އެކްޓަރ ވަރުން ދަވަން އާއި އޭނާގެ ލޯބިވެރިޔާ، ނަތާޝާ ދަލާލް މި މަހު ކައިވެނި ކުރަން ތައްޔާރު ވަމުން ދާކަމަށް އިންޑިއާގެ ނޫސްތަކުން ބުނެފިއެވެ.
މި ޖޯޑު، އަލީބާގް ގައި ވަރުގަދަ ޕަންޖާބީ ކައިވެންޏަކަށް ތައްޔާރުވަމުން ދާކަމަށް، އިންޑިއާގެ މުނިފޫހިފިލުވުމުގެ ދާއިރާގެ ޚަބަރު ގެނެސްދޭ މީޑިއާތަކުން ރޭ ވަނީ ރިޕޯޓްކޮށްފަ އެވެ. ނަމަވެސް ކައިވެނީގެ ސީދާ ތާރީހް އަދި ހާމައެއް ނުކުރެއެވެ.
ކައިވެނީގެ ވާހަކަތަކަކީ، އަބަދުވެސް ދެކެވެމުންދާ ވާހަކަތަކެއް ނަމަވެސް މިފަހަރު ކައިވެންޏާމެދު ވަރަށް ސީރިއަސް ކަމަށް ވަރުން މީގެކުރިން ވަނީ ބުނެފައެވެ. އަދި ކޯވިޑްގެ ހާލަތު ތަންދޭނަމަ މިއަހަރު ވީއެންމެ އަވަހަކަށް ކައިވެނި ކުރާނެ ކަމަށް ވެސް ވަރުން ކުރިން ވަނީ ބުނެފައެވެ. އެގޮތުނަ ނަތާޝާވެސް ކައިވެނި ކުރުމަށް ކެތްމަދުވެފައި ވާކަމަށްވެސް ވަރުން ބުނެއެވެ.
އެންމެ ފަހުގެ ޚަބަރުތައް ބުނާގޮތުން މި ޖޯޑު މިހާރު ދަނީ މިމަހު އަލީބާގްގައި ކައިވެނި ހަފްލާ ބާއްވަން ތައްޔާރުވަމުން ނެވެ. އަދި ހަފްލާއަށް ދައުވަތުދޭނެ 200 މީހުންވެސް މިހާރު ކަނޑައަޅާފައި ވާކަމަށްވެސް ރިޕޯޓްތައް ބުނެއެވެ. އަދި ވަރުން ދާދިފަހުން އަލީބާގް އަށް ގޮސް ފައިވްސްޓަރ ހޮޓަލެއް ވެސް ބުކްކޮށްފައި ވާކަމަށް ވެސް ބައެއް ރިޕޯޓްތައް ބުނެއެވެ.
ކެރިއަރުގެ ފުރަތަމަކޮޅު ވަރުން މާބޮޑަށް އޭނާގެ ލޯބިވެރިޔާގެ ވާހަކަތައް އާންމު ނުކުރިނަމަވެސް މިފަހަކަށް އައިސް އެ ދެމީހުންގެ ގުޅުމުގެ ވާހަކަތައް ވަރުން އައީ ހާމަ ކުރަމުންނެވެ. އަދި އެ ދެމީހުންނަކީ ކުޑައިރުއްސުރެ އެކުގައި އުޅުނު ދެމީހުންވެސް މެއެވެ.
ކޯވިޑް 19 އާހެދި ކައިވެނި ނުކުރެވިފައި ތިބި ގިނަ ޖޯޑުތަކެއް ބޮލީވުޑުން މިދިޔަ އަހަރު ފެނިގެންދިޔައެވެ. ވަރުން އަދި އޭނާގެ ލޯބިވެރިޔާ ނަތާޝާގެ އިތުރުން، މިގޮތަށް ކޯވިޑްގެ ސަބަބުން ކައިވެނި ލަސްކޮށްލި ތަރިންގެތެރޭގައި، ރަންބީރް ކަޕޫރާއި އާލިއާ ބަޓް ވެސް ހިމެނެއެވެ. މި ޖޯޑުގެ ކައިވެންޏަކީވެސް މިއަހަރު ފެންނާނެ ކަމަށް ގިނަބަޔަކު އިންތިޒާރުކުރާ ކައިވެންޏެކެވެ.
