އެމެރިކާ އާއި އީރާނާ ދެމެދު ވެވޭ ސުލްހައިގެ އެއްބަސްވުމާއެކު ހޮރްމޫޒް ކަނޑުއޮޅި އަލުން ހުޅުވާލާނެކަމުގެ އުންމީދުގައި، ދުނިޔޭގެ ބާޒާރުގައި ތެޔޮ ފީފާއެއްގެ އަގު 80 ޑޮލަރަށްވުރެ ދަށަށް ހިނގައްޖެއެވެ.
މިއީ މިދިޔަ މާޗު މަހުގެ ކުރީކޮޅަށްފަހު ތެލުގެ އަގު މިހާ ބޮޑަށް ވެއްޓުނު ފުރަތަމަ ފަހަރެވެ. ބައިނަލްއަގުވާމީ ބެންޗުމާކް ކަމަށްވާ 'ބްރެންޓް ނޯތު ސީ ކުރޫޑް' ގެ އަގު ވަނީ 4.0 އިންސައްތަ ދަށަށް ގޮސް 79.87 ޑޮލަރަށް ވެއްޓިފައެވެ. އަދި އެމެރިކާގެ މައިގަނޑު ބެންޗުމާކް ކަމަށްވާ 'ވެސްޓް ޓެކްސަސް އިންޓަރމީޑިއަޓް' ވެސް ވަނީ 4.5 އިންސައްތަ ދަށަށް ގޮސް 77.16 ޑޮލަރަށް ދަށްވެފައެވެ. ތެލުގެ އަގަށް މި ހެޔޮ ބަދަލު އައިސްފައިމިވަނީ، ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން އީރާނާ ދެކޮޅަށް ފެށި ހަނގުރާމައާ ގުޅިގެން ބަންދުކުރި ހޮރްމޫޒް ކަނޑުއޮޅި އަލުން ހުޅުވޭނެކަމުގެ ފެހި ސިގްނަލް ލިބުމުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އަންނަ ހުކުރު ދުވަހު ސުވިޓްޒަލޭންޑްގައި ސުލްހައިގެ އެއްބަސްވުމުގައި ސޮއިކުރުމާއެކު އެ ކަނޑުއޮޅި އެއްކޮށް ހުޅުވާލެވޭނެކަން ހާމަކުރައްވާފައެވެ. އީރާނުގެ މީޑިއާތަކުން ބުނާގޮތުގައި ތެޔޮ އުފުލާ ތިން ބޯޓަކާއި މުދާ އުފުލާ ދެ ބޯޓު މިހާރުވެސް ވަނީ އެ މަގުން ދަތުރުކޮށްފައެވެ. މިކަމުގެ ސަބަބުން ދުނިޔޭގެ އިގްތިސާދަށް އޮތް އިންފްލޭޝަނުގެ ބިރުވެރިކަން ކުޑަވެގެންދާނެ ކަމަށް ބެލެވުނު ނަމަވެސް، ހަނގުރާމައިގެ ކުރިން ހުރި އަގުތަކާ އަޅާބަލާއިރު ތެލުގެ އަގު އަދިވެސް މަތިކަމަށް މާހިރުން ފާހަގަކުރެއެވެ.
މީގެއިތުރުން، އެމެރިކާގެ ކުއްލި ހާލަތުގެ ރިޒާވްގައި ހުރި ތެލުގެ މިންވަރު 1983 ވަނަ އަހަރަށްފަހު އެންމެ ދަށަށް ގޮސްފައިވުމާއި، އީރާނުން ކަނޑުއޮޅިން ދަތުރުކުރާ އުޅަނދުތަކުން ފީއެއް ނަގާފާނެކަމުގެ ބިރު އޮތުމާއެކު، މާކެޓު އާންމު ހާލަތަކަށް އައުމަށް އަދި ހަފްތާތަކެއް ނުވަތަ މަސްތަކެއް ނަގާނެކަމަށް އެނަލިސްޓުން ލަފާކުރެއެވެ.
ކޮމެންޓު ފޮނުވާ