ދުބާއީން ތެލް އަވީވަށް ދަތުރުކުރަމުން ދިޔަ ފްލައިދުބާއީގެ ބޯޓެއް، ކޮކްޕިޓްގައި ދެ ޕައިލެޓުންގެ މެދުގައި ޖެހުނު ދެބަސްވުމަކާ ގުޅިގެން ސައުދީ އަރަބިއްޔާގެ ތަބޫކަށް ކުއްލިއަކަށް ޖައްސައިފި އެވެ.
FZ1073 ފްލައިޓުން ދަތުރުގެ މެދުތެރޭގައި ނުރައްކަލުގެ ސިގްނަލެއް ފޮނުވުމުން، ބޯޓު ހައިޖެކްކުރެވިފައިވާ ކަމަށް ބަލައި އިޒްރޭލުން ވަގުތުން ހަނގުރާމަ ބޯޓުތައް ފޮނުވި އެވެ. ބޯޓުގައި ގިނަ އިޒްރޭލު ރައްޔިތުން ދަތުރުކުރަމުން ދިޔަ ނަމަވެސް، ބޯޓު ސަލާމަތުން ޖައްސާލެވުނު ކަމަށާއި އެއްވެސް މީހަކަށް އަނިޔާއެއް ނުވާ ކަމަށް އޮފިޝަލުން ބުނެއެވެ.
ކޮކްޕިޓުން ހަޅޭއްލަވާ އަޑު އިވުނު ކަމަށާއި، ބޯޓު ޖައްސާލުމުގެ ކުރިން ކުއްލިއަކަށް ތިރިއަށް ދިޔަ ކަމަށް ފަސިންޖަރުން ބުނެއެވެ. ބޯޓު ޖެއްސުމާއެކު ސައުދީގެ ސަލާމަތީ ބާރުތަކުން ބޯޓު ވަށާލި އިރު، ފަސިންޖަރުން އެއްކޮޅު ވަގުތެއް ބޯޓުގައި ތިބެން ޖެހުނެވެ.
ދެބަސްވުމުގެ ސަބަބު އަދި ސާފެއް ނުވެ އެވެ. ހާލަތު ކޮންޓްރޯލްކުރެވިފައިވާ ކަމަށާއި ފަސިންޖަރުން ގައުމަށް ގެނައުމުގެ މަސައްކަތް ކުރަމުންދާ ކަމަށް ނަތަންޔާހޫގެ އޮފީހުން ބުނެއެވެ. ހާދިސާ ކަށަވަރުކޮށްދީފައިވާ ފްލައިދުބާއީން ބުނީ، ކަމާބެހޭ ފަރާތްތަކާއެކު މިކަން ތަހުގީގުކުރަމުންދާ ކަމަށެވެ.
ޕައިލެޓުން ކޮކްޕިޓްގައި ޒުވާބުކުރުމަކީ ކަނޑައެޅިގެން މަދުން ހިނގާ ކަމެއް ނަމަވެސް، 2022 ވަނަ އަހަރު އެއާ ފްރާންސްގެ ދެ ޕައިލެޓަކު ވެސް ކޮކްޕިޓްގައި ތަޅާފޮޅުމުން ވަޒީފާއިން ސަސްޕެންޑްކޮށްފައިވެ އެވެ.
ކޮމެންޓު ފޮނުވާ