ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް މެލޭޝިއާގެ މަރުކަޒީ ބޭންކް، ބޭންކް ނިގަރާ މެލޭޝިޔާއިން 100 މިލިއަން ޑޮލަރުގެ ފައިނޭންސިން ފެސިލިޓީއެއް ހަމަޖައްސައިދިނުމަށް އެއްބަސްވެފައިވާ ކަމަށް މެލޭޝިއާގެ ބޮޑުވަޒީރު އަންވަރު އިބްރާހީމް އިއުލާނުކުރައްވައިފިއެވެ.
ރާއްޖެއަށް ކުރައްވަމުން ގެންދަވާ ފުރަމާނަ ދަތުރުފުޅުގައި ރައީސް ޑރ. މުހައްމަދު މުއިއްޒާ އެކު ބޭއްވި ބައްދަލުކުރެއްވުމަށްފަހު، ދެ ގައުމުގެ ވެރިންގެ ގުޅިފައިވާ ބަޔާނުގައި އަންވަރު ވިދާޅުވީ، ރާއްޖޭގެ ފަރާތުން ހުށަހެޅި މުހިންމު ކަންކަމުގެ ތެރޭގައި މި ފެސިލިޓީ ހިމެނޭ ކަމަށެވެ. އަދި މި އެއްބަސްވުމުގައި ކުރިއަށް ދާނެ ގޮތެއް ދެ ގައުމުގެ މަރުކަޒީ ބޭންކުތަކުން ވީ އެންމެ އަވަހަކަށް ނިންމަން ޖެހޭ ކަމަށާއި، މިއީ ދެ ގައުމުގެ އިތުބާރާއި އެކުވެރިކަމުގެ ރަމްޒެއް ކަމުގައި އޭނާ ފާހަގަކުރެއްވިއެވެ.
މީގެ އިތުރުން ދެ ގައުމުގެ ދެމެދުގައި ޕްރެފަރެންޝަލް ޓްރޭޑް އެގްރީމެންޓެއްގެ މަޝްވަރާތައް ފެށުމަށާއި، އިއާދަކުރަނިވި ހަކަތަ، ޑިޖިޓަލް އިންފްރާސްޓްރަކްޗަރ، އިމާރާތްކުރުމުގެ ދާއިރާ، އަދި އިސްލާމިކް ފައިނޭންސްގެ ދާއިރާއިން މެލޭޝިޔާގެ އިންވެސްޓްމަންޓްތަކަށް މަގުފަހިކުރުމަށް ދެ ލީޑަރުން ވަނީ އެއްބަސްވެވަޑައިގަންނަވާފައެވެ. ހަމައެއާއެކު ފަތުރުވެރިކަމާއި ހަލާލް އިންޑަސްޓްރީގެ ދާއިރާއިންވެސް ގުޅުން ބަދަހިކުރުމަށް ނިންމިއެވެ.
ސަރަޙައްދީ އަދި ބައިނަލްއަޤްވާމީ މައްސަލަތަކާ ގުޅޭގޮތުން، ފަލަސްޠީނުގެ ރައްޔިތުންނާ އެކު ރާއްޖެ ސާބިތުވެ އޮތްކަން ރައީސް މުއިއްޒު ތަކުރާރުކުރެއްވިއެވެ. އަދި ކުރިއަށް އޮތް ކޮޕް31 ސަމިޓުގައި މޫސުމީ ބަދަލުތަކުން އަރައިގަތުމަށް ބޭނުންވާ މާލީ އެހީތެރިކަން ހޯދުމަށާއި، ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްގައި ހިފެހެއްޓުމަށް ކުދި ޖަޒީރާ ޤައުމުތަކުގެ ހައްޤުގައި ގުޅިގެން މަސައްކަތްކުރުމުގެ މުހިންމުކަންވެސް އެމަނިކުފާނު ފާހަގަކުރެއްވިއެވެ.
ކޮމެންޓު ފޮނުވާ