ރާއްޖެއާއި މެލޭޝިއާއާ ދެމެދު އޮތް ޒަމާންވީ އެކުވެރިކަމުގެ ހަގީގީ ބިންގަލަކީ ދެ ގައުމުގެ ރައްޔިތުންގެ މެދުގައި އޮތް ގާތް ގުޅުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ރާއްޖެއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ޝަރަފުގައި މިއަދު ބޭއްވި ރަސްމީ ފަރީއްކޮޅުގައި ވާހަކަފުޅު ދައްކަވަމުން ރައީސް ވިދާޅުވީ، 1968 ވަނަ އަހަރު ދެ ގައުމުގެ ދެމެދު ސިޔާސީ ގުޅުން ގާއިމުކުރެވުނު ނަމަވެސް، މި ގުޅުމަކީ ހަމައެކަނި ލިޔެކިޔުންތަކުން މިންކުރެވޭ އެއްޗެއް ނޫން ކަމަށެވެ. މެލޭޝިއާއިން ތައުލީމު ހާސިލުކުރި ދިވެހި ދަރިވަރުންނާއި، އެ ގައުމުގައި ދިރިއުޅޭ ދިވެހި އާއިލާތަކާއި، ދެ ގައުމަށް ޒިޔާރަތްކުރާ ރައްޔިތުންގެ ފަރާތުން ފެންނަ ގާތްކަމަކީ މި ގުޅުމުގެ ހަގީގީ ސިފަ ކަމުގައި އެމަނިކުފާނު ފާހަގަކުރެއްވިއެވެ.
"ދެ ގައުމެއްގެ ދެމެދުގައި އެޅޭ އެންމެ ވަރުގަދަ ފާލަމަކީ ކޮންކްރީޓުން ނުވަތަ ދަގަނޑުން ބިނާކުރާ ފާލަންތަކެއް ނޫން. އެއީ އަޅުގަނޑުމެންގެ ރައްޔިތުންގެ ވިސްނުމާއި، ތަޖުރިބާތަކާއި އަދި އުފެދިފައިވާ އެކުވެރިކަމުގެ މައްޗަށް ބިނާވާ ފާލަންތައް،" ރައީސް ވިދާޅުވިއެވެ.
ރައީސްގެ ވާހަކަފުޅުގައި، ރާއްޖެއަށް "ކަރަންސީ ސްވަޕް" ފެސިލިޓީއެއް ދިނުމަށް މެލޭޝިއާއިން ވިސްނަމުންދާތީއާއި، ވިޔަފާރީގެ ހާއްސަ އެއްބަސްވުމެއް (ޕީޓީއޭ) އެކުލަވާލުމުގެ މަޝްވަރާތައް ފެށުމަށް އެއްބަސްވެފައިވާތީ ޝުކުރު އަދާކުރެއްވިއެވެ. މީގެ އިތުރުން ހާއްސަ އެހީއަށް ބޭނުންވާ ކުދިން ތިބޭ އާއިލާތަކަށް މެލޭޝިއާގެ ވިސާ ލުއިކޮށްދިނުމަށާއި، ރާއްޖޭގެ ކަނޑުއަޑީގެ މައުދަންތައް ދެނެގަތުމަށް 'ޕެޓްރޯނަސް' ކުންފުންޏަށް ދައުވަތު ދިނުމުގައި މެލޭޝިއާ ސަރުކާރުގެ ފަރާތުން ލިބުނު އެއްބާރުލުންވެސް އެމަނިކުފާނު ފާހަގަކުރެއްވިއެވެ.
ނިންމާލައްވަމުން ރައީސް ވަނީ ޓެކްނޮލޮޖީއާއި، ޑިޖިޓަލް ދާއިރާއާއި، ތިމާވެށީގެ މައްސަލަތަކުގައި ދެ ގައުމު ގުޅިގެން މަސައްކަތްކުރުމަށް އެދިވަޑައިގެން، އަންނަން އޮތް ޖީލުތަކަށްޓަކައި މި ގުޅުން އިތުރަށް ބަދަހިކުރެއްވުމުގެ އަޒުމް ކަނޑައަޅުއްވާފައެވެ.
ކޮމެންޓު ފޮނުވާ