އިރާގުގައި އީރާނާ ގުޅުންހުރި ޓާގެޓްތަކަށް އެމެރިކާ އާއި ސައުދީން ހަމަލާ ދީފި

އެމެރިކާ އާއި ސައުދީ އަރަބިއްޔާގެ ސިފައިން ގުޅިގެން، އިރާގުގައި ތިބި "އީރާނާ ގުޅުންހުރި ގްރޫޕުތަކަށް" އަމާޒުކޮށްގެން ފައިން-ޕޮއިންޓް ހަމަލާތަކެއް ދީފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ.

"އީރާނުގެ އިސްލާމިކް ރިވޮލިއުޝަނަރީ ގާޑް ކޯ (އައި.އާރު.ޖީ.ސީ) ގެ އިރުޝާދުގެ ދަށުން އެމެރިކާގެ ސިފައިންނަށާއި ސައުދީގެ ހަކަތައިގެ އިންފްރާސްޓްރަކްޗާއަށް ހަމަލާ ދިނުމަށް ބޭނުންކުރި، އީރާނާ ގުޅުންހުރި ޓެރަރިސްޓުންނާ ދެކޮޅަށް، ޖުލައި 28 ވަނަ ދުވަހު އެމެރިކާގެ ސެންޓްރަލް ކޮމާންޑާއި ސައުދީ އަރަބިއްޔާގެ ސިފައިން ގުޅިގެން އިރާގުގައި ޕްރިސިޝަން ސްޓްރައިކްތަކެއް ދީފައިވޭ،" ސެންޓްކޮމްގެ ބަޔާނުގައިވެ އެވެ.

އެ ބަޔާނުގައި ވާގޮތުން، ފާއިތުވި 72 ގަޑިއިރު ތެރޭ އައި.އާރު.ޖީ.ސީގެ އިރުޝާދުގެ ދަށުން ދޭން މަސައްކަތްކުރި 30 އަށްވުރެ ގިނަ ޑްރޯން ހަމަލާތަކަށް ރައްދު ދިނުމުގެ ގޮތުން، އެމެރިކާ އާއި ސައުދީގެ ފައިޓަރ ޖެޓްތަކުން އިރާގުގެ އިރުމަތީ ސަރަހައްދުގައި ހުރި ލޮޖިސްޓިކްސް އަދި ހަތިޔާރު ގުދަންތަކަށް ހަމަލާ ދީފައިވެ އެވެ.

"އެމެރިކާ ސިފައިންނާ ދެކޮޅަށް ދިން، ސަބަބެއް ނެތް މި ހަމަލާތައް ކާމިޔާބެއް ނުވި،" ކޮމާންޑްގެ ބަޔާނުގައި ބުނެފައިވެ އެވެ.

ފެބުރުއަރީ އާއި އޭޕްރީލް އާ ދެމެދު، އިރާގުގައި ތިބި އީރާނާ ގުޅުންހުރި ގްރޫޕުތަކުން، އެމެރިކާ ރައްޔިތުންނާއި އެމެރިކާގެ ފެސިލިޓީތަކަށް 600 އަށްވުރެ ގިނަ "ހަމަލާ ދޭން މަސައްކަތްކޮށްފައިވާ" ކަމަށް ސެންޓްކޮމް އިން ބުނެ އެވެ.

"އައި.އާރު.ޖީ.ސީ އާއި އޭގެ ޓެރަރިސްޓް ޕްރޮކްސީތަކުން މި ހަމަލާތައް ހުއްޓާލަން ޖެހޭ. އެހެންނޫނީ އެމެރިކާގެ އަސްކަރީ ރައްދު އިތުރުވާނެ،" ބަޔާނުގައި ބުނެފައިވެ އެވެ.

"ދިރާސާކޮށް، ވަކި ޓާގެޓަކަށް އަމާޒުކޮށްދިން ހަމަލާތަކެއް"

މި ކަން މިހެން އޮތްއިރު، ސައުދީގެ ޑިފެންސް މިނިސްޓްރީން ވެސް ބުދަ ދުވަހުގެ ފަތިހު ބުނެފައިވަނީ، އެމެރިކާއާ ގުޅިގެން އިރާގުގައި ދިން މި ހަމަލާތަކަކީ، ސައުދީގެ ތެލުގެ ފެސިލިޓީތަކަށް އިރާގުގެ ބިމުން ފޮނުވި ހަމަލާތަކަށް ރައްދު ދިނުމުގެ ގޮތުން ދިން ހަމަލާތަކެއް ކަމަށެވެ.

އަމިއްލަ ދިފާއުގައި ފިޔަވަޅު އެޅުމުގެ ހައްގު ދޭ، އދ.ގެ ޗާޓަރުގެ 51 ވަނަ މާއްދާއަށް ރިއާޔަތްކޮށް، ސައުދީ އަރަބިއްޔާ އާއި އެމެރިކާ ގުޅިގެން، ސައުދީގެ ހަކަތައިގެ އިންފްރާސްޓްރަކްޗާއަށް ދިން ހަމަލާތަކާ ގުޅުންހުރި ޓާގެޓްތަކަށް "ދިރާސާކޮށް، ވަކި ޓާގެޓަކަށް އަމާޒުކޮށްދިން ހަމަލާތަކެއް" ދީފައިވާ ކަމަށް އެ މިނިސްޓްރީން ބުނެ އެވެ.

"ރާއްޖެ (ސައުދީ) ތަނާޒުލުއަކަށް ދާން ބޭނުމެއް ނުވޭ. ނަމަވެސް، ކުރިމަތިވާ ކޮންމެ ދުއްތުރާލަކަށް ރައްދު ދޭނަން،" ބަޔާނުގައި އިތުރަށް ބުނެފައިވެ އެވެ.

އެމެރިކާ އާއި ސައުދީ ދިން މި ހަމަލާތައް އަމާޒުކޮށްފައިވަނީ ޕޮޕިއުލާ މޮބިލައިޒޭޝަން ފޯސެސް (ޕީ.އެމް.އެފް) އަށް ކަމަށް އިރާގުގެ ސަރަހައްދީ މީޑިއާތަކުން ވަނީ ބުނެފަ އެވެ.

ބަޣްދާދުގެ ދެކުނުގައި އޮންނަ ބަޞްރާ އާއި ވާސިޠު ޕްރޮވިންސް ހިމެނޭގޮތުން، އިރާގުގެ އެކި ސަރަހައްދުތަކުގައި ގޮވުންތަކުގެ އަޑު އިވިފައިވެ އެވެ.

ބަޞްރާގައި ހުންނަ ޕީ.އެމް.އެފް.ގެ ކޮމާންޑުން ބުނީ، ބުދަ ދުވަހުގެ ފަތިހު 2 ޖެހި އިރު (އަންގާރަ ދުވަހުގެ 23:00 ޖީ.އެމް.ޓީ ގައި) އެ ފައުޖުގެ ހެޑްކުއާޓަރަށް ވައިގެ ހަމަލާތަކެއް ދީފައިވާ ކަމަށެވެ.

އުރުދުންއަށް މިސައިލް ހަމަލާ

މި ކަންކަން ހިނގަމުންދިޔައީ، އުރުދުންގައި ހުރި އެމެރިކާ ސިފައިންގެ މަރުކަޒުތަކަށް އަމާޒުކޮށް، އީރާނުން މިސައިލް ހަމަލާތަކެއް ފޮނުވަމުންދިޔަ ވަގުތުގައި ކަމަށް، ސަރަހައްދީ އަދި އީރާނުގެ މީޑިއާތަކުން ރިޕޯޓުކުރެ އެވެ.

ބުދަ ދުވަހުގެ ފަތިހު ފޮނުވި މި މިސައިލްތައް ހުއްޓުވުމަށް، އެއާ ޑިފެންސް ސިސްޓަމްތަކުން މަސައްކަތްކުރި ކަމަށްވެސް ރިޕޯޓުތައް ބުނެ އެވެ.

އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ވަނީ، ސަރަހައްދުގައި ތިބި އެމެރިކާ ސިފައިންނާ ދެކޮޅަށް، އީރާނުގެ ރިވޮލިއުޝަނަރީ ގާޑުން މިސައިލް ފޮނުވި ކަމަށް ބުނެފަ އެވެ. ނަމަވެސް، ވަކި ސަރަހައްދެއް ފާހަގަކޮށްފައެއް ނުވެ އެވެ.

"މެދު އިރުމަތީގައި ތިބި އެމެރިކާ ސިފައިންނަށް ހަމަލާ ދިނުމުގެ ގޮތުން، އިސްލާމިކް ރިވޮލިއުޝަނަރީ ގާޑް ކޯ ފައުޖުން، އީރާނުން ބެލިސްޓިކް މިސައިލްތަކެއް ހަނގުރާމައިގެ ސިއްރު ހަމަލާއެއްގެ ގޮތުގައި ފޮނުވަން މަސައްކަތްކުރި،" ސެންޓްކޮމް އިން ބުނެ އެވެ.

"އީރާނުގެ ހުރިހާ މިސައިލްތަކެއް ކާމިޔާބުކަމާއެކު ހުއްޓުވުނު. އެމެރިކާ ސިފައިން ތިބީ ހޭލާ، މަތީ ފެންވަރެއްގައި ތައްޔާރީގެ ހާލަތުގައި."