މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ވައިގެ ދަތުރުފަތުރަށް ބޮޑެތި ބުރޫތަކެއް އަރައި، ރާއްޖޭގައި ތާށިވި ފަތުރުވެރިން އަނބުރާ ގައުމަށް ފޮނުވުމަށް ވިޒިޓް މޯލްޑިވްސްއިން ނުވަ ރިޕެޓްރިއޭޝަން ފްލައިޓެއް ބާއްވައިފިއެވެ.
ވިޒިޓް މޯލްޑިވްސްއިން މައުލޫމާތު ދޭގޮތުގައި، ކަމާގުޅޭ ވުޒާރާތަކާއި ފަތުރުވެރިކަމުގެ ސިނާއަތުގެ ބައިވެރިން ގުޅިގެން އެންމެ އިސްކަމެއް ދީގެން ކުރަމުންދާ މަސައްކަތަކީ ފަތުރުވެރިންގެ ރައްކާތެރިކަން ކަށަވަރުކުރުމާއި، ދިމާވެފައިވާ ދަތިތަކަށް އަވަސް ހައްލެއް ހޯދައިދިނުމެވެ. މި މަސައްކަތުގެ ދަށުން ޖަރުމަނުވިލާތާއި ފަރަންސޭސިވިލާތް ފަދަ ގައުމުތަކަށް ފަތުރުވެރިން ފޮނުވާލުމުގެ އިންތިޒާމުތައް ހަމަޖައްސާފައިވާއިރު، ވެލާނާ އިންޓަރނޭޝަނަލް އެއާޕޯޓުގައި ވަނީ ހާއްސަ 'ހެލްޕް ޑެސްކް' އެއް ގާއިމުކޮށްފައެވެ. އެމް.އޭ.ސީ.އެލް އާއި ޓޫރިޒަމް މިނިސްޓްރީގެ އެހީތެރިކަމާއެކު ހިންގާ މި ޑެސްކު މެދުވެރިކޮށް ދަތުރުވެރިންނަށް ބޭނުންވާ މައުލޫމާތާއި އިރުޝާދު މެދުނުކެނޑި ދަނީ ފޯރުކޮށްދެމުންނެވެ.
މި ހާލަތުން އަރައިގަތުމަށްޓަކައި އެކި އެއާލައިންތަކާއެކު މަޝްވަރާކޮށް އިތުރު ފްލައިޓްތައް ބޭއްވުމުގެ އިންތިޒާމުތައް ހަމަޖައްސަމުންދާކަމަށް ވިޒިޓް މޯލްޑިވްސްއިން ބުނެއެވެ. އަދި ރާއްޖޭގެ ފަތުރުވެރިކަމަށް ކޮށްފާނެ ނޭދެވޭ އަސަރު ކުޑަކުރުމުގެ ގޮތުން، ދަތުރުފަތުރަށް ހުރަސްއެޅިފައިނުވާ އިންޑިއާ، ޗައިނާ އަދި ރަޝިއާ ފަދަ މާކެޓުތަކަށް އަމާޒުކޮށްގެން ޓުއާ އޮޕަރޭޓަރުންނާ ގުޅިގެން ހާއްސަ ކެމްޕޭންތަކެއް ފެށުމަށް މިހާރު ވަނީ ތައްޔާރުވެފައެވެ. މީގެ އިތުރުން، ކުރިމަގުގައި ދިމާވެދާނެ މިފަދަ ކާރިސާތަކަށް ދުރާލާ ތައްޔާރުވުމުގެ ގޮތުން، ސިނާއަތުގެ ބައިވެރިންނާއެކު މަޝްވަރާކޮށް، ފަތުރުވެރިކަމަށް ހާއްސަ 'ކްރައިސިސް ރެސްޕޮންސް ސްޓްރެޓެޖީ' އެއް އެކުލަވާލުމުގެ މަސައްކަތްވެސް އެ ކޯޕަރޭޝަނުން ދަނީ ކުރަމުންނެވެ.
ކޮމެންޓު ފޮނުވާ