އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން، އެ ސިޓީގައި ޤާއިމްކުރާ ސެންޓްރަލް ޕަވަރ ސްޓޭޝަން (ސީޕީއެސް) ނިންމުމުގެ މަސައްކަތް ޑެފިނިޓް ސޮލިއުޝަންސް ކުންފުންޏާ ހަވާލުކޮށްފިއެވެ.
ފެނަކަ ކޯޕަރޭޝަނާއި ޑެފިނިޓް ސޮލިއުޝަންސްއާ ދެމެދު މިއަދު ވެވުނު އެއްބަސްވުމުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، މޭޖަރ (ރިޓަޔަރޑް) މުޙައްމަދު ނަޖާޙެވެ. އަދި ޑެފިނިޓް ސޮލިއުޝަންސްގެ ފަރާތުން ސޮއިކުރެއްވީ ކުންފުނީގެ ފައުންޑަރ އަދި ސީއީއޯ އަބްދުﷲ ސައީދެވެ. ފެނަކައިން މަޢުލޫމާތު ދޭގޮތުގައި، މި އެއްބަސްވުމުގެ ދަށުން ސީޕީއެސްގެ ނުނިމިހުރި ހުރިހާ މަސައްކަތަކާއި، އިންޖީނުތައް ބަހައްޓައި އޮޕަރޭޝަނަށް ގެނައުމުގެ މަސައްކަތް އެކުންފުނިން ކުރާނެއެވެ.
މި މަސައްކަތާ ހަވާލުވި ޑެފިނިޓް ސޮލިއުޝަންސްއަކީ ދުބާއީގައި ރަޖިސްޓްރީކޮށްގެން މެދުއިރުމަތީގައި މިފަދަ ގިނަ މަޝްރޫޢުތަކެއް ކާމިޔާބުކަމާއެކު ހިންގާފައިވާ ތަޖުރިބާކާރު ކުންފުންޏެކެވެ. މީގެ ކުރިން މި މަޝްރޫޢު ޗައިނާގެ ޑޮންފަންގ ކުންފުންޏާ ހަވާލުކުރި ނަމަވެސް، އެއްބަސްވުމާ އެއްގޮތަށް މަސައްކަތް ކުރިއަށް ނުދިއުމުގެ ސަބަބުން އެ އެއްބަސްވުން ވަނީ ބާތިލުކޮށްފައެވެ.
އައު އެއްބަސްވުމުގެ ދަށުން އައްޑޫ ސީޕީއެސްގައި ބެހެއްޓުމަށް ހަމަޖެހިފައިވަނީ ބެލްޖިއަމްގެ އަންގްލޯ ބެލްޖިއަން ކޯޕަރޭޝަން (އޭބީސީ) ގެ ޒަމާނީ، ލޯ ސްޕީޑް އިންޖީނުތަކެކެވެ. މިއީ މިހާރު އައްޑޫގައި ބޭނުންކުރަމުންދާ ހައި ސްޕީޑް އިންޖީނުތަކާ ޚިލާފަށް ޔޫރަޕްގެ ފެންވަރު ރަނގަޅު އުފެއްދުމެކެވެ.
އަންނަ އަހަރުގެ ނިޔަލަށް މި މަޝްރޫޢު އެއްކޮށް ނިމޭއިރު، އައްޑޫ ސީޕީއެސްގައި 26.37 މެގަވޯޓުގެ ކަރަންޓު އުފެއްދުމުގެ ޤާބިލުކަން ހުންނާނެއެވެ. ފެނަކައިގެ އެމްޑީ ނަޖާޙު ފާހަގަކުރެއްވި ގޮތުގައި، މި މަޝްރޫޢު ފުރިހަމަވުމާއެކު އައްޑޫ ސިޓީގެ ރައްޔިތުންނަށް ޒަމާންތަކަކަށް ދިމާވެފައިވާ ކަރަންޓުގެ ދަތިކަމަށް ދާއިމީ އަދި ފުރިހަމަ ހައްލެއް ލިބިގެންދާނެއެވެ.
ކޮމެންޓު ފޮނުވާ