ދިވެހި ޒުވާނުންނަށް މަތީ ތަޢުލީމު ޙާޞިލުކުރުމުގެ މަގުތަކާއި، ވަޒީފާގެ ފުރުޞަތުތައް އަދި ހުނަރު ތަރައްޤީކުރުމުގެ ދޮރުތައް ސަރުކާރުން ތަނަވަސްކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ޤައުމާ މުޚާޠަބުކުރައްވަމުން ރައީސް ވިދާޅުވީ، ދިވެހި އާބާދީގެ ގާތްގަނޑަކަށް 45 އިންސައްތަ ހިއްސާކުރަނީ ޒުވާނުން ކަމަށާއި، ރާއްޖޭގެ އުޖާލާ މުސްތަޤުބަލު ބިނާވެފައި ވަނީ އެ ޒުވާނުންގެ އުންމީދުތަކާއި ލަނޑުދަނޑިތަކުގެ މައްޗަށް ކަމަށެވެ. ޒުވާނުންގެ ހިތްވަރާއި، އުފެއްދުންތެރި ވިސްނުމާއި ވަރުގަދަ ޢަޒުމަކީ ޤައުމަށް ދެމެހެއްޓެނިވި ތަރައްޤީ ގެނެސްދޭނެ އެންމެ ބޮޑު ބާރު ކަމަށްވެސް އެމަނިކުފާނު ފާހަގަކުރެއްވިއެވެ.
ޒުވާނުން ބާރުވެރިކުރުވުމަށް ސަރުކާރުން ފަށާފައިވާ މަޝްރޫޢުތަކުގެ ތެރޭގައި ވަޠަނީ ޚިދުމަތުގެ ޤައުމީ ޕްރޮގްރާމާއި، ނެޝެނަލް އެޕްރެންޓިސްޝިޕް ޕްރޮގްރާމް ހިމެނޭކަން ރައީސް ފާހަގަކުރެއްވިއެވެ. މީގެ އިތުރުން، ޒުވާނުންގެ ޚާއްޞަ ޤައުމީ ލަފާދޭ ކޮމިޓީއެއް އެކުލަވާލުމުގެ މަސައްކަތާއި، ކްރިއޭޓިވް އިކޮނޮމީއެއް ބިނާކުރުމުގެ މަސައްކަތްވެސް ހަލުވިކަމާ އެކު ކުރިއަށްދާ ކަމަށް އެމަނިކުފާނު ވިދާޅުވިއެވެ.
ބައިނަލްއަޤްވާމީ ޒުވާނުންގެ ދުވަހުގެ ގޮތުގައި ކޮންމެ އަހަރެއްގެ އޮގަސްޓު 12 ފާހަގަކުރަން ފެށީ 1998 ވަނަ އަހަރު ބޭއްވި ދުނިޔޭގެ ޒުވާނުންނާ ބެހޭ ވަޒީރުންގެ ބައްދަލުވުމުގައި ނިންމެވި ނިންމެވުމަކާ ގުޅިގެންނެވެ.
ކޮމެންޓު ފޮނުވާ