ކުރިއަށް އޮތް ލޯކަލް ކައުންސިލް އިންތިހާބަށް އަމާޒުކޮށް ޕީއެންސީން އެކުލަވާލި "ދަ ގްރޭޓާ އައްޑޫ" މެނިފެސްޓޯ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ އިފްތިތާހުކޮށްދެއްވައިފިއެވެ.
އާޓިފިޝަލް ބީޗުގައި ބޭއްވި ހާއްސަ ޖަލްސާއެއްގައި އާންމުކުރި މި މެނިފެސްޓޯގެ އެންމެ ފާހަގަކޮށްލެވޭ އެއް ކަމަކީ، އައްޑޫ ސިޓީއަކީ ފުދުންތެރި އަދި ތަހުޒީބު ސިޓީއަކަށް ހެދުމުގެ ގޮތުން، ސުވާދީބު ދައުލަތުގެ ރައީސް އަބްދުﷲ އަފީފު ދީދީގެ ނަމުގައި ގައުމީ ފެންވަރުގެ އީޖާދީ މަރުކަޒަކާއި، އައްޑޫގެ ތާރީހު ރައްކާތެރިކުރުމަށް "ސުވާދީބު ދާރުލްއާސާރު" ގެ ނަމުގައި ހާއްސަ ތަނެއް ގާއިމުކުރުމެވެ. މީގެ ބޭނުމަކީ އައްޑޫގެ މުއްސަނދި ތާރީހާއި، އިނގިރޭސިން ތިބި ދުވަސްވަރުގެ ހާދިސާތަކާއި، އައްޑޫގެ ބަހުރުވަ އާއި އާދަކާދަތައް އެއް ފުރާޅެއްގެ ދަށުން ފެންނަން ހުރުމާއެކު، ކުރިމަގު ބައްޓަންކުރުމަށް އިލްމީ ދިރާސާތަކަށް މަގުފަހިކުރުމެވެ.
އައްޑޫ ސިޓީގެ ތަސައްވަރު މައިގަނޑު ހަ އަސާސެއްގެ މައްޗަށް ބިނާކޮށްފައިވާއިރު، އޭގެ ތެރޭގައި އައްޑޫގެ އަމިއްލަވަންތަކަން ހިމާޔަތްކުރުމާއި، ފަތުރުވެރިންނަށް ތަފާތު ތަޖުރިބާތަކެއް ކުރެވޭނެ މަންޒިލަކަށް އެ ސިޓީ ހެދުމާއި، ފަންނީ ވަޒީފާތައް އިތުރުކުރުން ހިމެނެއެވެ. އަދި އިންޑިއާ ކަނޑުގެ ވިޔަފާރިއާއި ދަތުރުފަތުރުގެ މައި މަރުކަޒަކަށް އައްޑޫ ބަދަލުކޮށް، ރަށުން ބޭރުގައި އުޅޭ އައްޑޫ ރައްޔިތުން އަނބުރާ ރަށަށް ގެނެވޭނެ ފަދަ އިންވެސްޓްމަންޓްތަކަށް ފަހި އީޖާދީ މާހައުލެއް ގާއިމުކުރުން ވެސް ހިމެނެއެވެ.
އަފީފް އީޖާދީ މަރުކަޒުގެ ތެރެއިން ވިޔަފާރިއާއި ފަތުރުވެރިކަން ސިންދަފާތުކުރުމާއި، ޒުވާނުންނާއި ގުޅޭ އެކި ދިރާސާތައް ކުރުމާއި، އުމްރާނީ ތަރައްގީގެ ސިޔާސަތުތައް ރޭވުމަށް މުހިންމު މަސައްކަތްތަކެއް ކުރެވޭނެއެވެ. ޕީއެންސީގެ މެނިފެސްޓޯގައި ބުނެފައިވާ ގޮތުގައި މިކަންކަން ކުރިއަށް ގެންދާނީ ސަރުކާރުގެ ކަމާބެހޭ އިދާރާތަކާއި، އިލްމުވެރިންނާއި، ފަންނީ މާހިރުންގެ އިތުރުން ވިޔަފާރިވެރިންނާއި އާންމު ރައްޔިތުންގެ ވެސް ހިޔާލާއި މަޝްވަރާއާއެކު ދެމެހެއްޓެނިވި ގޮތެއްގައެވެ. މި ސިޔާސަތުތަކުގެ އެންމެ ބޮޑު އަމާޒަކީ އައްޑޫގެ ފަހުރުވެރި މާޒީ އިއާދަކޮށް، ދުނިޔޭގެ ޗާޓަށް އައްޑޫ އެނބުރި ގެނައުމެވެ.
ކޮމެންޓު ފޮނުވާ