އަމީނީ މަގުގައި އަލުން ތާރު އެޅި ސަރަހައްދުގެ ބައެއް އަންނަ އާދިއްތަ ދުވަހު އާންމުންނަށް ހުޅުވާލާނެ ކަމަށް ހައުސިން މިނިސްޓްރީން ބުނެފިއެވެ.
މިނިސްޓްރީން ބުނީ، ހުޅުވާލާނީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ފުރަތަމަ ސެގްމަންޓު ކަމަށެވެ. ދިވެހިރާއްޖޭގެ އަޑު ކުރިމަތީގައި އޮންނަ ހަތަރު އަނގޮޅީގެ ސަރަހައްދު ހިމެނޭ ދެވަނަ ސެގްމަންޓުގައި ވެސް ތާރު އަޅައި ނިންމާފައިވާ ނަމަވެސް، އެ ސަރަހައްދު ހުޅުވާނެ ތާރީޚެއް އަދި ކަނޑައަޅާފައެއް ނުވެއެވެ.
މަގުގެ މަރާމާތު ކުރަމުން ގެންދަނީ އެމްޓީސީސީން ކަމަށްވާއިރު، މި މަސައްކަތަށްޓަކައި ޖޫން މަހުގެ ފަހުކޮޅު އެ މަގު ބަންދުކުރުމާއެކު ބައެއް ބަސް ރޫޓުތަކަށް ވެސް ބަދަލު ގެނެވުނެވެ.
އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ކުރީގެ ސަރުކާރުގެ ދައުރުގައި 84.4 މިލިއަން ރުފިޔާއަށް އާރުޑީސީއާ ހަވާލުކުރިއެވެ. މިހާރުގެ ސަރުކާރުން ދެ އަހަރު ކުރިން މަގުގެ އެންމެ ފަހު ސެގްމަންޓުގައި ތާރު އަޅައި ނިންމި ނަމަވެސް، ހާބަރު ފުޑްކޯޓު ސަރަހައްދުގައި ތާރުގަނޑު އުފުލި ދަތުރުކުރާ މީހުންނަށް ދަތިތަކެއް ކުރިމަތިވިއެވެ. އެކަމާ ގުޅިގެން ޝަކުވާތައް ބޮޑުވެ، ސަރުކާރަށް ފާޑުކިޔުން ވެސް ލިބުނެވެ.
ކޮމެންޓު ފޮނުވާ