގާތްގަނޑަކަށް 1.61 ބިލިއަން ރުފިޔާ އިތުރުވާނެ ކަމަށް ލަފާކުރެވެ.
ކޮމެންޓު ފޮނުވާ