ދިވެހިރާއްޖެއާއި އިންޑިއާއާ ދެމެދު އޮތް ޚާރިޖީ ގުޅުމަށް 60 އަހަރު ފުރުން ފާހަގަކުރުމުގެ ގޮތުން، ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާޓްސް އާއި ރާއްޖޭގައި ހުންނަ އިންޑިއާގެ ހައިކޮމިޝަން ގުޅިގެން ޚާއްޞަ ސެމިނާއެއް ބާއްވައިފިއެވެ.
މި ހަރަކާތުގައި އެކަޑެމިކް ބޭފުޅުންނާއި، ދަރިވަރުންނާއި، ޑިޕްލޮމެޓުންގެ އިތުރުން ދަޢުވަތު އެރުވިގެން ވަޑައިގެންނެވި މެހެމާނުން ބައިވެރިވެވަޑައިގެންނެވިއެވެ. އަދި މި ހަރަކާތުގައި ދެ ޤައުމުގެ ދެމެދުގައި އޮތް ބަދަހި ގުޅުމާއި ޙިއްޞާކުރާ ތާރީޚުގެ މައްޗަށް އަލިއަޅުވާލާފައިވެއެވެ.
މި ސެމިނާގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު ޖީ. ބާލަސުބްރަމާނިއަމްއެވެ.
މި ރަސްމިއްޔާތުގެ ކަންކަން ފެށިގެންދިޔައީ ޝަރަފުވެރި މެހެމާނު ވަޑައިގަތުމުންނެވެ. އެއަށްފަހު ރާއްޖެ-އިންޑިއާ ގުޅުމުގެ މުހިންމު ހަރުފަތްތައް ދައްކުވައިދޭ ޚާއްޞަ ފޮޓޯ މައުރަޒެއް ބައްލަވާލެއްވުން އޮތެވެ.
ވޭތުވެދިޔަ 60 އަހަރުގެ ތެރޭގައި ދެ ޤައުމުގެ ދެމެދުގައި ޤާއިމުކުރެވިފައިވާ ގުޅުންތަކުގެ މައްޗަށް ތަފާތު ޕްރެޒެންޓޭޝަންތައް މި ސެމިނާގައި ހުށަހެޅުނެވެ. މީގެ ތެރޭގައި މޫސުމަށް އަންނަ ބަދަލުތަކާއި ދެމެހެއްޓެނިވި ތަރައްޤީ، ސަގާފީ އަދި ތާރީޚީ ގުޅުންތައް، ޞިއްޙީ ދާއިރާގެ އެއްބާރުލުން، ކާބޯތަކެތީގެ ރައްކާތެރިކަން، ވިޔަފާރިއާއި އިޤްތިޞާދީ ކުރިއެރުން، ތަޢުލީމު، އަދި އުމްރާނީ ތަރައްޤީ ފަދަ މުހިންމު ދާއިރާތަކާ ގުޅޭގޮތުން މަޝްވަރާކުރެވުނެވެ.
ވާހަކަދެއްކެވި ބޭފުޅުންނާއި ދަރިވަރުން ވަނީ ދެ ޤައުމުގެ ދެމެދުގައި އޮތް ފުން ގުޅުން ފާހަގަކޮށް، ޚާރިޖީ ގުޅުން އިތުރަށް ބަދަހިކުރުމުގައި ރައްޔިތުންގެ މެދުގައި އޮންނަ ގުޅުމުގެ މުހިންމުކަން ފާހަގަކޮށްފައެވެ.
މި ރަސްމިއްޔާތުގައި ވާހަކަފުޅުދައްކަވަމުން ހައިކޮމިޝަނަރު ބާލަސުބްރަމާނިއަމް ވަނީ ރާއްޖެއާއި އިންޑިއާއާ ދެމެދު އޮތް ޒަމާންވީ އެކުވެރިކަމާއި ބައިވެރިވުން އަލުން ކަށަވަރުކޮށްދެއްވާފައެވެ.
މި ސެމިނާ ނިމިގެންދިޔައީ ދަރިވަރުން ހުށަހަޅައިދިން ދިވެހި އަދި އިންޑިއާގެ ސަގާފީ ހަރަކާތްތަކަކުންނެވެ. މީގެ ތެރޭގައި ބޮޑުބެރު އަދި ފަތިގަނޑު ޖެހުން ފަދަ ސަގާފީ ނެށުންތައް ހިމެނެއެވެ.
އިންތިޒާމުކުރި ފަރާތްތަކުން ފާހަގަކުރި ގޮތުގައި މި ސެމިނާއަކީ ދެ ޤައުމުގެ ދެމެދުގައި އޮތް ތާރީޚީ ގުޅުން ފާހަގަކުރުމާއެކު، ސަގާފީ، ތަޢުލީމީ، އަދި ތަރައްޤީގެ ދާއިރާތަކުން ކުރިއަށްދާ ގުޅުންތަކާމެދު ހޭލުންތެރިކަން އިތުރުކުރުމަށް ލިބުނު މުހިންމު ޕްލެޓްފޯމެކެވެ.
ކޮމެންޓު ފޮނުވާ