ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބުގެ ވޯޓުލުން ޖުމްލަ 131 ރަށު ދާއިރާއެއްގައި އަންނަ ހޮނިހިރު ދުވަހު ބާއްވަން އެ ޕާޓީން ނިންމައިފިއެވެ.
ޕީއެންސީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ތަރުޖަމާނު އަދި ހައްޖު ކޯޕަރޭޝަނުގެ މެނޭޖިން ޑިރެކްޓަރު މުޙައްމަދު ފިރުޒުލް ޢަބްދުﷲ ޚަލީލް ވިދާޅުވީ، މިއީ ވަރަށް ވާދަވެރިކޮށް ކުރިއަށްދާނެ އިންތިޚާބެއް ކަމަށެވެ. އަދި އިންތިޚާބުގެ އިދާރީ ހުރިހާ ތައްޔާރީތަކެއް ވަރަށް ހަލުވިކަމާއެކު ކުރިއަށްދާކަން އޭނާ ފާހަގަކުރެއްވިއެވެ.
މި އިންތިޚާބުގައި ވޯޓުލުމުގެ ހައްގު ލިބެނީ ފާއިތުވި ޖޫން މަހުގެ 15 ވަނަ ދުވަހުގެ ނިޔަލަށް އިލެކްޝަންސް ކޮމިޝަނުގައި ޕީއެންސީގެ މެމްބަރުންގެ ގޮތުގައި ދަފްތަރުވެފައިވާ ފަރާތްތަކަށެވެ. މިހާރު ޕާޓީގެ ވެބްސައިޓުގައި ވޯޓާސް ލިސްޓު އާންމުކޮށްފައިވާއިރު، ރީ-ރަޖިސްޓްރީވުމަށާއި ޝަކުވާ ހުށަހެޅުމަށް ޕޯޓަލް މެދުވެރިކޮށް ވަނީ ފުރުސަތު ހުޅުވާލާފައެވެ. މާލެއާއި އަތޮޅުތެރޭގައި ވޯޓުލުން ކުރިއަށްދާއިރު، ދާއިރާގެ ރައީސުން އިންތިޚާބުކުރާނީ ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މެމްބަރަކު ނެތް ދާއިރާތަކުގައެވެ. މަޖިލިސް މެމްބަރުން ތިއްބަވާ ދާއިރާތަކުގެ ރައީސްކަން ކުރައްވާނީ ސީދާ އެ މެމްބަރުންނެވެ.
މި ދާއިރާތަކުގެ އިންތިޚާބަށްފަހު، ޕީއެންސީގެ މަތީ މަޖިލީހުގެ ބައްދަލުވުންތައް އަންނަ ސެޕްޓެމްބަރު މަހުގެ 15 އިން 18 އަށް ބޭއްވުމަށް މިހާރު ވަނީ ތާވަލުކޮށްފައެވެ.
ކޮމެންޓު ފޮނުވާ