އީރާން ހަނގުރާމައިގެ މަޝްވަރާތަކަށް ނަތަންޔާހޫ ޓްރަމްޕާ ބައްދަލުކުރައްވަނީ

އެމެރިކާއާއި އިޒްރޭލު ގުޅިގެން އީރާނާ ދެކޮޅަށް ފަށާފައިވާ ހަނގުރާމަ ކުރިއަށްދާ ގޮތާ ގުޅޭގޮތުން މަޝްވަރާކުރެއްވުމަށް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަންގާރަ ދުވަހު ވައިޓް ހައުސްއަށް ވަޑައިގެންފިއެވެ.

އަލްޖަޒީރާއިން ބުނާ ގޮތުގައި، މިއީ މިއަހަރުގެ ފެބްރުއަރީ 28 ވަނަ ދުވަހު އީރާނަށް ހަމަލާދޭން ފެށިފަހުން އެމެރިކާގެ ރައީސް ޑޮނަލްޑް ޓްރަމްޕާއި ނަތަންޔާހޫ ބައްދަލުކުރައްވާ ފުރަތަމަ ފަހަރެވެ. މި ދަތުރުގައި، މި މަހުގެ 11 ވަނަ ދުވަހު އަވަހާރަވި ރިޕަބްލިކަން ސެނެޓަރު ލިންޑްސީ ގްރެހަމްގެ ޖަނާޒާގައި ވެސް ނަތަންޔާހޫ ބައިވެރިވެވަޑައިގަންނަވާނެއެވެ. ގްރެހަމް އަކީ އިޒްރޭލަށް ވަރަށް ބޮޑަށް ތާއީދު ކުރެއްވި ސެނެޓަރެކެވެ.

ރޮއިޓާސްއަށް ވައިޓް ހައުސްގެ އޮފިޝަލަކު މައުލޫމާތު ދެއްވި ގޮތުގައި، މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެއްވުމަށް ހަމަޖެހިފައިވަނީ އީރާން ހަނގުރާމައާއި، ލުބުނާނަށް އިޒްރޭލުން ދެމުންދާ ހަމަލާތަކާއި، އަދި އަބްރަހަމް އެކޯޑްސްއާ ބެހޭގޮތުންނެވެ. ޓްރަމްޕްގެ ފުރަތަމަ ދައުރުގައި ފެއްޓެވި އަބްރަހަމް އެކޯޑްސްގައި މިހާތަނަށް ސޮއިކޮށްފައިވަނީ ޔޫއޭއީ، ބަހްރައިން، މޮރޮކޯ، ސޫދާން އަދި ކަޒަކްސްތާނުންނެވެ.

ދެ ލީޑަރުންގެ މެދުގައި ބައެއް މައްސަލަތަކުގައި ސީރިއަސް ހިޔާލު ތަފާތުވުންތަކެއް އުފެދިފައިވާ ކަމަށް މީޑިއާތަކުން ރިޕޯޓު ކުރެއެވެ. ލުބުނާނަށް ދޭ ހަމަލާތައް ހުއްޓާލައި، އީރާނާއެކު ސުލްހައިގެ އެއްބަސްވުމަކަށް އައުމަށް އެމެރިކާއިން ކުރާ މަސައްކަތްތަކަށް ނަތަންޔާހޫ ހުރަސްއަޅުއްވާ ކަމަށް ޓްރަމްޕް ތުހުމަތު ކުރައްވާފައިވެއެވެ. ފައިނޭންޝަލް ޓައިމްސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވެފައި ވަނީ، ގޮތް ނިންމަވާނީ އޭނާ ކަމަށާއި، އެކަމުގައި ނަތަންޔާހޫ އަށް އިހްތިޔާރެއް ނޯންނާނެ ކަމަށެވެ.

ލުބުނާނުން ފޭބުމަށް އިޒްރޭލުން ދެކޮޅު ހަދަމުންދާތީ ޖޫން މަހު ޓްރަމްޕް ނަތަންޔާހޫއަށް ފާޑުވިދާޅުވި ކަމަށް އެކްސިއޯސްއިން ރިޕޯޓު ކޮށްފައިވެއެވެ. އޭގެ ރައްދުގައި ނަތަންޔާހޫ ވެސް ވަނީ ތުރުކީއަށް އެފް-35 މަރުކާގެ އަސްކަރީ މަތިންދާބޯޓު ވިއްކަން އެމެރިކާއިން ނިންމި ނިންމުމަށް ފާޑުވިދާޅުވެފައެވެ. ފޮކްސް ނިއުސްއަށް ދެއްވި އިންޓަވިއުއެއްގައި ނަތަންޔާހޫ ވިދާޅުވެފައި ވަނީ، އެ ބޯޓުތައް ތުރުކީ އަށް ދީފިނަމަ މެދުއިރުމަތީގެ ބާރުގެ ތިލަފަތަށް ބޮޑު ބަދަލެއް އަންނާނެ ކަމަށެވެ. މީގެ އިތުރުން، އީރާނަށް ހަމަލާ ދިނުމަށް އެމެރިކާއިން ބޭނުންކުރި ބޮންއަޅާ ބޯޓުތަކަށް އިޒްރޭލުގެ ވައިގެ ސަރަހައްދާއި ވައިގެ ބަނދަރުތައް ބޭނުންކުރުމުގެ ހުއްދަ ދީފައިވާ ކަން ވެސް ނަތަންޔާހޫ ފާހަގަކުރެއްވިއެވެ.

ނަތަންޔާހޫ ވައިޓް ހައުސްއަށް ވަޑައިގަތުމާ ދިމާކޮށް، ހުޅަނގު އައްސޭރީގައި އިޒްރޭލުގެ ވަޒަންވެރިންގެ ހަމަނުޖެހުންތައް ވަނީ އިތުރުވެފައެވެ. މިދިޔަ ހަފުތާ ބަންދުގައި ތާލްގައި ހިނގި ބަޑީގެ ހަމަލާ ބަދަލުކުރުމެއްގައި އިޒްރޭލުގެ ދެ މީހަކާއި ފަލަސްތީނުގެ ހަތަރު މީހަކު ވަނީ މަރުވެފައެވެ. މިކަމާ ގުޅިގެން، އިޒްރޭލުގެ އަސްކަރިއްޔާއާއި ޖާސޫސީ އިދާރާތަކުގެ ކުރީގެ 550 އަށްވުރެ ގިނަ އޮފިޝަލުން ހިމެނޭ "ކޮމާންޑާސް ފޯ އިޒްރޭލްސް ސެކިއުރިޓީ" ޖަމިއްޔާއިން ޓްރަމްޕަށް ފޮނުވި ސިޓީއެއްގައި ބުނެފައި ވަނީ، ހުޅަނގު އައްސޭރީގެ ހަމަނުޖެހުންތައް ހުއްޓުވުމަށް އެހީވެދެއްވޭނީ ހަމައެކަނި ޓްރަމްޕަށް ކަމަށެވެ.

މިޝިގަން އަށް ވަޑައިގަންނަވަމުން، އެއާ ފޯސް ވަންގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އެމެރިކާގެ އެހީތެރިކަމާ ނުލައި އިޒްރޭލަށް ދެމިއޮވެވޭނެ ގޮތެއް ނޯންނާނެ ކަމަށެވެ. އަދި އޭނާ އެކަމުގެ ތެރެއަށް ވެދެވަޑައި ނުގެންނެވި ނަމަ، މީގެ މަސްތަކެއް ކުރިން އިޒްރޭލު ނެތިދިޔައީސް ކަމަށް ވެސް ޓްރަމްޕް ވިދާޅުވިއެވެ.

ރޮއިޓާސްއަށް މައުލޫމާތު ދިން މަސްދަރުތަކުން ބުނާ ގޮތުގައި، އޮކްޓޯބަރު 27 ގައި ބޭއްވުމަށް ހަމަޖެހިފައިވާ އިޒްރޭލުގެ އިންތިހާބަށް ޓްރަމްޕްގެ ތާއީދު ހޯއްދެވުމަކީ ވެސް މި ދަތުރުގައި ނަތަންޔާހޫ އިސްކަން ދެއްވާނެ ކަމެކެވެ.