އޮސްޓްރޭލިއާ ސަރުކާރުން ދިވެހިރާއްޖެއަށް ހަދިޔާކުރި "ގާޑިއަން ކްލާސް" ގެ ޕެޓްރޯލް ބޯޓު، މުޅިން އަލަށް ދިވެހި ސިފައިންގެ ކޮންޓްރޯލްގެ ދަށުން ރާއްޖެއަށް އައުމަށް ދަތުރު ފަށައިފިއެވެ.
މި އުޅަނދު ރާއްޖެއަށް ގެނައުމުގެ ދިގު ދަތުރުގައި ހަމައެކަނި ހަރަކާތްތެރިވަނީ ދިވެހި އަސްކަރިއްޔާގެ ސިފައިންނެވެ. މިއީ ދިވެހި ސިފައިންގެ އަމިއްލަ ބެލުމުގެ ދަށުން މިހާ ދިގު ކަނޑުގެ ރާސްތާއެއް ހުރަސްކޮށް ކުރާ ފުރަތަމަ ދަތުރުކަން ފާހަގަކޮށްލެވެއެވެ. އޮސްޓްރޭލިއާގެ "ޑިފެންސް ކޯޕަރޭޝަން ޕްރޮގްރާމް" ގެ ދަށުން ރާއްޖެއަށް ފޯރުކޮށްދިން މި ބޯޓު ރަސްމީކޮށް ދިވެހި ސަރުކާރާ ހަވާލުކޮށްފައިވަނީ މިދިޔަ އޭޕްރީލް މަހުގެ ތެރޭގައެވެ.
މިއީ އޮސްޓްރޭލިއާގެ އޮސްޓަލް ޝިޕްސްއިން ބަނދެގެން އެކުވެރި ގައުމުތަކަށް ފޯރުކޮށްދިން ގާޑިއަން ކްލާސްގެ 24 ވަނަ އަދި އެންމެ ފަހު ބޯޓެވެ. މި އުޅަނދު ރާއްޖެއަށް ހަދިޔާކުރަން ނިންމިކަން އިއުލާނުކުރީ މިދިޔަ އަހަރުގެ ޖޫން މަހު އޮސްޓްރޭލިއާގެ ޑިފެންސް މިނިސްޓަރު ރިޗާޑް މާލްސްއާއި ރާއްޖޭގެ އޭރުގެ ޑިފެންސް މިނިސްޓަރު ޣައްސާން މައުމޫން ނެރުއްވި ގުޅިފައިވާ ބަޔާނެއްގައެވެ.
އޮސްޓްރޭލިއާގެ ޑިފެންސް މިނިސްޓްރީން ބުނެފައިވާ ގޮތުގައި މިއީ ދެ ގައުމުގެ ދެމެދުގައި އޮތް ޒަމާންވީ އިތުބާރާއި ގުޅުން ރަމްޒުކޮށްދޭ އަދި ދިފާއީ ގުޅުން އައު ހަރުފަތަކަށް ގެންގޮސްދިން މުހިންމު ފިޔަވަޅެކެވެ. މި އަގުހުރި އެހީގެ ސަބަބުން ރާއްޖޭގެ ކަނޑުގެ ސަރަހައްދު ބަލަހައްޓައި، ކަނޑުމަތީގެ ނުރައްކާތަކާއި ގޮންޖެހުންތަކާ ކުރިމަތިލުމުގައި ދިވެހި އަސްކަރިއްޔާގެ ގާބިލުކަން އެތައް ގުނައަކަށް އިތުރަށް ހަރުދަނާވެގެންދާނެއެވެ.
ކޮމެންޓު ފޮނުވާ