ޖެންޒީން އިސްވެ ކުރި މުޒާހަރާތަކަށްފަހު ނޭޕާލުގައި ބޭއްވި ތާރީޚީ އިންތިހާބުގައި، އެ ގައުމުގެ ކުރީގެ ބޮޑުވަޒީރު ކޭޕީ ޝަރްމާ އޮލީ ބަލިކޮށް، ކުރީގެ ރެޕް ލަވަކިޔުންތެރިޔާ ބާލަންދްރަ ޝާހް (ބާލެން) ބޮޑުވަޒީރުކަމުގެ މަގާމާ ގާތަށް ޖެހިވަޑައިގެންފިއެވެ.
ނޭޕާލްގެ އިލެކްޝަން ކޮމިޝަނުގެ ނަތީޖާތައް ދައްކާގޮތުން، އުމުރުން 35 އަހަރުގެ ޝާހު ވަނީ 68،348 ވޯޓު ހޯއްދަވައިގެން ތަފާތު ބޮޑު ނަތީޖާއަކުން ކުރި ހޯއްދަވާފައެވެ. އޭނާއާ ވާދަކުރެއްވި އުމުރުން 74 އަހަރުގެ އޮލީއަށް ލިބިވަޑައިގަތީ އެންމެ 18،734 ވޯޓެވެ. މިއީ މިދިޔަ ސެޕްޓެމްބަރު މަހު ނޭޕާލުގެ ޒުވާނުން ނުކުމެ ކުރި މުޒާހަރާތަކާ ގުޅިގެން ސަރުކާރު ވެއްޓުނު ފަހުން ބޭއްވި ފުރަތަމަ އިންތިހާބެވެ. އަދި މިއީ ޒަމާންވީ ސިޔާސީ ލީޑަރުންނާ ދެކޮޅަށް އާ ޖީލުގެ ޒުވާނުން ނުކުމެ ގެނައި ބޮޑު ބަދަލެއްގެ ގޮތުގައި ވަނީ ސިފަކުރެވިފައެވެ.
ޝާހުގެ އާރްއެސްޕީ ޕާޓީން މިހާރު އަންނަނީ އާންމު އިންތިހާބު ކާމިޔާބުކޮށް، ސަރުކާރު އެކުލަވާލުމަށް ތައްޔާރުވަމުންނެވެ. ފާއިތުވި ވިއްސަކަށް އަހަރު ދުވަހު ނޭޕާލުގެ ވެރިކަން ކުރަމުން އައީ މައިގަނޑު ތިން ޕާޓީއަކުން ކޯލިޝަން ހަދައިގެންނެވެ. އޭގެ ތެރެއިން ދެ ޕާޓީއަކީ ކޮމިއުނިސްޓް ޕާޓީތަކެވެ. ނަމަވެސް މިފަހަރުގެ އިންތިހާބުގައި އަލަށް ވޯޓުލީ 800،000 ޒުވާނުންނާއެކު، ޖެންޒީން ވަނީ އެތައް އަހަރެއް ވަންދެން ވެރިކަން ކުރަމުން އައި މީހުން ބަދަލުކޮށް، އެމީހުންގެ މުސްތަގުބަލު އަމިއްލައަށް ބައްޓަންކުރަން ނިންމާފައިވާކަން ސާބިތުކޮށްދީފައެވެ.
"ބާލެން" ގެ ނަމުން މަޝްހޫރުވެފައިވާ ޝާހަކީ ނޭޕާލްގެ ހިޕްހޮޕް މިއުޒިކް އިންޑަސްޓްރީގައި ގިނަ އަހަރުތަކެއް ވަންދެން ހަރަކާތްތެރިވި ފަންނާނެކެވެ. އޭނާގެ އެންމެ މަޝްހޫރު އެއް ލަވަ ކަމަށްވާ "ބަލިދާން" އަކީ ޔޫޓިއުބްގައި އެތައް މިލިއަން ބަޔަކު ބަލާފައިވާ ލަވައެކެވެ. މުޒާހަރާތަކުގެ ތެރޭގައި އޭނާ ވަނީ އޮލީ އަކީ ގައުމަށް ޣައްދާރުވި ޓެރަރިސްޓެއްގެ ގޮތުގައި ސިފަކުރައްވާފައެވެ. އޭނާގެ ކެމްޕޭނުގައި ޝާހުގެ ޕާޓީން ވަނީ ކުރިއަށް އޮތް ފަސް އަހަރުގެ ތެރޭގައި 1.2 މިލިއަން ވަޒީފާ އުފައްދައި، ބޮލަކަށް ޖެހޭ އާމްދަނީ 1،447 ޑޮލަރުން 3،000 ޑޮލަރަށް އިތުރުކޮށް، ގައުމުގެ އިގުތިސާދު 100 ބިލިއަން ޑޮލަރަށް އަރާކުރުމުގެ އިތުރުން ސިއްހީ އިންޝުއަރެންސްގެ ފުރިހަމަ ނިޒާމެއް ގާއިމުކޮށްދިނުމަށް ވައުދުވެފައެވެ.
ނޭޕާލުގެ ސިޔާސީ މަސްރަހު އެފުށްމިފުށަށް ޖެހިގެން ދިޔައީ މިދިޔަ އަހަރު ސޯޝަލް މީޑިއާ މަނާކުރުމާ ގުޅިގެން ޒުވާނުން ފެށި ވަރުގަދަ މުޒާހަރާތަކާ ހިސާބުންނެވެ. ސިޔާސީ ނިޒާމާއި "ނެޕޯ ބޭބީސް" ނުވަތަ ސިޔާސީ މީހުންގެ ދަރިންނަށް އަމާޒުކޮށް ފެށި މި މުޒާހަރާތަކުގައި 77 މީހުން މަރުވިއެވެ. ބީބީސީގެ ތަހުގީގަކުން ހާމަވިގޮތުގައި، ހަތިޔާރު ނެތް އާންމުންނާ ދެކޮޅަށް ނުރައްކާތެރި ހަތިޔާރު ބޭނުންކުރުމަށް އޭރުގެ ފުލުހުންގެ ވެރިޔާ ވަނީ އަމުރުކޮށްފައެވެ. މި ހުރިހާ ކަމަކާއެކު، ނޭޕާލުގެ ރައްޔިތުން މިއަދު މިވަނީ އާ މިސްރާބަކަށް ގައުމު ގެންދިއުމަށް އާ ޖީލުގެ ޒުވާން ލީޑަރަކު އިހުތިޔާރުކޮށްފައެވެ.
ކޮމެންޓު ފޮނުވާ