އެއާބަސް ކުންފުންޏާ ގުޅުންހުރި މަނީ ލޯންޑަރިންގެ މައްސަލައެއްގައި ބަންދުކޮށްފައި ހުރި، ސްރީލަންކާގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން، ޕާލަމެންޓް މެންބަރު ނަމާލް ރާޖަޕަކްސަ، ކޮލަމްބޯ ފޯޓް މެޖިސްޓްރޭޓް ކޯޓުން މިއަދު ކަފާލާތުގެ ދަށުން ދޫކޮށްލައިފިއެވެ.
މެޖިސްޓްރޭޓް ޕަސަން އަމަރަސޭނަ ނިންމެވި ގޮތުގައި، ނަމާލް ދޫކޮށްލީ 500،000 ރުޕީސްގެ ނަގުދު ކަފާލާތަކާއި، ކޮންމެ މީހަކު 100 މިލިއަން ރުޕީސްގެ ޝުއަރިޓީ ބެއިލް ހުށަހަޅާ ދެ ޖާމިނެއްގެ ދަށުންނެވެ.
ކޯޓުން ވަނީ ނަމާލް ގައުމުން ބޭރަށް ފުރުން މަނާކޮށް، އެ އަމުރު އިމިގްރޭޝަނަށް އަންގާފައެވެ. އަދި ހެކިންނަށް ނުފޫޒު ފޯރުވުމާއި ބިރުދެއްކުމުން ދުރުހެލުމަށް އަންގައި، މި ޝަރުތުތަކާ ހިލާފުވެއްޖެނަމަ ކަފާލާތު ބާތިލުކޮށް އަލުން ބަންދުކުރެވިދާނެ ކަމަށް ކޯޓުން އިންޒާރުދީފައިވެއެވެ.
ކަފާލާތު ލިބުނު ނަމަވެސް، މައްސަލައިގެ ތަހުގީގު ކުރިއަށްދާނެއެވެ. ފައިސާ ދައުރުވި ގޮތާއި އެ ފައިސާ ލިބުނު ފަރާތްތައް ދެނެގަތުމަށް ކުރަމުންދާ ތަހުގީގު ނިމުމުން، ދައުވާކުރުމަށް މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވޭނެއެވެ. އެސްއެލްޕީޕީގެ ނޭޝަނަލް އޯގަނައިޒަރު ނަމާލް ބަންދުކުރުމަކީ ލަންކާގެ ސިޔާސީ ދާއިރާގައި ބޮޑު ސަމާލުކަމެއް ލިބުނު ކަމެކެވެ.
ކޮމެންޓު ފޮނުވާ