ކުރިއަށް އޮތް 2026 ވަނަ އަހަރުގެ ވޯލްޑް ކަޕްގެ ޓިކެޓްތަކުގެ އަގުތައް އިންތިހާއަށް ބޮޑުވެފައިވާތީ، ފީފާގެ ރައީސް ޖިއާނީ އިންފަންޓީނޯ އެކަމުގެ ދިފާއުގައި ވާހަކަދައްކަވައިފިއެވެ. އަދި އެމެރިކާއާ ދެމެދު ސިޔާސީ ނުތަނަވަސްކަން އޮތް ނަމަވެސް، އީރާނުން މުބާރާތުގައި ބައިވެރިވުމަކީ ފީފާއަށް ލިބުނު ވަރަށް ބޮޑު ކާމިޔާބީއެއް ކަމަށް އޭނާ ވަނީ ސިފަކުރައްވާފައެވެ.
މުބާރާތުގެ ފައިނަލް މެޗުގެ އާދައިގެ ގޮނޑިއެއްގެ އަގު 8،600 ޑޮލަރަށްވުރެ މައްޗަށް އަރާފައިވާއިރު، ބައެއް ޓިކެޓްތަކުގެ އަގު 32،000 ޑޮލަރަށްވުރެ މައްޗަށް ވަނީ ގޮސްފައެވެ. މިކަމާ ގުޅިގެން އިންފަންޓީނޯ ވިދާޅުވީ ޓިކެޓްތައް އަގުހެޔޮކޮށް ވިއްކައިފިނަމަ އޭގެ ފައިދާ ނަގާނީ ކަޅު ބާޒާރުގައި ޓިކެޓް ވިއްކާ ފަރާތްތަކުން ކަމަށެވެ. އެގޮތަށް ކަންތައް ވެއްޖެނަމަ ފުޓްބޯޅައަށް ލިބެންޖެހޭ ފައިސާ ނުލިބޭނެކަން އޭނާ ފާހަގަކުރެއްވިއެވެ. ނަމަވެސް މުބާރާތުގެ އެވްރެޖް ޓިކެޓެއްގެ އަގު އުޅެނީ 500 ޑޮލަރަށްވުރެ ދަށުގައި ކަމަށާއި، މިއީ އެމެރިކާގެ އެހެން ކުޅިވަރުތަކުގެ މެޗުތަކާ އަޅާބަލާއިރު އެކަށީގެންވާ އަގެއް ކަމަށްވެސް އޭނާ ވިދާޅުވިއެވެ.
މީގެ އިތުރުން، ސޯމާލިއާގެ ރެފްރީ އުމަރު އަރުތާންއަށް އެމެރިކާއަށް އެތެރެވުމުގެ ހުއްދަ ނުލިބުނު މައްސަލައާ ގުޅިގެން އިންފަންޓީނޯ ވިދާޅުވީ، ފީފާއަށް މުޅި ދުނިޔެ ކޮންޓްރޯލް ނުކުރެވޭނެ ކަމަށާއި، އެމެރިކާގެ ސަލާމަތީ ގަވާއިދުތަކާއި ކަސްޓަމްސްގެ ނިންމުންތަކަށް އިހުތިރާމް ކުރަންޖެހޭނެ ކަމަށެވެ. ހަމައެއާއެކު، އީރާނުގެ ގައުމީ ޓީމު މި މުބާރާތުގައި ބައިވެރިވެވޭގޮތް ވުމަކީ ބޮޑު ކާމިޔާބީއެއް ކަމަށް އޭނާ ތަކުރާރުކުރެއްވިއެވެ. އީރާނުގެ ޓްރެއިނިން ކޭމްޕް މިހާރު މެކްސިކޯއަށް ބަދަލުކޮށްފައިވާއިރު، އިންފަންޓީނޯ ސިފަކުރެއްވި ގޮތުގައި ކުރިއަށް އޮތް 48 ގައުމު ބައިވެރިވާ ވޯލްޑް ކަޕް ވެގެންދާނީ އިންސާނީ ތާރީޚުގައިވެސް ބޭއްވޭ އެންމެ ބޮޑު ހަރަކާތަށެވެ.
ކޮމެންޓު ފޮނުވާ