ކާމިޔާބު އެކްޓަރ ޝާހިދު ކަޕޫރުގެ، ދެން އެންމެ އަވަހަށް ބެލުންތެރިންނަށް ފެންނާނެ ފިލްމު "ޖާޒީ" މިއަހަރުގެ ނޮވެމްބަރު 5 ގައި އަޅުވަން ނިންމައިފި އެވެ.
މިކަން އިއުލާންކުރުމަށް ޝާހިދު ކުރި އިންސްޓަގްރާމް ޕޯސްޓެއްގައި ބުނެފައިވަނީ މި ފިލްމު މިއަހަރުގެ ދިވާލީގެތެރޭ، ނޮވެމްބަރު މަހުގެ 5 ވަނަ ދުވަހު ސިނަމާތަކުގައި އަޅުވާނެކަމަށެވެ. މި ފިލްމު އޮންލައިން ޕްލެޓްފޯމެއްގައި އަޅުވާނެކަމަށް ކުރިން ބެލެވިފައި އޮތް ނަމަވެސް، މިހާރު ފިލްމުގެ ޕްރޮޑަކްޝަން ޓީމުން ވަނީ ސިނަމާގައި ފިލްމު ރިލީޒްކުރުމަށް ނިންމާފައެވެ.
View this post on Instagram
ޝާހިދުގެ "ޖާޒީ" މި ފިލްމަކީ 2019 ވަނަ އަހަރު ހަމަ އެ ނަމުގައި ގެނެސްދިން ތެލެގޫ ފިލްމުގެ ރިމޭކެކެވެ. ތެލަގޫ ފިލްމު ވެސް ޑައިރެކްޓްކުރި ގޯތަމް ތިއްނަނޫރީ ޑައިރެކްޓްކޮށްފައިވާ މި ފިލްމުގައި ޝާހިދު ފެންނާނީ އުމުރުން 30 އަހަރުން މަތިވުމުންވެސް އަލުން ކުޅުމަށް އެނބުރިއަންނަ ކްރިކެޓް ކުޅުންތެރިއެއްގެ ރޯލުންނެވެ.
ޝާހިދުގެ އިތުރުން ފިލްމުގައި އޭނާގެ ބައްޕަ ޕަންކަޖް ކަޕޫރާއި މުރްނާލް ޓާކޫރް ވެސް ފެނިގެންދާނެއެވެ. ޗަންދީގަޅާއި ދެހެރާދުންގައި ކުރިއަށްގެންދިޔަ މި ފިލްމުގެ ޝޫޓިންގ ނިންމާލީ ކޯވިޑްގެ ސަބަބުން ޝޫޓިންގ މެދުކަނޑާލުމަށްފަހު ޝޫޓިންގ ފެށިތާ 47 ދުވަސް ތެރޭގައެވެ.
2019 ވަނަ އަހަރު ޝޫޓިން ފަށައި، ކޯވިޑްގެ ސަބަބުން މިދިޔަ އަހަރު މެދުތެރޭ ޝޫޓިންގ މެދުކަނޑާލި މި ފިލްމުގެ ހުރިހާ މަންޒަރެއް ނަގާ ނިންމާލާފައި ވަނީ ޑިސެމްބަރު މަހު އެވެ.
ޝާހިދު އެންމެ ފަހުން ފެނިގެންދިޔަ ކާމިޔާބު ފިލްމު "ކަބީރު ސިންގް" އަކީވެސް ތެލެގޫ ފިލްމެއް ކަމަށްވާ "އަރުޖުން ރެޑީ" ގެ ރިމޭކެކެވެ.
