އެމެރިކާއާއި އީރާނާ ދެމެދު އުފެދިފައިވާ ދިގުލީ ހަމަނުޖެހުންތަކަށް ނިމުމެއް ގެނެސް، 14 ނުކުތާއެއްގެ މައްޗަށް އެކުލެވޭ ތާރީޚީ ސުލްހައިގެ އެއްބަސްވުމެއްގައި ސޮއިކުރުމަށް ދެ ގައުމުން ތައްޔާރުވެއްޖެއެވެ.
"އަލް އަރަބިއްޔާ އިނގިރޭސި" އިން އާންމުކޮށްފައިވާ މި އެއްބަސްވުމުގެ ލިޔުމުގައިވާ ގޮތުން، ދެ ގައުމުގެ ދެމެދުގައިވާ ހަމަނުޖެހުންތައް ވަގުތުން އަދި ދާއިމީކޮށް ހުއްޓާލުމަށާއި، އެމެރިކާއިން އީރާނާ ދެކޮޅަށް އަޅާފައިވާ ހުރިހާ ދަތިކުރުމުގެ ފިޔަވަޅުތަކެއް އުވާލުމަށް ވަނީ ހަމަޖެހިފައެވެ. އޭގެ ބަދަލުގައި އީރާނުން ދުވަހަކުވެސް ނިއުކްލިއާ ހަތިޔާރު ނުއުފައްދާނެކަމުގެ ޔަގީންކަން ދީފައިވާއިރު، ކުރިއަށް އޮތް 60 ދުވަހުގެ ތެރޭގައި ދާއިމީ ސުލްހައިގެ އެއްބަސްވުމަކަށް އައުމަށް ދެ ގައުމުން މަޝްވަރާކުރާނެއެވެ.
މި ފަހުމުނާމާގެ ދަށުން އީރާނުގެ އިގްތިސާދު އަލުން އާރާސްތުކުރުމަށް އެމެރިކާއާއި ސަރަހައްދީ ބައިވެރިން ގުޅިގެން 300 ބިލިއަން ޑޮލަރުގެ އެހީގެ ޕެކޭޖެއް ދިނުމަށް ވަނީ އެއްބަސްވެފައެވެ. މީގެ އިތުރުން، އެމެރިކާއިން ކުރިމަތިކޮށްފައިވާ ކަނޑުގެ ހުރަސްތައް ނައްތާލައި، 30 ދުވަހުގެ ތެރޭގައި ކަނޑުދަތުރުފަތުރުގެ ކަންކަން ހަނގުރާމައިގެ ކުރިން އޮތް މިންވަރަށް އިއާދަކުރުމަށްވެސް މި ލިޔުމުގައި ހިމަނާފައިވެއެވެ. އަދި ހިފަހައްޓާފައިވާ އީރާނުގެ ފައިސާއާއި މުދާ ދޫކޮށްލުމަށާއި، ތެލާއި އެހެނިހެން އުފެއްދުންތައް އެކްސްޕޯޓްކުރުމުގެ ހުއްދަ ދިނުމަށްވެސް އެމެރިކާއިން ވަނީ ޒިންމާވެފައެވެ.
މި އެއްބަސްވުމުގެ ކަންކަން ތަންފީޒުވަމުންދާ މިންވަރު ބެލުމަށް ހާއްސަ މޮނިޓަރިން މެކޭނިޒަމެއް ގާއިމްކުރުމަށް ދެ ފަރާތުން އެއްބަސްވެފައިވާއިރު، ދާއިމީ އެއްބަސްވުން ފާސްކުރާނީ އދ. ގެ ސަލާމަތީ މަޖިލީހުން ނެރޭ ގާނޫނީ ގޮތުން ބާރުލިބިދޭ ގަރާރެއްގެ ދަށުންނެވެ. މިއީ މެދުއިރުމަތީގެ ސުލްހައަށާއި މުޅި ދުނިޔޭގެ އިގްތިސާދަށް އަންނާނެ ވަރަށް ބޮޑު ހެޔޮ ބަދަލެއްކަމަށް ބެލެވެއެވެ.
ކޮމެންޓު ފޮނުވާ