ކުޅުދުއްފުށީގެ ބަނދަރާއި އާރުޓީއެލް ޓާމިނަލުން މަސްތުވާތަކެއްޗާއެކު ހަތަރު މީހަކު ހައްޔަރު ކޮށްފި

ހދ. ކުޅުދުއްފުށި ސިޓީގައި ފުލުހުން ހިންގި ދެ އޮޕަރޭޝަނެއްގައި، މަސްތުވާތަކެތި ކަމަށް ޝައްކުކުރެވޭ ތަކެއްޗާއެކު ހަތަރު މީހަކު ހައްޔަރުކޮށްފިއެވެ.

މި އޮޕަރޭޝަންތައް ހިންގާފައިވަނީ ކުޅުދުއްފުށި ޕޮލިހާއި ކައުންޓާ ނާކޮޓިކްސް އިންޓެލިޖެންސް ގުޅިގެންނެވެ. ފުލުހުން ބުނާ ގޮތުގައި މި ދެ އޮޕަރޭޝަނަކީ ބޮޑުތިލަދުންމަތީގައި ފުޅާވަމުންދާ މަސްތުވާތަކެތީގެ ވިޔަފާރި ހުއްޓުވުމަށާއި، ސިޓީގެ އަމާންކަން ދެމެހެއްޓުމަށް ހިންގި ހާއްސަ ހަރަކާތެކެވެ.

އިއްޔެ އާރުޓީއެލް ފެރީ ޓާމިނަލް ސަރަހައްދުން ހިންގި އޮޕަރޭޝަނުގައި ހައްޔަރުކޮށްފައިވަނީ ޏ. ފުވައްމުލައް، ދޫޑިގަން / ކަރަންފޫގޭ މުހައްމަދު އުމީން (19އ) އާއި ހދ. ކުމުންދޫ / ފަހިވާ އާއިޝަތު އަލީ (30އ) އެވެ. މި ދެ މީހުންގެ އަތުން 27 ސެލޯފިންކޮޅެއް ފެނިފައިވާއިރު، އޭގައި ހުރި މަސްތުވާތަކެތި ކަމަށް ބެލެވޭ ތަކެތީގެ ޖުމްލަ ބަރުދަނަކީ 7.59 ގްރާމް ކަމަށް ފުލުހުން ބުނެއެވެ. ކޯޓުން ވަނީ އުމީންގެ ބަންދަށް 15 ދުވަސް، އަދި އާއިޝަތު އަލީގެ ބަންދަށް 7 ދުވަސް ޖަހާފައެވެ.

ދެވަނަ އޮޕަރޭޝަން ހިންގާފައިވަނީ މިދިޔަ ބުދަ ދުވަހު ކުޅުދުއްފުށީ ބަނދަރު ސަރަހައްދުގައެވެ. އެ އޮޕަރޭޝަނުގައި ހައްޔަރުކޮށްފައިވަނީ ކުޅުދުއްފުއްޓަށް ނިސްބަތްވާ ކުޅުދުއްފުށި / އުރަހަ ހުސައިން ނައީމް (44އ) އާއި ކުޅުދުއްފުށި / ބަންޑާރަހިޔާ 002 ޕީ އަބްދުއްރަހުމާން މުހައްމަދު (45އ) އެވެ. މި ދެ މީހުން ބަލައި ފާސްކުރިއިރު، މަސްތުވާތަކެތި އަޅާފައި ހުރި 30 ސެލޯފިންކޮޅެއް ފެނިފައިވާއިރު، އޭގެ ބަރުދަނަކީ 9.71 ގްރާމެވެ. މި ދެ މީހުންގެ ބަންދަށް ކޯޓުން ޖަހާފައިވަނީ 5 ދުވަހެވެ.

މި ދެ މައްސަލަ ވެސް ފުލުހުން ދަނީ އިތުރަށް ތަހުގީގު ކުރަމުންނެވެ. ބޮޑުތިލަދުންމަތީގެ މައި ދަތުރުފަތުރާއި އިގްތިސާދީ ހަބެއް ކަމަށްވާ ކުޅުދުއްފުށީގައި މަސްތުވާތަކެތީގެ ވިޔަފާރި ހުއްޓުވުމަށް ފުލުހުންނާއި މުޖުތަމައު ގުޅިގެން ކުރާ މަސައްކަތް އިތުރަށް ވަރުގަދަކުރަން ޖެހޭ ކަމަށް ގިނަ ބަޔަކު ދެކެއެވެ.