އިންތިޚާބާ ބެހޭ މަރުކަޒާ ޖެހިގެން ހުރި ގުދަނެއްގައި މިރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، ކުރިއަށް އޮތް ލޯކަލް ކައުންސިލް އިންތިޚާބުގެ އެއްވެސް ކަމަކަށް ހުރަހެއް ނޭޅޭނެކަމުގެ ޔަގީންކަން އިލެކްޝަންސް ކޮމިޝަން (އީސީ) އިން ދީފިއެވެ.
އެޕްރީލް މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުތަކަށް އީސީން ތައްޔާރުވަމުންދިޔަ މަރުކަޒު ކައިރީގައި ހުރި ގުދަނެއްގައި ރޯވި ނަމަވެސް، އިންތިޚާބާ ގުޅޭ ހުރިހާ ލިޔެކިޔުންތަކާއި ސާމާނުތައް މިހާރު ރައްކާތެރިކަމާއެކު ބޭރަށް ނެރެފައިވާ ކަމަށް އީސީގެ ރައީސް މުޙައްމަދު ޒާހިދު ވިދާޅުވިއެވެ. އެހެންކަމުން، ކުރިންވެސް ރޭވިފައިވާ ގޮތަށް އިންތިޚާބުގެ ކަންކަން އެއްވެސް މަޑުޖެހުމެއްނެތި ކުރިއަށްދާނެ ކަމަށް އޭނާ ވިދާޅުވިއެވެ.
މި ހާދިސާއާ ގުޅިގެން އީސީގެ މަސައްކަތްތައް ވަގުތީގޮތުން ސޯޝަލް ސެންޓަރަށް މިހާރު ވަނީ ބަދަލުކޮށްފައެވެ. ޚާއްޞަކޮށް، ފައިނަލް ވޯޓާސް ރަޖިސްޓްރީގައި ކެންޑިޑޭޓުން ސޮއިކުރުން ފަދަ މުހިންމު މަސައްކަތްތައް، ކުރިންވެސް ކަނޑައަޅާފައިވާ ގަޑިތަކުގައި މާދަމާއިން ފެށިގެން ސޯޝަލް ސެންޓަރުގައި ކުރިއަށް ގެންދާނެ ކަމަށް ޒާހިދު ފާހަގަކުރެއްވިއެވެ. އަދި އިންތިޚާބީ މަރުކަޒަށް އަލުން ވަދެވޭނީ އެމްއެންޑީއެފުން އެކަމުގެ ސަލާމަތީ ހުއްދަ ދިނުމުން ކަމަށްވެސް އީސީން މަޢުލޫމާތުދެއެވެ.
މިރޭ 10:00 ހާއިރު ހިނގި މި ހާދިސާގައި އަނދައި ހުލިވެފައިވަނީ ގަސް ކާނާއާއި ކެމިކަލް ފަދަ ތަކެތި ވިއްކާ ޕްރައިމް ފާޓިލައިޒާގެ މައި ގުދަނެވެ. އެ ގުދަނަކީ އެ ކުންފުނީގެ މުދަލުގެ ގާތްގަނޑަކަށް 80 އިންސައްތަ ރައްކާކޮށްފައި ހުރި ތަން ކަމަށް އެ ކުންފުނިން ބުނެފައިވާއިރު، އެމްއެންޑީއެފްގެ ފަޔަރ އެންޑް ރެސްކިއުއިން ވަނީ ގިނަ އިރުތަކެއްގެ މަސައްކަތުން މިހާރު އެ އަލިފާންގަނޑު އެއްކޮށް ނިއްވާލާފައެވެ.
ކޮމެންޓު ފޮނުވާ