ފާއިތުވި ހަތަރު ދުވަހު ރާއްޖޭގެ ދެކުނުގެ އަތޮޅުތަކަށް ކުރި ވިއްސާރައިގައި ގެއްލުން ލިބުނު ރަށްރަށަށް ސަރުކާރުން ފޯރުކޮށްދޭ އެހީތެރިކަން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވިލަރެސް ކުރަމުންދާ ކަމަށް އެ އޮތޯރިޓީން ބުނެފިއެވެ.
އެންޑީއެމްއޭއިން ބުނިގޮތުގައި، އައްޑޫ ސިޓީއާއި ފުވައްމުލައް ސިޓީގެ އިތުރުން ގއ. އަދި ގދ. އަތޮޅުގެ ރަށްރަށުގައި ފެންބޮޑުވެފައި ވީނަމަވެސް، މިހާރު މޫސުން ރަނގަޅުވަމުން އަންނަ ކަމަށް ކައުންސިލްތަކުން މައުލޫމާތު ދީފައިވެއެވެ. ވިއްސާރައާ ގުޅިގެން މެދުކެނޑުނު އާންމު ހިދުމަތްތައް އަލުން ފެށި، ދިރިއުޅުމުގެ ހާލަތު އާދައިގެ ގޮތަކަށް ބަދަލުވަމުންދާ ކަމަށް ވެސް ފާހަގަކުރެއެވެ.
އެ އޮތޯރިޓީން ބުނިގޮތުގައި، ގެއްލުން ލިބުނު ގެތައް ސާފުކުރުމާއި ގެއްލުންތައް ދެނެގަތުމުގެ މަސައްކަތް ކަމާ ބެހޭ ފަރާތްތަކުން ގުޅިގެން މިހާރު ދަނީ ކުރަމުންނެވެ. ދިރިއުޅުމަށް ދަތިވެގެން ވަގުތީގޮތުން އެހެން ތަންތަނަށް ބަދަލުކުރި އާއިލާތައް އަނބުރާ ގެދޮރަށް ބަދަލުވުމުގެ އިންތިޒާމުތައް ވެސް ދަނީ ހަމަޖައްސަމުންނެވެ. ފެންބޮޑުވުމުގެ ސަބަބުން ބައެއް ރަށްރަށުގެ ނަރުދަމާ ނިޒާމަށް ދިމާވި މައްސަލަތައް ހައްލުކޮށް، ހިދުމަތް ގާތްގަނޑަކަށް އާންމު ހާލަތަށް ގެނެވިފައިވާ ކަމަށް ވެސް އެންޑީއެމްއޭއިން ބުނެއެވެ.
ފެންބޮޑުވި ސަރަހައްދުތަކާއި ގެދޮރު ސާފުކުރުމުގައި ސަމާލުކަން ދޭން ޖެހޭ ސިއްހީ އިރުޝާދުތައް، ރަށްރަށުގެ ސިއްހީ މަރުކަޒުތައް މެދުވެރިކޮށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދަނީ ފޯރުކޮށްދެމުންނެވެ. ކުރިއަށް އޮތް ދުވަސްތަކުގައި، ވިއްސާރައިގައި ލިބުނު ގެއްލުންތައް ވަޒަން ކުރުމަށްފަހު، ސަރުކާރުގެ ފަރާތުން ފޯރުކޮށްދޭ އެހީތެރިކަން ވިލަރެސް ކުރާނެ ކަމަށް ވެސް އެންޑީއެމްއޭއިން ބުނެއެވެ.
މޫސުމާ ބެހޭ ގައުމީ އިދާރާއިން ލަފާ ކުރާ ގޮތުގައި، މިހާރު ކުރަމުންދާ ވިއްސާރަ ބުރާސްފަތި ދުވަހުން ފެށިގެން އެއްކޮށް އަލިވާން ފަށާނެއެވެ. ޕެސިފިކް ކަނޑުގައި އުފެދިފައިވާ "އެލްނީނޯ" ގެ ސަބަބުން ރާއްޖެއަށް ކުރާ އަސަރު ބޮޑުވާނެ ކަމަށް ލަފާކުރެވިފައިވާތީ، ދުރާލައި ކައުންސިލްތަކާއި މުއައްސަސާތަކުން ރައްކާތެރިކަމުގެ ފިޔަވަޅުތައް އަޅާފައިވާ ކަމަށް ވެސް އެންޑީއެމްއޭއިން ފާހަގަކުރެއެވެ.
ކޮމެންޓު ފޮނުވާ