ސަރުކާރުން ކުރިއަށްގެންދާ "ދިވެހި ވަޠަނީ ޚިދުމަތް" ޕްރޮގްރާމްގެ ދެވަނަ ބުރު ކާމިޔާބުކަމާއެކު ފުރިހަމަކޮށް، 344 ޒުވާނަކު ޅ. މާފިލާފުށީގައި މިއަދު ދަސްވެނިވެއްޖެއެވެ.
ޒުވާނުންނަކީ ޤައުމަށް ފައިދާހުރި، އަޚުލާޤު ރަނގަޅު ބަޔަކަށް ހެދުމުގެ އަމާޒުގައި ހިންގާ މި ޕްރޮގްރާމްގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދެވެ. މި ބުރުގައި ރާއްޖޭގެ 112 ރަށަކުން 350 ޒުވާނުން ބައިވެރިވިއިރު، އޭގެ ތެރޭގައި 64 އަންހެނުންނާއި 286 ފިރިހެނުން ހިމެނެއެވެ. މީގެ ތެރެއިން 344 ބައިވެރިން ކާމިޔާބުކަމާއެކު ތަމްރީނު ނިންމާފައިވާއިރު، ރަސްމިއްޔާތުގައި ބައިވެރިންނަށް ޢަޒުމް ލައިދިނުމާއި ޚާއްޞަ ހިނގާލުމެއް ވަނީ ބާއްވާފައެވެ.
މި އަހަރުގެ ތެރޭގައި މި ޕްރޮގްރާމްގެ އިތުރު ދެ ބުރެއް ބާއްވާނެކަމަށް ވަޒީރު ވިދާޅުވިއެވެ. މީގެ އިތުރުން، ބ. ކިހާދޫގައި ހިންގި ފުރަތަމަ ބުރުން ތަމްރީނު ނިންމި ކުދިންގެ ތެރެއިން 63 ކުއްޖަކު، ހަ ދާއިރާއަކުން ކުރިއަށް އޮތް ތާނގައި ދަސްވެނިވާނެކަންވެސް އެމަނިކުފާނު ފާހަގަކުރެއްވިއެވެ. "ނޭޝަނަލް ސަރވިސް އިނީޝިއަލް ޓްރެއިނިންގ" އަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަކަށް، ޒުވާނުން ބާރުވެރިކުރުވައި މަސައްކަތުގެ ހުނަރާއި ރިވެތި ސުލޫކު ދަސްކޮށްދިނުމަށް ފެށްޓެވި މުހިންމު ސިޔާސަތެކެވެ.
މި ޕްރޮގްރާމްގެ ފުރަތަމަ ބުރުން 346 ޒުވާނުން ދަސްވެނިވެފައިވާއިރު، އޭގެ ތެރެއިން 38 ރަށަކަށް ނިސްބަތްވާ އުމުރުން 15 އަހަރާއި 19 އަހަރާ ދެމެދުގެ 66 ދަރިވަރަކު ވަނީ ފަންނީ ތަމްރީނުތަކުގައި ބައިވެރިވުމަށް ނިންމާފައެވެ. ސަރުކާރުގެ މައިގަނޑު އަމާޒަކީ މިފަދަ ތަމްރީނުތައް މެދުވެރިކޮށް، ޤައުމަށް ޚިދުމަތްކުރުމުގެ ރޫޙު ހުރި، ޤާބިލު އަދި އުފެއްދުންތެރި ޒުވާން ޖީލެއް ބިނާކުރުމެވެ.
ކޮމެންޓު ފޮނުވާ