ސިހުރު ހެދިކަމުގެ ތުހުމަތުގައި ށ. ފޭދޫއަށް ނިސްބަތްވާ 63 އަހަރުގެ ދިވެހި ފިރިހެނަކު ހައްޔަރުކޮށް، 15 ދުވަހަށް ބަންދުގައި ބަހައްޓަން ކްރިމިނަލް ކޯޓުން އަމުރުކޮށްފިއެވެ.
ކްރިމިނަލް ކޯޓުން އިއްޔެ ނެރުނު ބަންދު އަމުރުގައި ބުނެފައިވަނީ، އޭނާ ކުށްކުރި ކަމަށް ކޮންމެވެސް މިންވަރަކަށް ތުހުމަތު ކުރެވޭ ވަރުގެ ހެކި ފުލުހުންގެ ފަރާތުން ކޯޓަށް ހުށަހަޅާފައިވާ ކަމަށެވެ. އެގޮތުން ހުށަހަޅާފައިވާ ހެކީގެ ތެރޭގައި ފުލުހުންގެ އިންޓެލިޖެންސް ރިޕޯޓާއި ހާދިސާ ރިޕޯޓުގެ އިތުރުން ފޮޓޯ ރިޕޯޓު ހިމެނެއެވެ.
އޭނާ ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބަލައި، 15 ދުވަހުގެ މުއްދަތަކަށް ބަންދުގައި ބަހައްޓަން ކޯޓުން ވަނީ އަމުރުކޮށްފައެވެ.
ފާހަގަކޮށްލެވޭ ގޮތުގައި، މީގެ ކުރިން ވެސް ސިހުރުގެ ތުހުމަތުގައި ބައެއް މީހުން ހައްޔަރުކޮށްފައި ވެއެވެ. އެހެންނަމަވެސް، މިފަދަ މައްސަލަތައް ފުރިހަމައަށް ތަހުގީގު ކުރުމަށް ބޭނުންވާ ގާނޫނުތަކާއި ވަސީލަތްތައް މަދުވުމުގެ ދަތިކަން ތަހުގީގީ އިދާރާތަކަށް ދަނީ ކުރިމަތިވަމުންނެވެ.
ކޮމެންޓު ފޮނުވާ